23.09.2015
Thèid tachartas coimhearsnachd a chumail ann an Grianaig air 5 Dàmhair gus cothrom a thoirt do dhaoine a tha a’ fuireach agus ag obair ann an sgìre Inbhir Chluaidh bruidhinn ri Buill Pàrlamaid na h-Alba.
Tha a’ Chomataidh Riaghaltais Ionadail is Ath-bheothachaidh airson beachdan a chluinntinn bho dhaoine fa leth agus buidhnean coimhearsnachd ann an Inbhir Chluaidh a thaobh rudan a bheir buaidh air beatha làitheil dhaoine, rudan mar sheirbheisean poblach agus mar a tha iad air an lìbhrigeadh agus an diofar a rinn an t-ath-nuadhachadh, a chaidh a dhèanamh air sgìre Inbhir Chluaidh, air beatha nan daoine a tha fuireach agus ag obair an sin. Bidh iad cuideachd ag iarraidh beachdan a chluinntinn mu dheidhinn nan atharraichean a thathar a’ moladh airson Innealan Gheall le Gill Stèidhichte (Fixed Odds Betting Terminals) – a tha cuideachd leis an ainm innealan roulette le sgrìon air am faod thu buntainn – far am bi atharraichean air na riaghailtean air an son nuair a tha iad ann an ionadan-gheall ùghdarraichte.
Aig coinneamh na Comataidh, beachdaichidh a’ Chomataidh air mar a ghabhas maoinean peinnsein riaghaltais ionadail a chur gu feum gus airgead a chur an seilbh bun-structair. Brosnaichidh sin obair gus an sgìre ath-nuadhachadh agus thig buannachdan às cuideachd ma dh’fhaodte a chithear nuair a tha buidhnean neo-eisimeileach bhon taobh a-muigh (ALEOs) a’ lìbhrigeadh sheirbheisean poblach.
Bidh buill na Comataidh a’ tadhal air pròiseactan aig Riverside Inverclyde agus ionad chur-seachadan coimhearsnachd fo stiùir Cur-seachadan Inbhir Chluaidh (Inverclyde Leisure). Tha an dà bhuidheann seo nam buidheann neo-eisimeileach bhon taobh a-muigh agus bidh iad a’ toirt seachad fianais bheòil aig coinneamh na Comataidh.
Thuirt Neach-gairm na Comataidh, Caomhain Stiùbhairt BPA:
“Gach nì a nì sinn, ’s ann do dhaoine is na coimhearsnachdan aca a tha e. Tha sinn air a chur romhainn mar phrìomhachas gun tadhail sinn air daoine sna coimhearsnachdan aca fhèin gus cluinntinn mu chùisean a tha cudromach dhaibh. Sin an dearbh rud a tha fa-near dhuinn le bhith tadhal air Inbhir Chluaidh. Tha sinn airson cluinntinn mu chùisean a tha cudromach do dhaoine a tha a’ fuireach agus ag obair an sin.
“Tha atharraichean dha-rìribh air tighinn ri linn nan coinneamhan a tha air a bhith againn air feadh na dùthcha: atharraichean air reachdas mar an Achd airson Cumhachd do Choimhearsnachdan, agus a thaobh mar a ghabhas seirbheisean a lìbhrigeadh gus frithealadh air feuman nan daoine a tha gan cleachdadh. Tha sinn a’ coimhead air adhart ris an tachartas ann an Talla Bhaile Ghrianaig agus ri bhith cluinntinn bho dhaoine air mar a tha iad a’ toirt atharrachadh air cùisean.”
Cùl-fhiosrachadh
Thèid an tachartas coimhearsnachd a chumail aig 1.15f ann an Salùn Talla a’ Bhaile, Grianaig agus thèid coinneamh na Comataidh a chumail aig 2.30f ann an Seòmar Comhairle Inbhir Chluaidh.
Airson tiogaid an-asgaidh a ghleidheadh airson coinneamh na Comataidh, no airson àite a ghleidheadh aig an tachartas coimhearsnachd, cuir post-d gu: lgr.committee@scottish.parliament.uk no fòn gu 0131 348 5223.
Rannsachadh air innealan gheall le gill stèidhichte
Tha a’ Chomataidh air an rannsachadh aca a thòisicheadh air ìrean riaghlaidh airson innealan gheall le gill stèidhichte (FOBTs) ann an Alba. Mar phàirt de Bhile na h-Alba a tha dol tro Westminster an-dràsta, bidh cumhachdan aig Riaghaltas na h-Alba an àireamh de FOBTs a tha ceadaichte ann an ionadan-gheall ùr atharrachadh.
Gheibhear tuilleadh fiosrachaidh mun rannsachadh air duilleagan-lìn na Comataidh:
http://www.scottish.parliament.uk/parliamentarybusiness/CurrentCommittees/91126.aspx
Rannsachadh air buidhnean neo-eisimeileach bhon taobh a-muigh
Tha a’ Chomataidh a’ coimhead air cùisean co-cheangailte ri modhan-obrach aig buidhnean neo-eisimeileach bhon taobh a-muigh – ’s iad sin companaidhean air an stèidheachadh le ùghdarrasan ionadail gus feadhainn de dhleastanasan an ùghdarrais ionadail a choileanadh.