03.12.2021
Tha
Bile a bheireadh maitheanas do mhèinnearan a chaidh a dhìteadh airson eucoirean
aig stailc nam mèinnearan 1984-1985 gu bhith air a sgrùdadh le Comataidh Pàrlamaid
na h-Alba.
Tha a’
Chomataidh Co-ionannachd, Còraichean Daonna agus Ceartas Catharra a’ sireadh
bheachdan bhon mhòr-shluagh, acadaimigich agus luchd-ùidh eile air Bile Stailc
nam Mèinnearan (Maitheanas) (Alba).
Ma
thèid gabhail ris, bheireadh am Bile maitheanas gu fèin-ghluasadach dhaibhsan a
chaidh a dhìteadh airson eucoirean a thachair nuair a bha mèinnearan a’ gabhail
pàirt ann an loidhne piocaid, fianais-dhùbhlain, no cruinneachadh eile den aon
sheòrsa airson taic a thoirt do na stailcean, no fhad ’s a bha iad a’ siubhal
gu no bho loidhne piocaid no fianais-dhùbhlain.
Le
aithne don uallach a chuireadh air dàimhean eadar na poileis is
coimhearsnachdan ri linn na stailc, tha an reachdas na oidhirp air rèiteachadh
a dhèanamh eadar an fheadhainn a bha a’ seasamh an lagha agus an fheadhainn a
bha a’ sabaid gus an cuid obraichean, beòshlaint agus coimhearsnachdan a dhìon.
A’ bruidhinn nuair a chaidh an
rannsachadh a chur air bhog thuirt Neach-gairm na Comataidh, Joe FitzPatrick
BPA:
“Tha
mòran den fheadhainn a ghabh pàirt agus a chaidh a dhìteadh airson a bhith an
sàs ann an stailc nam mèinnearan air a’ bhuaidh agus an stiogma a thàinig às a
ghiùlan airson deicheadan.
“Tha am
Bile seo a’ feuchainn ri faothachadh a thoirt do choimhearsnachdan air feadh na
h-Alba le bhith a’ toirt maitheanas dhaibhsan a chaidh fhaighinn ciontach de
dh’eucoirean sònraichte anns na connspaidean guineach sin.
“Le
bhith a’ cur an rannsachaidh seo air bhog, tha sinn airson faighinn a-mach an e
an reachdas seo an dòigh air rèite fhaighinn agus am mì-cheartas eachdraidheil
sin a chàradh no a bheil dòighean eile ann as urrainn dhuinn an t-amas sin a
ruighinn.
“Ann a
bhith a’ sireadh bheachdan gus taic a thoirt don sgrùdadh againn, tha sinn gu
sònraichte airson cluinntinn mu dè cho fada ’s a thèid am maitheanas a tha ga
mholadh agus am buin iad ris na daoine agus na h-eucoirean ceart.”
Tha an
gairm bheachdan a’ dùnadh air 14 Faoilleach 2022 agus faodaidh tu do bheachdan
a thoirt seachad an seo: https://yourviews.parliament.scot/ehrc/miners-strike-pardons-bill
Cùl-fhiosrachadh
Ann an
2018, chuir Riaghaltas na h-Alba ath-bhreithneachadh neo-eisimeileach air bhog
mu obair poileis ann an stailc nam mèinnearan. Sheall an sgrùdadh gu sònraichte
air a’ bhuaidh a bh’ aig a’ phoileas air coimhearsnachdan.
Chaidh
aithisg dheireannach an ath-bhreithneachaidh neo-eisimeileach fhoillseachadh
ann an 2020. Mhol an aithisg gum bu chòir do Riaghaltas na h-Alba maitheanas a
thoirt do dhaoine a chaidh a dhìteadh airson eucoirean sònraichte
co-cheangailte ris an stailc.
Anns an Dàmhair 2020, thuirt Riaghaltas na h-Alba gu robh iad air gabhail ann
am prionnsapal ri moladh an Ath-bhreithneachaidh Neo-eisimeilich mu mhaitheanas
ach gum beachdaicheadh air na slatan-tomhais iomchaidh a dh’fhaodadh buntainn
ri co-dhùnadh air a’ mhaitheanas.
Anns a’ Mhàrt 2021, chuir Riaghaltas na h-Alba an co-chomhairleachadh air bhog
mu na slatan-tomhais airson maitheanas. Bha an co-chomhairleachadh a’ dol gu 4
Ògmhios 2021. Dh'fhoillsich Riaghaltas na h-Alba a
fhreagairt don cho-chomhairle air 13 Sultain 2021 a thuirt gu
robh na co-dhùnaidhean bhon fhreagairt cho-chomhairleachaidh a’ nochdadh taic
fharsaing airson maitheanas agus gur b’ e na h-aon shlatan-tomhais iomchaidh a
bu chòir a bhith ann an raon eucoirean a bhuineadh don a’ mhaitheanas.