08.12.2014
Ciamar a nì sinn cinnteach gum fàs na gnìomhachais chruthachail gu soirbheachail ann an Alba? Sin a’ cheist aig cridhe rannsachadh ùr a chaidh ainmeachadh an-diugh le Comataidh Eaconamaidh, Lùths agus Turasachd ann am Pàrlamaid na h-Alba.
A’ toirt sùil gu h-àraidh air gnìomhachais TBh agus filmaichean na h-Alba agus air earrann gèamannan bhidio, bidh an rannsachadh a’ beachdachadh air dè ghabhas dèanamh gus taic a thoirt dhaibh agus iad a’ fàs agus a’ cur ri eaconamaidh na h-Alba.
Thuirt Neach-gairm na Comataidh Murchadh Friseal BPA:
“Mar earrann le tionndadh ionmhasail measraichte (estimated turnover) £12 billean gach bliadhna agus i a’ fastadh cha mhòr 130,000 neach-obrach ann an earrainn nan gnìomhachas cruthachail, chan eil teagamh ann gu bheil buaidh mhòr aig an earrainn seo an coimeas ri a meud.
“Tha an gnìomhachas ioma-thaobhach seo a’ toirt a-steach raon farsaing de ghnothaichean. Bidh a’ Chomataidh againn a’ coimhead air mar a tha earrannan gèamannan-bhidio agus TBh agus filmaichean a’ soirbheachadh an-dràsta agus dè eile a ghabhas dèanamh air chor’s gum fàs na gnìomhachais seo. Tha sinn gu sònraichte airson fianais fhaighinn air dè seòrsa taic a tha na gnìomhachais seo a’ faighinn agus dè cho èifeachdail ’s a tha i a’ cuideachadh le bhith a’ fàs ann an dòigh a tha seasmhach agus a bhith a’ gluasad a-steach gu margaidhean ùra
Tha a’ Chomataidh air gairm airson fianais fhoillseachadh an-diugh agus tha i a’ sireadh freagairtean gu h-àraidh bho dhaoine le ùidh anns na cuspairean mar na leanas:
- An ròl a tha aig buidhnean-gnìomha (agencies) anns an earrainn phoblaich agus dè cho èifeachdail ’s a tha an taic a tha iad a’ tairgsinn;
- An ròl a tha aig an earrainn phrìobhaidich ann a bhith a’ toirt taic do dh’earrannan gèamannan bhidio, TBh is filmaichean;
- Ciamar a gheibhear thairis air na nithean a tha a’ bacadh nan gnìomhachas cruthachail bho bhith a’ fàs gus brath a ghabhail air cothroman;
- Ciamar a chumar ann an Alba na sgilean a tha riatanach do na gnìomhachais chruthachail;
- Ciamar a leasaicheas sinn na sgilean gnothaich aig an fheadhainn an sàs anns na gnìomhachais TBh agus bhidio;
- Eisimpleirean de ro-innleachdan eadar-nàiseanta airson cuideachadh nan earrannan seo a bhith a’ fàs.
Cùl-fhiosrachadh
Ann an 2012, dh’fhoillsich Alba Chruthachail aithisg a chuir an cèill gu bheil gnìomhachas nan ealan agus an gnìomhachas cruthachail ann an Alba a’ toirt taic do 130,000 dreuchd agus tionndadh ionmhasail £12.48 billean.
Tha na gnìomhachais chruthachail am measg seachd earrannan an eaconamaidh a tha Riaghaltas na h-Alba air chomharradh mar earrannan àraidh aig a bheil comas fàs.
Gheibhear barrachd fiosrachaidh air rannsachadh na Comataidh air an làrach-lin tron cheangal seo.