02.07.2019
Bu chòir do cheannardan gnìomhachais ‘uallach a ghabhail orra fhèin’ ann an dèiligeadh ri
dùbhlain fhad-ùine anns a’ ghnìomhachas togail, tha BPA air a’ Chomataidh
Eaconamaidh, Lùth agus Obair Chothromach ag ràdh an-diugh. Tha a’ ghairm a’
tighinn mar thoradh air rannsachadh na Comataidh a thaobh roinn togail na
h-Alba.
Anns an rannsachadh aca, dh’fheuch a’ Chomataidh ri tuigse fhaighinn air
feartan agus dùbhlain togail ann an Alba. Tha an roinn togail a’ toirt cosnadh
do 147,000 neach ann an Alba agus tha iomadachd de ghnìomhachasan agus
toraidhean na lùib, a tha air cur ris na dùbhlain fhad-ùine a chaidh a
mhìneachadh san aithisg a chaidh fhoillseachadh an-diugh.
Thog a’ Chomataidh
grunn chuspairean anns an aithisg aca, nam measg:
•
Tha e riatanach gum bi luach fad-ùine na phrìomh
amas aig solar poblach seach a’ chosgais as ìsle. Feumaidh Riaghaltas na h-Alba
beachdachadh air mar as urrainn taic nas fheàrr a thoirt do ùghdarrasan poblach
agus gnìomhachasan gus seo a thoirt gu buil.
•
Le luchd-obrach a tha a’ fàs nas sine, gainnead
sgilean agus dìth iomadachd anns an luchd-obrach togail, tha luach ann a bhith
a’ beachdachadh air dòigh-obrach a dh’aon ghnothach airson an raoin a thaobh fhrèamaichean
preantasachd.
•
Chan eil ach 12% den luchd-obrach togail boireann.
Feumar barrachd a dhèanamh gus iomadachd a bhrosnachadh agus mothachadh a
thogail mun raon fharsaing de dhreuchdan a tha rim faotainn taobh a-staigh a’
ghnìomhachais.
•
Uaireannan, thèid innleachdas agus saothrachadh
taobh a-muigh na làraich a bhacadh le riaghailtean dealbhaidh agus ain-deòin a
bhith ag atharrachadh. Tha teicneòlas ùr deatamach airson cinneasachd san roinn
a leasachadh.
·
Tha e doirbh do ghnìomhachasan togail de gach meud
ionmhas fhaighinn, rud a dh'fhaodadh bacadh a chur air fàs.
A’ bruidhinn
nuair a chaidh an aithisg fhoillseachadh, thuirt Neach-gairm na Comataidh,
Gordon Lindhurst BPA:
“Tha luach ga
chur air a’ ghnìomhachas togail ann an Alba agus tha àite cudromach aige san
eaconamaidh, ach tha dùbhlain leantainneach ann a tha sinn air a mhìneachadh
san aithisg seo.
“Is iad
fàilligeadh a bhith ag amas air luach san ùine-fhada seach dìreach air a’
chosgais as ìsle, agus dìth ionmhais, cuid de na cnapan-starra a tha a’ cur
bacadh air cinneasachd sa ghnìomhachas. Ged a chunnaic sinn eisimpleirean de
dheagh chleachdadh bha dìth atharrachaidh ri fhaicinn san fharsaingeachd.”
“Ma tha an
roinn gu bhith a’ ruigsinn àirde comais agus dol a bhith uidheamaichte gus
aghaidh a chur ris na dùbhlain sin, feumaidh Riaghaltas na h-Alba obair còmhla
ri gnìomhachas gus atharrachadh thar na roinne air fad thoirt gu buil.”
Lean Mgr
Lindhurst air:
“B’ e seo a’
chiad turas a rinn a’ Chomataidh rannsachadh a’ coimhead air roinn iomlan agus
mar a tha e a’ cur ris an eaconamaidh.
“Is ann
a-mhàin le ceannas, co-obrachadh agus atharrachadh cultarail air feadh na
roinne a bhios an gnìomhachas togail comasach air na cleachdaidhean as fheàrr a
cho-roinn, aghaidh a chur ris na dùbhlain sin agus làn chomas a choileanadh ann
a bhith a’ cur ri eaconamaidh na h-Alba.”