06.12.2016
Thèid
na trioblaidean maoineachaidh susbainteach a tha a’ cur air Seirbheis na
Slàinte Thaobh Tatha a rannsachadh le Comataidh
Sgrùdadh Poblach is Iar-sgrùdadh Reachdas Pàrlamaid na h-Alba nuair a choinnicheas i ann
an Dùn Dè an t-seachdain sa tighinn (15 Dùbhlachd).
Ceasnaichidh
a’ Chomataidh àrd-mhanaidsearan a’ Bhùird mu aithisg a thàinig o chionn ghoirid
bho Bhuidheann-sgrùdaidh na h-Alba a tha a’ sealltainn gu bheil feum air còrr
is £58 millean de shàbhalaidhean anns a’ bhliadhna ionmhasail seo. Tha am Bòrd mar-thà
air còrr is £24 millean de thaic maoineachais (air a bheil ‘brokerage’ mar
ainm) fhaighinn bho Riaghaltas na h-Alba, gus na cunntasan aca a rèiteach, agus
tha cunnart mòr ann gu feum am Bòrd tuilleadh brokerage am bliadhna.
Gabhaidh
a’ Chomataidh cuideachd fianais bho ghrunn bhuidhnean euslainteach ionadail,
agus riochdairean luchd-obrach Sheirbheis na Slàinte Thaobh Tatha, gus tuigsinn
bheachdan muinntir na sgìre air a’ bhòrd slàinte.
Thuirt
Neach-gairm na Comataidh, Jenny Marra BPA:
“Chan eil
teagamh sam bith nach eil Seirbheis na Slàinte Thaobh Tatha ann am fìor staing.
Tha aithisg Bhuidheann-sgrùdaidh na h-Alba dha-rìribh na adhbhar iomagain, agus
feumaidh sinn freagairtean fhaighinn air buaidh thrioblaidean maoineachaidh
Sheirbheis na Slàinte Thaobh Tatha air na seirbheisean a tha iad a’ lìbhrigeadh.
“Le bhith
a’ cumail na coinneimh seo ann an Dùn Dè, cluinnidh an fheadhainn as motha a
dh’fhairicheas buaidh nan trioblaidean seo bhon bhòrd slàinte aca gu dìreach.
Cluinnidh sinn cuideachd bho euslaintich agus luchd-obrach Sheirbheis na
Slàinte Thaobh Tatha mu mar a tha a’ dol dhaibh, mus ceasnaich sinn
àrd-mhanaidsearan.”
Tachraidh
a’ choinneamh Comataidh aig 9.00 m Diardaoin 15 Dùbhlachd aig Seòmraichean a’
Bhaile, Dùn Dè. Tha i fosgailte don phoball agus AN ASGAIDH. Tha cuid de thiogaidean ann don phoball agus
feumar an clàradh ro-làimh air 0131 348 5200.
Cùl-fhiosrachadh
Chaidh
aithisg Bhuidheann-sgrùdaidh na h-Alba, The 2015/16 audit of
NHS Tayside: Financial sustainability, fhoillseachadh air 6 Dàmhair 2016.
Ghabh a’
Chomataidh fianais air an aithisg bhon Àrd-neach Sgrùdaidh aig a’ choinneimh aice air 3 Samhain far an tuirt i gu bheil Seirbheis na Slàinte Thaobh Tatha ann an
suidheachadh “air leth dona” agus gu robh “cunnart mòr ann nach coilean am Bòrd
am plana ionmhasail aca airson 2016-17 agus ann am bliadhnaichean às dèidh sin”.
Gheibhear Aithisg Oifigeil na coinneimh sin an seo.