19.11.2021
Thèid poileasaidhean a’ riaghladh
leasachadh bailtean-mòra, bailtean-beaga agus sgìrean dùthchail na h-Alba gu
2045 a sgrùdadh le grunn chomataidhean aig Pàrlamaid na h-Alba.
Tha an ceathramh Frèam Dealbhaidh Nàiseanta a’ nochdadh
ro-innleachd Riaghaltas na h-Alba airson leasachadh na h-Alba san ùine fhada
agus sreath de phoileasaidhean dealbhaidh nàiseanta, a threòraicheas
co-dhùnaidhean air gach iarrtas airson cead-dealbhaidh a chuirear a-steach ann
an Alba. Tha e cuideachd a’ sònrachadh 18 “leasachaidhean nàiseanta”, aig a
bheil e mar amas taic a chur ri lìbhrigeadh na ro-innleachd.
A-nis, don chiad turas an seisean seo
den Phàrlamaid, obraichidh grunn chomataidhean aig a’ Phàrlamaid còmhla gus na
molaidhean a sgrùdadh. Tha iad ag iarraidh cluinntinn bhuat a thaobh mar a bu
chòir gum biodh coimhearsnachdan air an dealbhadh, le amas aghaidh a chur air
ceistean mòra leithid èiginn na gnàth-shìde agus èiginn an nàdair agus taic a
chur ri togail beairteas choimhearsnachdan agus fàs eaconamach seasmhach anns
an fharsaingeachd.
Tha seo a’ gabhail a-steach a bhith a’ cluinntinn mun
choltas a bhiodh air a’ choimhearsnachd a b’ fheàrr leat, mar a ghabhas àitichean
poblach is fosgailte cleachdadh gus a bhith fallain, agus mar as urrainn dhuinn
ar cuid àitichean a dhìon mu choinneamh na h-ùine air thoiseach agus taic a
chur ath-shlànachadh bho ghalar a’ choròna-bhìorais.
Agus i a’ bruidhinn nuair a chuir na
Comataidhean an cuid sgrùdaidh air bhog, thuirt Neach-gairm Comataidh Riaghaltais Ionadail, Taigheadais agus
Dealbhaidh, Ariane Burgess BPA:
“Tha e mar amas aig an Fhrèam
Dhealbhaidh Nàiseanta buaidh mhòr a thoirt air mar a bhios sinn a’ mairsinn ann
an Alba.
“Thathar a’ cur fàilte is furan gun
teagamh air an amas seo. Ach tha e cudromach gun gabh sinn ùine gus a dheabhadh
gum faodar na h-amasan dàna seo a thoirt gu buil agus gum bi an cothrom aig
muinntir na h-Alba dol an sàs anns na h-atharrachaidhean mòra.”
Chùm an Neach-gairm oirre:
“Tha am Frèam gu math farsaing is
mionaideach agus tha e cudromach gum bi an cothrom aig a’ Phàrlamaid seo a
sgrùdadh gu h-iomlan.
“Gus seo a dhèanamh, thèid an obair
seo a chumail thairis air caochladh chomataidhean aig a’ Phàrlamaid. Cuiridh a
h-uile gin de na Comataidhean seo an cuid eòlais is teòmachd gu feum gus
buaidhean practaigeach an Fhrèam a sgrùdadh agus mar a dh’fhaodte seo a
leasachadh gus atharrachadh dha-rìribh buan is brìoghmhor a dhearbhadh.”
Thathar a’ toirt cuireadh don phoball
an cuid bheachdan mun Fhrèam a nochdadh tro: https://www.parliament.scot/chamber-and-committees/committees/current-and-previous-committees/session-6-local-government-housing-and-planning/business-items/national-planning-framework
Is e an ceann-là deireannach airson
nam beachdan Diluain 10 Faoilleach 2022.
Cùl-fhiosrachadh
Chaidh am Frèam
Dealbhaidh Nàiseanta a thoirt a-steach sa Phàrlamaid 10 Samhain
2021. Tha sia fichead là aig Pàrlamaid na h-Alba gus aithisg a thoirt mun
Fhrèam.
Gheibhear barrachd fiosrachaidh air
beachdachadh nan Comataidhean air an Fhrèam aig: https://www.parliament.scot/chamber-and-committees/committees/current-and-previous-committees/session-6-local-government-housing-and-planning/business-items/national-planning-framework