05.11.2021
An dèidh sgrùdadh ro bhuidseat 2022-23 a ghabhail
os làimh agus air ionmhas poblach na h-Alba an dèidh COVID-19, tha Comataidh
Ionmhais agus Rianachd Phoblach Pàrlamaid na h-Alba a’ toirt rabhadh mu
dhùbhlain mhòra ionmhasail mu choinneamh Buidseat na h-Alba.
Tha Buill ag ràdh gun do dh’adhbharaich an galar
tasgadh poblach aig ìre agus aig astar nach robh an leithid ann roimhe agus gum
bi a bhuil ri faireachdainn fad iomadh bliadhna ri teachd.
Anns an aithisg aice air fhoillseachadh an-diugh,
tha a’ Chomataidh a’ toirt fa-near nach fhaodar aghaidh a chur air buaidh
COVID-19 san ùine fhada ann an aon chuairt de bhuidseat agus tha i ag iarraidh
dòigh-dèiligidh dealbhaidh nas seasmhaiche.
Fàgaidh buaidh is buil a’ ghalair agus Brexit, a
bharrachd air na dùbhlain a tha ann an-dràsta leithid atharrachadh air
àireamhan an t-sluaigh, gum bi feum air dòigh-dèiligidh chuimseach is
sheasmhach fad 2022-23 agus na dhèidh.
Tha a’ Chomataidh cuideachd a’ faicinn “buannachdan
eaconamach is sòisealtasach nas fheàrr” ann a bhith a’ toirt prìomhachas do
chosg casgach air raointean mar bhochdainn agus neo-ionannachd, slàinte na
dùthcha agus an àrainneachd.
Thuirt Neach-gairm na
Comataidh Coinneach MacGileabairt BPA:
“Bidh bruthadh nach beag air ionmhas poblach sna
beagan bhliadhnaichean romhainn agus thig co-dhùnaidhean doirbh air Riaghaltas
na h-Alba air mar a bheir e prìomhachas an dà chuid do thogail teachd a-steach
agus do chaiteachas.
“Bidh prìomhachas a thaobh poileasaidh a tha
cuimseach is seasmhach a dhìth thairis air grunnan bhliadhnaichean gus
cinneasachd a mheudachadh agus aghaidh a chur air crìonadh an t-sluaigh againn
aig aois a’ chosnaidh agus fàs a thoirt air eaconamaidh na h-Alba.
“Tha sinn den bheachd gu bheil argamaid làidir ann
nach eil na crìochan ri cumhachdan Riaghaltas na h-Alba gus goireasan a
ghabhail air iasad mòr gu leòr.
“Tha sinn cuideachd den bheachd gum faodar barrachd
bhuannachdan eaconamach is sòisealtasach a thoirt à prìomhachas do cheuman ann
an cosg casgach – biodh e gus an àrainneachd no slàinte na dùthcha a dhìon.
“Tha an t-ath-bhreithneachadh air cosg air goireasan
na chothrom ceuman dàna a thoirt a-steach gus am feum as fheàrr a thoirt à
goireasan agus eaconamaidh a tha stèidhichte air sunnd a chruthachadh.
“Cuspair a tha a’ nochdadh uair is uair san aithisg
seo is e am feum a tha ann dòighean-dèiligidh nas seasmhaiche mu phoileasaidh,
maoineachadh thairis air iomadh bliadhna agus seasmhachd fhiosgail nas fheàrr
ma tha Riaghaltas na h-Alba ri freagairt èifeachdach a thoirt air na dùbhlain
leantainneach de chrìonadh sluagh na h-Alba, atharrachadh na gnàth-shìde agus
neo-ionannachd a lùghdachadh.”
Tha
a’ Chomataidh ag iarraidh air Riaghaltas na h-Alba nochdadh ann am Buidseat na
h-Alba 2022-23 agus san Ro-innleachd Ionmhasail san Ùine Mheadhanaich mar a tha
e san amharc aige an eaconamaidh a rianachd gus a chuid gheallaidhean mu neoni
lom a thoirt gu buil ro 2045, ceist ris am bi i a’ tilleadh ann an ùine gun a
bhith fada.
Ann an àite eile san aithisg, tha a’ Chomataidh a’
moladh gun tèid Frèam Riaghaltas na h-Alba mu Choileanadh Nàiseanta
ath-shuidheachadh aig cridhe an riaghaltais agus a cheangal nas dlùithe ri
dealbhadh bhuidseatan agus prìomhachasan mu chosg. Tha i cuideachd ag iarraidh
air Riaghaltasan na RA agus na h-Alba mar chuid den ath-bhreithneachadh air an
Frèam Fhiosgail a tha air fàire beachd a ghabhail air:
- Mar a ghabhas leasachadh toirt air conaltradh agus follaiseachd
- Neartachadh an Fhrèama gus gnothach a ghabhail ri clisgidhean a thaobh
slàinte no eaconamach san ùine air thoiseach a dh’fhaodadh buaidh mhì-chuimseach
a thoirt air Alba
- Dearbhachd barrachd sùbailteachd airson Riaghaltas na h-Alba gus
buidseatan a thoirt air adhart agus a rianachd thar nam bliadhnaichean, ag
ionnsachadh bho àm a’ ghalair.
Leugh an aithisg
shlàn:
Faodaidh
tu aithisg na Comataidh a leughadh an seo: Sgrùdadh
ro bhuidseat 2022-23: Ionmhas poblach na h-Alba agus buaidh Covid-19
Fiosrachadh nam Meadhanan:
Eric MacLeod
Oifis Chonaltraidh na
Pàrlamaid