04.12.2015
Feumaidh
pàirtean cudromach den Bhile Ath-leasachadh Fearainn aig Riaghaltas na h-Alba a
bhith air an daingneachadh, ma tha àrd-amasan radaigeach a’ Bhile gu bhith air
an lìbhrigeadh, a rèir aithisg bho Chomataidh Cùisean Dùthchail, Atharrachadh
Clìomaid agus an Àrainneachd (a’ Chomataidh RACCE).
Tha a’ Chomataidh a’ cur cuideam air
sreath de chuspairean anns an aithisg aca air Bile Ath-leasachadh Fearainn
(Alba), nam measg:
- Feumaidh
am Bile a ràdh gu soilleir gur e so-mhaoin nàiseanta a tha ann am fearann agus gu bheil e ann
airson leas a’ phobaill uile ann an Alba, agus feumaidh gu bheil am Bile
air a chur an gnìomh gu soilleir agus gu daingeann ann an co-theacsa de
dhleastanasan eadar-nàiseanta a thaobh chòraichean daonna.
- Tha
feum air atharrachaidhean ris an dreachd den reachdas, gus barrachd
trìd-shoilleireachd a thoirt gu buil a thaobh cò aige a bheil fearann, cò
aige a bheil smachd air agus cò tha a’ faighinn buannachd às, agus tha a’
Chomataidh a’ toirt mholaidhean air mar a dh’fhaodas sin a bhith air a
choileanadh.
- Is
fheudar gu bheil ceumannan air an gabhail gu bhith a’ mìneachadh nas
èifeachdaiche carson a tha am Bile a’ solarachadh gum feum conaltradh a
bhith ann eadar uachdarain, manaidsearan fearainn agus coimhearsnachdan,
air chor ’s gun dèanar cinnteach nach bi pàrtaidh sam bith a’ toirt cluais
bhodhar don stiùireadh air conaltradh agus gum bi a h-uile duine eòlach
gum faod peanasan a bhith air an leagail mura bheil daoine a’ leantainn
ris an stiùireadh.
- Tha
a’ Chomataidh a’ cur fàilte air “còir ri cheannach gus leasachadh
seasmhach a thoirt air adhart”, a tha am Bile a’ moladh mar chòir ùr
airson choimhearsnachdan, ach tha a’ Chomataidh ag iarraidh air an
Riaghaltas a dh’ath-bheachdachadh air na tha riatanach fon Bhile gus a’
chòir seo a chleachdadh, air eagal ’s gu bheil na deuchainnean cho àrd is
nach tèid aig coimhearsnachdan air na solaran seo a chur gu feum.
- Tha
a’ Chomataidh a’ gairm gum bu chòir don ath-bhreithneachadh air stiùireadh
fèidh, a bhathar an dùil gu bhith ann co-dhiù, a bhith air a thoirt air
adhart agus a thighinn gu co-dhùnadh nas luaithe, air chor ’s gun tèid aig
Riaghltas na h-Alba na co-dhùnaidhean a chur an gnìomh aig deireadh 2016.
- Tha
iomagain throm aig a’ Chomataidh mu dheidhinn an dìth fiosrachaidh
mionaidich a thaobh reataichean gnothachais, a bhios air an ath-thoirt
a-steach airson ionadan-urchaireachd agus frìthean. Tha a’ Chomataidh a’
gairm air Riaghaltas na h-Alba a thoirt, cho luath ’s a ghabhas agus gu
deimhinn ro thoiseach Ìre 2, mion-sgrùdadh domhainn, susbainteach agus
stèidhichte air fianais, a tha a’ sealltainn dè na buaidhean a thig bho
bhith toirt gu crìch an saoradh bhon chìs airson oighreachdan spòrs, ma
tha a’ Chomataidh gu bhith ann an suidheachadh far an toir iad taic don
phàirt seo den Bhile.
- A
thaobh seilbh-àiteachais, tha a’ Chomataidh a’ ceasnachadh an tèid aig a’
Bhile a bhith a’ lìbhrigeadh air na h-amasan aige: is iad sin gum bi an
uiread de dh’fhearann airson màl air a chumail mar a tha e no air a
mheudachadh; gum bi còraichean a’ mhàl-shealbhadair air an daingneachadh
air chor ’s gum bi e nas fhasa dha a bhith a’ cur a chuid airgid a-steach
anns a’ ghabhaltas aige; agus gun dìonar còraichean an uachdarain. *
- Tha
e cudromach gu bheil, an dèidh làn cho-comhairleachaidh, còd obrachaidh
reachdail airson bàillidhean oighreachdan air a leasachadh le Coimiseanair
nan Tuathanach Màil agus gu bheil an còd air a chur an gnìomh gu
pèingilteach.
- Tha
a’ Chomataidh a’ gairm air Riaghaltas na h-Alba a bheachdachadh air
roghainnean a dh’fhaodas a bhith a’ toirt dhaibhsan le gabhaltas fon Achd
1991 còir ri cheannach “ann an suidheachaidhean àraidh”.
Thuirt Neach-gairm Chomataidh
Cùisean Dùthchail, Atharrachadh Clìomaid agus an Àrainneachd Rob Gibson BPA:
“Tha a’ Chomataidh ag aontachadh le
amas an Riaghatais air ath-leasachadh radaigeach a lìbhrigeadh, agus tha sinn
a’ toirt taic do mhòran de na solaran agus do phrionnsabalan coitcheann a’
Bhile. Ach nar beachd-ne, tha barrachd obrach a dhìth air feadhainn de na
pàirtean ann an dreachd a’ Bhile an-dràsta, ma tha iad gu bhith a’ lìbhrigeadh
air na h-àrd-amasan aca.
“Tha feum air tuilleadh
smuaineachaidh no tuilleadh mìneachaidh air cuspairean cudromach, leithid:
trìd-shoilleireachd nas fheàrr air cò aige a bheil fearann, cò aige a bheil
smachd air agus cò tha a’ faighinn buannachd às; a’ dèanamh a’ phròiseis nas
cothromaiche agus nas trìd-shoilleire a thaobh ath-bhreithneachadh màil; agus
a’ cruthachadh àrainneachd nas fheàrr airson cur airgid a-steach ann an
seilbh-àiteachais, gach cuid le uachdarain agus le màl-shealbhadairean. Tha
sinn ag iarraidh barrachd fiosrachaidh ron deasbad Ìre 1 ann am Pàrlamaid na
h-Alba, air chor ’s gum faod a’
Chomataidh a bhith soilleir air na tha an dùil agus mar a dh’obraicheas e.”
Lean Mgr Gibson air:
“Tha am Bile air deasbad mòr
adhbharachadh air feadh Alba air fearann agus air na tha e a’ ciallachadh
airson na dùthcha.
“Tha e
cudromach, mar a tha am Bile a’ dol air adhart tron phròiseas phàrlamaideach,
gu bheil buill bho gach pàrtaidh anns an t-seòmar, an co-bhoinn ris a’
Chomataidh agus ris an Riaghaltas, ag obair gus na h-àrd-amasan a lìbhrigeadh,
a bharrachd air an t-soilleireachd, a tha a’ chuid as motha ann an Alba ag
iarraidh fhaicinn.”
Cùl-fhiosrachadh
* Chan eil Ailig MacFhearghais BPA, le
cead bhon Chomataidh, ag aontachadh leis na tha a’ Chomataidh ag ràdh air
seilbh-àiteachais no leis a’ chòir ri cheannach a tha am Bile a’ toirt do
choimhearsnachdan, agus tha na beachdan aige ri fhaotainn mar phàirt den
aithisg.
Chan eil Jim Hume
BPA, a-rithist le cead bhon Chomataidh, ag aontachadh leis an earrann anns a’
phàirt den Bhile air seilbh-àiteachais a tha a’ toirt còir ri cheannach
dhaibhsan a tha nam màl-shealbhadairean fon Achd 1991.
Tha aithisg Chomataidh Cùisean Dùthchail, Atharrachadh
Clìomaid agus an Àrainneachd (“a’ Chomataidh RACCE”) a’ sgrùdadh a’ Bhile
Ath-leasachadh Fearainn (Alba), a chaidh a thoirt a-steach le Riaghaltas na
h-Alba. Gheibhear aithisg na Comataidh RACCE tron cheangal seo bho 10m,
Dihaoine 4 Dùbhlan:
http://www.scottish.parliament.uk/parliamentarybusiness/CurrentCommittees/94538.aspx
Bidh Comataidh Cùisean Dùthchail,
Atharrachadh Clìomaid agus an Àrainneachd (a’ Chomataidh RACCE) a’ sgrùdadh
mholaidhean airson poileasaidhean a bhuineas ri cùisean dùthchail, atharrachadh
clìomaid agus an àrainneachd.
A bharrachd air seiseanan-fianais
foirmeil ann an Taigh an Ròid, bha a’ Chomataidh a’ sgrùdadh a’ Bhile Ath-leasachadh
Fearainn le tursan gu Arcaibh, an t-Eilean Sgiathanach, Ìle, Diùra, Fìobha agus
Crìochan na h-Alba. Ann an coinneamhan poblach, chuala a’ Chomataidh beachdan
agus barailean bho ghrunn bhuidhnean agus daoine, nam measg: luchd-seilbh
oighreachdan, geamairean, luchd-poileasaidh, tuathanaich màil, eòlaichean
àrainneachd agus buidhnean coimhearsnachd. A bharrachd air sin, anns an
t-seisean phàrlamaideach seo tha a’ Chomataidh air sgrùdadh a thoirt do
bhileachan air: seilbh-àiteachais; croitearachd; cumhachdachadh
choimhearsnachdan agus na h-atharrachaidhean ris a’ chòir ri cheannach; agus
gabhaltasan fada.
Leugh an Aithisg
Report on Land Reform (Scotland) Bill
Fios Conaltraidh
Fios do na Meadhanan
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: