02.11.2021
Feumaidh Riaghaltas na h-Alba am
buidseat aca a chleachdadh airson teachd-a-steach phàrantan a dhèanamh
seasmhach gus cuideachadh a dh’ionnsaigh na targaidean bochdainn cloinne aca a
ruighinn, a rèir litir a chuir Comataidh Ceartas Sòisealta agus Tèarainteachd
Shòisealta Pàrlamaid na h-Alba a-mach an-diugh.
Tha a’ Chomataidh air na h-àrd phrìomhachasan aca innse a chaidh aontachadh gu
h-aona-ghuthach airson Buidseat na h-Alba 2022-2023, agus iad ag amas air
dèiligeadh ri bochdainn cloinne.
Tha a’ Chomataidh den bheachd gum bi cuimseachadh air teachd-a-steach phàrantan
na chuideachadh do theaghlaichean a tha a' fulang lùghdachadh ann an
teachd-a-steach na dachaigh leis mar a tha prìsean ag èirigh agus Riaghaltas na
RA a’ cur stad air ceumannan taic COVID-19, leithid an àrdachaidh £20 air
creideas coitcheann.
Tha litir na Comataidh gu Shona Robison BPA, Rùnaire a’ Chaibineit airson
Ceartas Sòisealta, Taigheadas agus Riaghaltas Ionadail, a’ nochdadh trì
pàirtean de bhith a’ dèanamh seo:
• dùblachadh Pàigheadh Pàiste na h-Alba cho luath ’s a ghabhas
• leasachadh ruigsinneachd air cùram-cloinne
• toirt tuilleadh taic cosnaidh seachad
A’ bruidhinn mar a chaidh an litir a sgaoileadh, thuirt Neach-gairm na
Comataidh, Niall Gray BPA:
“Bha cuideachadh phàrantan leis
an ionmhas aca na phrìomh chuspair san fhianais a chuala a’ Chomataidh.
“Ged a tha leudachadh anabarrach mòr air a bhith ann an solar cùram-cloinne
an-asgaidh le Riaghaltas na h-Alba tha sinn airson prìomhachas air barrachd
leudachaidh fhaicinn sa bhuidseat seo. Tha sinn gu sònraichte mothachail gu
bheil dùbhlain ro bhoireannaich agus daoine le ciorram a’ lorg deagh chothroman
cosnaidh agus cùram-cloinne iomchaidh.
“Tha sinn toilichte gu bheil Riaghaltas na h-Alba air a ràdh gum bu mhath
leotha dèiligeadh ri cuid de na cùisean sin. Ach, leis an èiginn sa bheil cuid
de theaghlaichean air sgàth gun deach an t-Àrdachadh ann an Creideas Coitcheann
a thoirt air falbh, bu mhath leinn gum biodh iad a’ mìneachadh nam planaichean
aca gu mionaideach ann am buidseat na bliadhna sa.”
Chuala a’ Chomataidh mòran taic airson a bhith a' dùblachadh Pàigheadh Pàiste
na h-Alba cho luath ’s a ghabhas. Mhìnich buidhnean a thug fianais don
Chomataidh gum biodh pàirt air leth cudromach aig seo ann a bhith a’
cuideachadh Riaghaltas na h-Alba a dh’ionnsaigh nan targaidean bochdainn
cloinne aca.
Tha litir na Comataidh cuideachd a’ cur cuideam air cùram-cloinne nas fheàrr a
chuidicheas daoine gus tòiseachadh ag obair. San fhianais aca, dh’aithris One Parent Family Scotland briathran
pàrant a thug geàrr-chunntas air na duilgheadasan a tha aig pàrantan a tha ag
obair:
“Tha cosgaisean cùram-cloinne sgriosail àrd – bha mise a-riamh a’ saoilsinn gur
e tuarastal reusanta a bha mi a' faighinn, ach tha e a’ cosg barrachd na tha mi
a’ cosnadh gus mo dhithis cloinne a chur don sgoil-àraich airson dìreach 3
latha san t-seachdain.”
Thog a’ Chomataidh draghan cuideachd mu sheasmhachd cheumannan an aghaidh
bochdainn agus a’ bhuidseat tèarainteachd shòisealta san fhad-ùine. Anns an
litir, tha iad ag iarraidh air roinnean Riaghaltais a bhith ag obair còmhla gus
an t-uallach fad-ùine a dh’fhaodadh a bhith ann air buidseat tèarainteachd
shòisealta a lùghdachadh.
Cùl-fhiosrachadh
Tha an litir shlàn a tha ceangailte fo bhacadh gu Diluain 1 Samhain.
Gheibhear an fhianais bho One Parent
Family Scotland ann an Aithisg Oifigeil na Pàrlamaid airson na Comataidh Ceartas
Sòisealta agus Tèarainteachd Shòisealta air 7 Dàmhair 2021, aig Colbh 12
Bidh Buidheann Chorporra Pàrlamaid na h-Alba a’ làimhseachadh dàta
luchd-naidheachd gu tèarainte gus aithris air obair Pàrlamaid na h-Alba a
dhèanamh comasach, a rèir riatanasan dìon dàta làithreach. Tha a’ chòir agad dì-chlàradh aig àm sam
bith. Airson tuilleadh fiosrachaidh faic ar Sanas
Prìobhaideachd.
Fiosrachadh Mheadhanan
Tom Malone
Fàilte ro ghairmean Text Relay
Tom.Malone@parliament.scot
Fiosrachadh
poblach
• Loidhne-fòn
airson cheistean: 0800 092 7500 no 0131 348 5395 (Gàidhlig)
• sp.info@parliament.scot
• Teacsa 07786 209 888
• Cuir ceist tro live chat
• Cuiridh sinn cuideachd fàilte ro ghairmean tron t-seirbheis Text Relay
no ann an Cànan Soidhnidh Bhreatainn tro contactSCOTLAND-BSL
Faodaidh
tu ar leantainn cuideachd air twitter @scotparl,
like a
dhèanamh oirnn air Facebook airson
na naidheachd agus nan tachartasan as ùire,
no
tuilleadh fhaighinn a-mach air YouTube