26.02.2015
A’ brosnachadh barrachd dhaoine bhon a h-uile dòigh-beatha a bhith an
sàs anns a’ phròiseas phoilitigeach: sin am fòcas airson Pàrlamaid na h-Alba is
i a’ tadhal air Taigh Sear (Easterhouse) ann
an Glaschu air Diluain 16 Màrt aig an ionad ealain The Bridge air Rathad Westerhouse.
Tha Làithean na Pàrlamaid ag amas air a’ Phàrlamaid a thoirt a-mach à Dùn Èideann agus a-steach do choimhearsnachdan timcheall na h-Alba, a’ toirt misneachd do dhaoine ann an coimhearsnachdan ùidh a ghabhail anns a’ Phàrlamaid agus a bhith an sàs anns an obair a th’ aice.
’Se an t-Oifigear Riaghlaidh am Fìor Urr. Tricia Marwick BPA a thòisich Làithean na Pàrlamaid ann an 2012, agus tha i airson fòcas fiù ’s nas fheàrr a bhith air bruidhinn ri daoine air feadh Alba.
Thuirt an t-Oifigear Riaghlaidh:
“Tha fhios againn gu bheil muinntir na h-Alba airson a bhith an sàs anns a’ phròiseas phoilitigeach agus mar sin tha mi airson gum bi a’ Phàrlamaid a’ faighinn a-muigh agus timcheall na h-Alba.
“ ’S ann aig muinntir na h-Alba gu lèir a tha a’ Phàrlamaid, agus tha Taigh Sear a’ toirt deagh chothrom do Bhuill na Pàrlamaid a chluinntinn bho dhaoine sa choimhearsnachd mu dheidhinn nan cùisean a tha cudromach dhaibh.”
Tha Latha na Pàrlamaid a’ toirt fiathachadh do dhaoine a bhith a’ faicinn na Pàrlamaid air an son fhèin, co-dhiù ge be an lùib “gnothaichean oifigeil” no aig ìre nas neo-fhoirmeil. Tha seo a’ cuideachadh na Pàrlamaid a bhith ag èisteachd ri daoine ionadail.
Air Diluain 16 Màrt, tha Comataidh Co-ionnanachd Chothroman Pàrlamaid na h-Alba a’ leantainn orra le bhith a’ sgrùdadh nan duilgheadasan a tha aig daoine a tha leò fhèin. Tha coinneamh fhoirmeil gu bhith aig a’ Chomataidh airson fianais a ghabhail, agus bidh a’ Chomataidh a’ coinneachadh ri daoine ionadail, buidhnean agus gnìomhachasan.
Thòisich a’ Chomataidh air sgrùdadh a dhèanamh air aois agus aonaranachd anns an Fhaoilleach 2015. Tha a’ Chomataidh a’ gairm airson bheachdan bho dhaoine, sean ’s òg, a tha a’ fulang aonaranachd agus bho na buidhnean a tha ag obair gus taic a thoirt dhaibh. Tha an sgrùdadh seo a’ tachairt aig àm nuair a tha rannsachadh ùr a’ sealltainn gum faod aonaranachd èifeachdan dìobhalach adhbharachadh a thaobh slàinte-inntinn agus slàinte corporra, gu h-àraid am measg seann daoine agus daoine òga.
Thuirt Neach-gairm na Comataidh Mairead NicCullaich BPA:
“Ma tha thu sean no òg agus a’ fuireach ann an Taigh Sear agus a’ fulang aonaranachd, tha sinn a’ tuigsinn gum faod a’ bhuaidh a bhith sgriosail. Tha fhios againn gum faod faireachdainnean aonaranachd uaireannan a bhith fiù ’s nas treasa nuair a tha thu a’ fuireach ann am baile mòr le mòran daoine timcheall. Tha sinn airson do ruigsinn, do bheachdan a thuigsinn agus deagh gnìomhan a bhrosnachadh às do leth.
“Tha fhios againn gu bheil dlùth-cheangal am measg na coimhearsnachd ann an Taigh Sear agus gu bheil daoine a’ sealltainn ri maitheas càch a chèile. Am faod a’ Chomataidh ionnsachadh bho dhaoine agus bho bhuidhnean ann an Taigh Sear air dòighean airson dèiligeadh ri aonaranachd? Tha sinn airson coinneachadh ri buidhnean a tha a’ cleachdadh dòighean ùra a chuidicheas daoine aonaranach na cothroman sòisealta fhaighinn a tha a’ mhòr-chuid dhinn a’ gabhail ri mar-thà.”
Foillsichear fiosrachadh a bharrachd anns na seachdainean ri tighinn air na tachartasan a tha gu bhith ann mar phàirt de Latha na Pàrlamaid ann an Taigh Sear.
Cùl-fhiosrachadh
Làithean na Pàrlamaid gu ruige seo:
23 Gearran 2015 - Dùn Phris
8 Dùbhlachd 2014 – Inbhir Lìobhainn
24 Gearran 2014 - Dùn Breatann
4 Samhain 2013 - Obar Bhrothaig
21 Ògmhios 2013 – Sruighlea
15 Màrt 2013 – Steòrnabhagh
5 Samhain 2012 – Hawick
Airson fiosrachadh a bharrachd, tadhail air www.scottish.parliament.uk/parliamentdays
Faodaidh tu a bhith gar leantail air Twitter cuideachd: @scotparl is @SP_EqualOpps is #PDEasterhouse
*Mar is àbhaist, thathar a’ cleachdadh na h-abairt ‘seann daoine agus daoine òga’ airson daoine a tha nas òige na 25 bliadhna a dh’aois agus nas sine na 50.
Ann an gairm airson bheachdan, tha a’ Chomataidh a’ dèanamh soilleir ciamar a tha a’ Chomataidh fhèin a’ tuigsinn ‘seann dhaoine agus daoine òga’.
Tha rannsachaidhean ùra air sealltainn:
* gur ma dh’fhaoidte gun dùblaich aonaranachd a’ bhuaidh a thig bho tharraing tuilleadh ’s a chòir cudthrom, agus gum faod ro-aonaranachd an coltas àrdachadh, gu ìre 14 sa cheud, gun toirear bàs ro thràth ri seann daoine;
* gu bheil 59 sa cheud de dh’inbhich aig a bheil droch shlàinte ag ràdh gu bheil iad aonranach uaireannan no tric; agus
* gum faod dìth cheanglaichean sòisealta a bhith a cheart cho sgriosail ’s a bhiodh a’ smòcadh 15 toitean gach latha.