08.12.2014
Feumar feabhas a chur air mar a lorgar is a pheanasaichear eucoir an aghaidh fiadh-bheatha, a rèir rannsachadh le Comataidh Cùisean Dùthchail, Atharrachadh Clìomaid is Àrainneachd aig Pàrlamaid na h-Alba.
Tha a’ Chomataidh deimhinne nach fhaod sinn a bhith coma-co-dhiù ’s iad ag iarraidh air Riaghaltas na h-Alba beachdachadh air na ghabhas dèanamh gus ìrean aithris is lorg a chur am meud.
Ann am fios-fianaise a bha mar sgrùdadh air Aithisg Bhliadhnail Eucoir an aghaidh Fiadh-bheatha 2013 aig an Riaghaltas, bha dragh air a’ Chomataidh cluinntinn mu bheachd Poileas na h-Alba gu bheil eucoir ann nach tèid aithris no innse ‘s mar sin nach tèid a chlàradh.
Thuirt Neach-gairm na Comataidh, Rob Gibson BPA:
“Agus tuigse air leudachd is iom-fhillteachd eucoir an aghaidh fiadh-bheatha a’ dol am meud, tha sinne gu làidir dhen bheachd nach fhaod neach sam bith againn a bhith coma-co-dhiù agus sinn a’ dol an gleac ris a’ chùis chudromach seo. Chuir sinn a’ cheist, a bheil Poileas na h-Alba agus Oifis a’ Chrùin a’ cur eucoir an aghaidh fiadh-bheatha air thoiseach gu ìre iomchaidh.”
“’S e am freagairt a fhuair sinn ach ‘tha’, agus mar sin tha dùil againn gun tig feabhas air mar a lorgar is a pheanasaichear ìrean eucoir an aghaidh fiadh-bheatha sna bliadhnaichean ri teachd.”
Cuideachd anns an litir aca, thog a’ Chomataidh dragh a thaobh mar a sgaoil Poileas na h-Alba fiosrachadh mu rannsachadh a rinneadh o chionn ghoirid mu bhàs fichead eun-creiche ‘s a dhà ann an Siorramachd Rois. Chuir a’ Chomataidh fàilte air an dearbhadh gu bheil Riaghaltas na h-Alba, ann an co-bhann ris a’ phoileas, a-nis a’ feuchainn ri ìre àrd leantainneachd a thoirt a-mach a thaobh mar a sgaoilear fiosrachadh am measg nam meadhanan.
Mhìnich Mgr Gibson:
“Bha uabhas air a’ Chomataidh gun deach fichead eun-creiche ’s a dhà a mharbhadh le puinnsean o chionn ghoirid faisg air Drochaid Sguideil. Tha sinn a’ cur fàilte nach beag air rùn Riaghaltas na h-Alba sgeama a thoirt air aghaidh a thaobh cuidhteas stuthan-puinnseanachaidh, sgeama a nì focas air stuthan mì-laghail a thèid a chur gu feum nas motha ann an eucoir an aghaidh fiadh-bheatha. Tha na thachair o chionn ghoirid a’ sealltainn dìreach rud beag de bhuaidh uabhasach a leithid air ar fiadh-bheatha.”
Ann an litir sia-duilleag chun a’ Mhinisteir ùir airson Àrainneachd, Atharrachadh Clìomaid is Ath-leasachadh Fearainn, Èibhlin NicLeòid BPA, cuiridh a’ Chomataidh cuideam air na prìomh cheistean, nam measg:
- Tha e coltach nach tèid cùisean a thoirt gu lagh a thaobh eucoir an aghaidh fiadh-bheatha ach sa chòigeamh chuid de chàsan a thèid aithris don Phoileas, agus dhiubh sin thèid 20.7% a chomharradh mar ghnothach ‘Na Dèan Dad’ le Seirbheis Oifis Neach-casaid a’ Chrùin (an taca ri 9.5% de dh’eucoirean eile).
- ‘S e dragh an iar-Mhinisteir airson Àrainneachd is Atharrachadh Clìomaid, Paul Wheelhouse, gu bheil seòrsaichean sònraichte de dh’fhiadh-bheatha cha mhòr gu tur air iarraidh ann am ceàrnan de dh’Alba far am biodh dùil riutha a bhith an làthair.
- Cuiridh a’ Chomataidh fàilte air dearbhadh gun deach ceuman a thoirt mu-thràth gus protocal a thaobh fiosrachadh a roinn a chur air chois eadar Dualchas Nàdair na h-Alba (DNA) agus Poileas na h-Alba far am buin seo ri casg air cead san fharsaingeachd eòin fhiadhaich a chur an ribeadh is a mharbhadh le gunna.
- Gun cuirear tuilleadh feuma air luchd-obrach Comann na h-Alba an aghaidh Mì-thròcair do dh’Ainmhidhean (CAAMDA) mar thaic do Phoileas na h-Alba san obair aca, ged a chuireas a’ Chomataidh cuideam air ‘s gum feum earbsa mheasarra a bhith aig a’ mhòr-shluagh sna ceuman seo agus gum bi CAAMDA cunntachail anns a’ chùis.
- Feum air far an tèid eucoir an aghaidh fiadh-bheatha a dhèanamh, a’ toirt a-steach àiteachan puinnseanachaidh is ribean mì-laghail, a chur air clàr-mapa gu h-èifeachdach is gu leantainneach.
- Dragh mu dè cho soilleir is a bhios dàta mu eucoir an aghaidh fiadh-bheatha, mu mar a mheasgaichear fiosrachadh a thaobh nam mìosan agus bliadhna an ionmhais, agus mu dìth-ruigsinneachd dàta fa chòir 2013-14.
Cùl-fhiosrachadh
Seirbheis Oifis Neach-casaid a’ Chrùin.
Gheibhear litir a’ Mhinisteir ùir airson Àrainneachd, Atharrachadh Clìomaid is Ath-leasachadh Fearainn, Èibhlin NicLeòid BPA, tron cheangal seo.
Thug Oifis a’ Chrùin agus àrd-oifigearan sa phoileas fianais seachad am beulaibh an t-sluaigh ann am Pàrlamaid na h-Alba air 29 Dàmhair mu Aithisg Bhliadhnail Riaghaltas na h-Alba air Eucoir an aghaidh Fiadh-bheatha an Alba 2013.
Bidh Comataidh Cùisean Dùthchail, Atharrachadh Clìomaid is Àrainneachd a’ sgrùdadh molaidhean-poileasaidh a bhuineas ri cùisean dùthchail, atharrachadh clìomaid, biadh agus na h-àrainneachd.
Gheibhear dealbhan-camara den Chomataidh is de Neach-gairm na Comataidh saor ’s an asgaidh. Cuideachd, gheibhear pios clàraichte claistinneach de dh’agallamh ri Neach-gairm na Comataidh, Rob Gibson BPA, ma dh'iarrar.