24.04.2015
An-diugh, tha Comataidh a’ Cheartais a’ toirt taic do phrionnsabail choitcheann a’ Bhile, a tha ag amas air an lagh eucorach a neartachadh an aghaidh trafaigeachd is gabhail-brath dhaoine agus a tha airson dèanamh cinnteach gum bi iadsan a dh’fhuiling bhon eucoir a’ faighinn cobhair iomchaidh sa bhad.
Chaidh Bile Trafaigeachd is Gabhail-Brath Dhaoine (Alba) a thoirt a-steach do Phàrlamaid na h-Alba air 11 Dùbhlachd 2014. Anns an aithisg Ìre 1 aca, a chaidh fhoillseachadh an-diugh, tha Comataidh a’ Cheartais a’ cur fàilte air amasan a’ Bhile, ach tha iad cuideachd a’ dèanamh grunn mholaidhean gus na h-ullachaidhean anns a’ Bhile a leasachadh mar a tha e a’ dol tron t-slighe phàrlamaidich aige.
Thuirt Neach-gairm na Comataidh Cairstìona Ghreumach BPA:
“Tha trafaigeachd is gabhail-brath dhaoine nam fìor dhroch eucoirean, a tha iom-fhillteach agus a tha a’ tachairt thar chrìochan dhùthchannan. Tha sinn a’ cur fàilte air na h-oidhirpean a rinn Riaghaltas na h-Alba ri a’ mhalairt mhì-laghail seo a chasg, dèanadairean na h-eucoire a chomharrachadh is a thoirt do cheartas agus cobhair a thoirt dhaibhsan a dh’fhuiling. Chan e a-mhàin iadsan a chaidh an trafaigeachd a-steach don dùthaich seo a tha a’ fulaing, ach tha seo na thrioblaid mhòr taobh a-staigh bailtean na dùthcha againn agus eatorra.
“Ged a tha sinn a’ toirt làn thaic do dh’amasan a’ Bhile, tha sinn air grunn mholaidhean a chur air adhart gus an eucoir singilte trafaigeachd a dhèanamh nas soilleire, an cobhair a thathar a’ toirt do dh’fhulangaichean a neartachadh agus an taic a bhios ri fhaotainn a dhèanamh nas soilleire, gu h-àraid far a bheil clann a’ fulang.
“A bharrachd air sin, ged a bheachdaich sinn anns na seiseanan-fianaise againn air am bu chòir dhuinn ceannachd feise a dhèanamh na eucoir, tha a’ Chomataidh soilleir nach eil am Bile seo iomchaidh mar uidheam a bhith a’ dèiligeadh ris a’ chùis cudromach sin, a dh’aindheoin nan argamaidean mu thimcheall.”
Cùl-fhiosrachadh
Gheibhear lethbhreac den aithisg aig http://www.scottish.parliament.uk/parliamentarybusiness/81842.aspx
Gheibhear barrachd fiosrachaidh air obair Comataidh a’ Cheartais aig: http://www.scottish.parliament.uk/parliamentarybusiness/CurrentCommittees/29845.aspx