Bidh a’ Chomataidh Eaconamaidh Dùthchail agus Ceangalachd a’ sireadh bheachdan air Plana nan Eilean a tha san amharc

10.10.2019

Tha Comataidh Eaconamaidh Dùthchail agus Ceangalachd Pàrlamaid na h-Alba (REC) a’ sireadh bheachdan bho eileanaich mu na prìomhachasan a tha air am mìneachadh ann am Plana Nàiseanta nan Eilean a tha Riaghaltas na h-Alba a’ moladh.

Tha a’ Chomataidh an-diugh a’ cur air bhog gairm bheachdan, a tha cuideachd ag iarraidh bheachdan bho ùghdarrasan ionadail agus feadhainn eile le ùidh ann an coimhearsnachdan eileanach, gus taic fiosrachaidh a chur ris an sgrùdadh aca air an dreachd Phlana. 

An-dràsta, tha am Plana a’ mìneachadh 13 amasan ro-innleachdail a tha ag amas air cùisean a leasachadh airson coimhearsnachdan eileanach.

Tha na h-amasan sin a’ toirt a-steach ceumannan gus dèiligeadh ri crìonadh sluaigh, piseach is adhartachadh a thoirt air leasachadh eaconamach seasmhach, agus seirbheisean taigheadais is còmhdhail a leasachadh, cho math ri ceanglaichean didseatach a leudachadh.

Anns an Aithisg Ìre 1 aca air Bile nan Eilean (Alba), thuirt a’ Chomataidh Eaconamaidh Dùthchail agus Ceangalachd gu robh iad an dùil gum biodh am Plana “a’ stèidheachadh slighe ro-innleachdail shoilleir agus dòighean lìbhrigidh practaigeach”. 

A’ bruidhinn nuair a chaidh an gairm bheachdan a chuir air bhog, thuirt Neach-gairm na Comataidh, Eideard Mountain BPA: 

“B’ e aon de phrìomh mholaidhean na h-aithisg againn air Bile nan Eilean gum feum Riaghaltas na h-Alba dèanamh cinnteach gu bheil na raointean prìomhachais a tha ann am Plana Nàiseanta nan Eilean a’ nochdadh fìor phrìomhachasan muinntir nan eilean.

“Air an adhbhar sin, tha an gairm bheachdan seo a’ toirt cothrom do dh'eileanaich am beachdan a thoirt seachad air na h-amasan a tha air an comharrachadh san dreachd Phlana.

“Tha ùine chuibhrichte aig a’ Chomataidh airson beachdachadh air a’ Phlana a tha san amharc. Mar sin tha e deatamach gun cluinn sinn raon cho farsaing ’s a ghabhas de bheachdan gus an urrainn dhuinn breithneachadh cothromach a dhèanamh air molaidhean Riaghaltas na h-Alba.”

Is iad amasan eile a’ Phlana, a tha ga leasachadh mar phàirt de thoirt gu buil Bile nan Eilean (Alba) 2018, slàinte is sunnd agus foghlam a leasachadh agus adhartachadh, taic a thoirt do na h-ealain, cultar is cànan, agus cumhachd a thoirt do choimhearsnachdan eadar-mheasgte.

Tha am Plana cuideachd ag amas air mathas àrainneachd a leasachadh agus adhartachadh, agus dèiligeadh ri bith-shàbhailteachd, agus dèanamh cinnteach gu bheil eileanan na h-Alba air thùs a’ dèiligeadh ri atharrachadh clìomaid.

Thuirt an Neach-gairm cuideachd:

“Tha a’ Chomataidh seo a’ toirt taic do chumhachdachadh choimhearsnachdan eileanach agus co-dhùnaidhean ionadail, agus bheir beachdan eileanach buaidh air na molaidhean againn do Riaghaltas na h-Alba a thaobh ullachadh a’ Phlana dheireannaich. ”

Gheibhear tuilleadh fiosrachaidh air-loidhne aig http://www.parliament.scot/rural-economy-committee

Cùl-fhiosrachadh

Ceangal do Phlana Nàiseanta nan Eilean a tha ga mholadh

Ceangal do gheàrr-chunntas Gàidhlig den Phlana Nàiseanta a tha ga mholadh.

Feumaidh a’ Chomataidh, a rèir cumhaichean Achd nan Eilean (Alba), beachdachadh air a’ Phlana a tha ga mholadh agus beachdan a thoirt air ais taobh a-staigh 40 latha. Tha an gairm bheachdan fosgailte gu 31 Dàmhair 2019. 

Bidh Buidheann Chorporra Pàrlamaid na h-Alba a’ làimhseachadh dàta luchd-naidheachd gu tèarainte gus aithris air obair Pàrlamaid na h-Alba a dhèanamh comasach, a rèir riatanasan dìon dàta làithreach. Tha a’ chòir agad dì-chlàradh aig àm sam bith. Airson tuilleadh fiosrachaidh, faic ar Sanas Prìobhaideachd.