16.12.2015
Tha Comataidh Fèin-riaghlaidh (Cumhachdan A Bharrachd) ann an Taigh an Ròid gu bhith, tràth sa bhliadhna ùir, a’ sgrùdadh dè a’ bhuaidh a dh’fhaodadh tighinn bhon Bhile Aonaidhean Ciùird, a chaidh a thoirt a-steach le Riaghaltas na Rìoghachd Aonaichte.
Gairmear air eòlaichean bho na h-aonaidhean-ciùird, buidhnean sa raon phoblach agus buidhnean nam fastaichean gus fianais a thoirt air dè an èifeachd a dh’fhaodadh a bhith aig a’ Bhile air caidreabh gnìomhachais is seirbheisean poblach ann an Alba.
Bidh an seisean-fianais air 7 Faoilleach, an aon fhear air a’ chuspair, na bhunait airson aithisg èiginneach bhon Chomataidh.
Thathar an dùil gum bi an làn Phàrlamaid a’ deasbad na h-aithisg mar dhòigh anns am faod Taigh an Ròid a bheachdan a dhèanamh soilleir air a’ bhuaidh a dh’fhaodadh tighinn bhon Bhile airson Alba.
Thuirt Neach-gairm Comataidh Fèin-riaghlaidh (Cumhachdan A Bharrachd) Brus Crawford BPA:
“Tha Bile Aonaidhean Ciùird bho Riaghaltas na Rìoghachd Aonaichte na adhbhar iomagain airson na Comataidh. Leis a’ Bhile cheana air a shlighe tro Westminster, tha sinn ag iarraidh a chluinntinn gu grad bho aonaidhean-ciùird agus buidhnean nam fastaichean air dè a’ bhuaidh a dh’fhaodas tighinn bhon reachdas seo ann an Alba, nan cuireadh an gnìomh anns a’ chruth sa bheil e an-dràsta.
“Tha sinn ag iarraidh gu h-àraid a bhith a’ sgrùdadh dè a’ bhuaidh a dh’fhaodadh a bhith air luchd-obrach san raon phoblach agus air na fastaichean aca.”
Thuirt Mgr Crawford:
“Tha sinn ag amas air aithisg a dhèanamh tràth anns an Fhaoilleach a dh’fhaodas a bhith air a dheasbad anns an làn Phàrlamaid. Anns an dòigh sin, faodaidh Taigh an Ròid beachd cnuasaichte a dhèanamh soilleir do Riaghaltas na Rìoghachd Aonaichte mus gabh am Bile ceum cudromach eile tron Phàrlamaid Westminster.
Tha Comataidh Fèin-riaghlaidh air co-dhùnadh gun toir iad sùil air a’ Mheòrachan Poileasaidh air Bile Aonaidhean Ciùird, a chaidh fhoillsicheadh o chionn ghoirid le Riaghaltas na h-Alba.
Foillsichear ann an ùine nach bi fada an liosta iomlan de luchd-fianais a nochdas air beulaibh na Comataidh air 7 Faoilleach.