07.04.2015
Tha SPCB air suidheachadh dithis oifigearan ùra a chur an cèill an dèidh eacarsaich fhosgailte fastaidh.
Tha na suidheachaidhean mar a leanas:
Buill de Choimisean Còraichean Daonna na h-Alba (SHRC) – Bmh. Susan Kemp agus Dr Alan Mitchell
Tòisichidh Bmh. Kemp agus Dr Mitchell ann an dreuchd mar bhuill phàirt-thìde den Choimisean air 1 Cèitean 2015. Mairidh na dreuchdan aca 6 bliadhna.
Bidh buill phàirt-thìde ag obair 24 latha an comhair na bliadhna agus gam pàigheadh aig ìre £257.57 san latha.
Tha Bmh. Kemp na neach-lagha le eòlas sònraichte air an lagh eadar-nàiseanta air eucoir agus còraichean daonna. O chionn sia bliadhna deug tha i air a bhith ag obair ann an Ameireagaidh a Deas, Afraga agus san Roinn Eòrpa, a' riochdachadh dhaoine a dh'fhuiling, a' sgrùdadh mì-ghnàthachadh chòraichean daonna agus a' toirt cuideachadh teicnigeach do luchd-casaid stàite. Bha Susan air Sgioba Eòlaichean nan Dùthchannan Aonaichte mu Riaghailt an Lagha agus Ainneart Gnèitheil ann an Strì fo Arm, fhad is a bha i ag obair aig Roinn Cumail na Sìthe ann an New York. Roimhe sin bha i na Neach-sgrùdaidh aig a' Chùirt Eucorach Eadar-nàiseanta sa Hague agus na comhairliche laghail do bhuidhnean ris a' chomann chatharra, Comhairle Luchd-tèarmainn na h-Alba, Impunity Watch agus an t-Ionad Eadar-nàiseanta airson Ceartas Eadar-amail nam measg.
Tha Dr Alan Mitchell air a bhith an sàs ann an Leigheas agus tha e na Stiùiriche Clionaigeach air Com-pàirteachas Slàinte is Cùram sa Choimhearsnachd ann an Siorrachd Rinn Friù an Ear an-dràsta. Tha a' chuid as motha den obair chlionaigich aig Ailean ann an Ionad Imrich Thaigh Dhùn Gabhail far a bheil e na dhotair-teaghlaich a' toirt sheirbheisean-leigheis don fheadhainn a tha gan cumail an lùib na h-imrich. Bha 2002, tha Ailean air a bhith an sàs mar eòlaiche ann an Comataidh Eòrpach airson Casg air Droch-làimhseachadh is Peanasachadh Tàmailteach agus bha e air caochladh chuairtean leis a' Chomataidh gu ionadan-gleidhidh thar nan 47 de stàit-bhallrachd aig Comhairle na h-Eòrpa.
Chaidh an Coimisean a stèidheachadh fo Achd Coimisean Còraichean Daonna na h-Alba 2006. Is e dleastanas coitcheann a' Choimisein còraichean daonna a chur air adhart agus, gu h-àraidh, deagh chleachdas mu chòraichean daonna a bhrosnachadh. Gheibhear barrachd fiosrachaidh mun Choimisean aig: http://www.scottishhumanrights.com/
Chaidh eacarsaich an fhastaidh a stiùireadh le neach-measaidh neo-eisimeileach.
Tha na buill ùra an àite nam ball a bhios a' fàgail, an t-Ollamh Kay Hampton agus Shelagh McCall, a tha air a bhith ann an dreuchd nan dithis bho chaidh an Coimisean a stèidheachadh ann an 2008.