29.09.2020
Tha Comataidh aig Taigh an Ròid air
pannal eòlaichean fiosgail, eaconamach is bun-reachdail a stèidheachadh.
Thathar air iarraidh air na prìomh dhùbhlanan a thaobh sgrùdaidh a dh’èireas
ann an roinn an Ionmhais agus Bun-reachd sa chòig bliadhna air thoiseach aig
Pàrlamaid na h-Alba a shònrachadh.
Tha Comataidh Ionmhais agus Bun-reachd na Pàrlamaid a’
cumail rannsachadh mun chuspair a chuidicheas a’ chomataidh a thig na dèidh a
gheibh mar dhìleab dùbhlanan eaconamach is poilitigeach.
Tha raon-ùghdarrais an rannsachaidh ag aithneachadh gu
bheil sgaoileadh-cumhachd a’ fàs nas toinnte is nas toinnte. Gabhaidh na
h-eòlaichean beachd air buaidh uile na cumhachdan a thaobh cìse a fhuair Alba o
chionn ghoirid, air an fhrèam fhiosgail agus air an atharrachadh bhun-reachdail
a bheir Brexit leis. Thèid a h-uile gin dhiubh seo a shuidheachadh a rèir
buaidh eaconamach Covid 19.
Thuirt Neach-gairm Comataidh Ionmhais agus Bun-reachd
Brus MacCreamhain BPA:
“Biodh sinn a’ socrachadh bhuidseatan no ris a’
bhun-reachd, is e an obair a tha againn riaghaltas an latha a sgrùdadh is a
cheasnachadh. Agus bidh an dleastanas sin nas toinnte agus nas toinnte san ath
Phàrlamaid.
“Cha bhi e soirbh a bhith a’ feuchainn ri poileasaidhean
is coileanadh an riaghaltais a mheas nuair a tha troimh-a-chèile eaconamach
agus atharrachadh bun-reachdail nach fhacas an leithid riamh roimhe ann.
“Tha sinn air cuireadh a thoirt uime sin do phannal
eòlaichean gus an cuid fiosrachaidh a thairgse air far am bi na prìomh dhùbhlanan
a thaobh sgrùdaidh air ionmhas is bun-reachd. Cuidichidh an obair aca gus cruth
a chur air a’ phàipear againn a bheir sinn mar dhìleab don fheadhainn nar
dèidh.
“Chan eil an obair seo soirbh agus tha mi an comain nan
eòlaichean gu lèir againn airson an cuid ùine is fiosrachaidh a thoirt gu
fialaidh dhuinn.”
Tha raon-ùghdarrais rannsachadh na
comataidh mar a leanas:
“Mar a dh’fhàsas
sgaoileadh-cumhachd nas toinnte agus nas toinnte, dè na prìomh dhùbhlanan a thaobh sgrùdaidh a thig
air Comataidh Ionmhais agus Bun-reachd sam bith san ath Phàrlamaid agus ciamar
a bu chòir dhi fàs gus aghaidh a chur air na dùbhlanan sin.”
Mar a’ chiad cheum, chruthaich a’
chomataidh pannal air am bi eòlaichean air an taobh a-muigh cho math ris an
luchd-chomhairle a tha aig a’ chomataidh an-dràsta.
Gabhaidh pannal nan eòlaichean beachd
air:
·
Sgaoileadh
barrachd chumhachdan tro Achd na h-Alba 2016, an dèidh molaidhean Coimisean
Mhic a’ Ghobhainn.
·
Obrachadh
Frèam Fiosgail Riaghaltas na RA/na h-Alba a’ gabhail a-steach freagairt air COVID-19.
·
A’
bhuaidh bhun-reachdail a bheir Brexit air sgaoileadh-cumhachd.
Bidh cothrom aig a’ Chomataidh an uair
sin beachd a ghabhail air toraidhean bhon phannal gus cuideachadh ris a’
phàipear-dhìleib aice. Tha dùil gun tèid aithisg a’ phannail fhoillseachadh
leis a’ phàipear-dhìleib mu dheireadh as t-Earrach 2021.
Is iad buill a’ phannail, a rèir òrdugh na h-aibidile:
·
Charlotte
Barbour, Stiùiriche Cìse, ICAS
·
Dùghlas
Friseal, Deasaiche Gnìomhachais agus Eaconamaidh, BBC na h-Alba
·
An
t-Àrd-ollamh Mìcheal Keating, Ionad Atharrachaidhean Bun-reachdail
·
An
t-Àrd-ollamh Seumas Mitchell, Oilthigh Dhùn Èideann
·
Christine O’Neill, Neach-tagraidh, Cathraiche,
Brodies LLP
·
Màiri
Spowage, Iar-stiùiriche, Institiuid Fhriseil Alandair
·
Mark
Taylor, Stiùiriche Sgrùdaidh, Sgrùdadh Alba
·
An
t-Oll. Hannah White, Iar-stiùiriche, Institiuid an Riaghlaidh.
Còmhla riutha bidh an t-Àrd-ollamh Tom
Mullen, an t-Àrd-ollamh Coinneach Armstrong agus Dàibhidh Phillips a tha nan
luchd-comhairle don Chomataidh. Bidh an t-Oll. Seumas MacIain, Clàrc na
Comataidh, sa chathair air a’ bhuidhinn. Cumaidh oifigearan bhon Phàrlamaid
taic ris a’ Bhuidhinn.
Gheibhear barrachd fiosrachaidh
mu Chomataidh Ionmhais agus Bun-reachd an
seo.
Neach nam Meadhanan
Eric MacLeòid