01.12.2014
Tha a’ Chomataidh Inbhean, Dòighean-obrach agus Cur-an-dreuchd Poblach air rannsachadh ùr fhoillseachadh an-diugh (1 Dùbhlachd) agus iad gu bhith sgrùdadh mholaidhean ùra gus Luchd-gairm Chomataidhean Pàrlamaid na h-Alba a thaghadh.
Chuir an t-Oifigear Riaghlaidh, Am Fìor Urr. Tricia Marwick BPA, molaidhean air adhart san Dàmhair a bha a’ moladh gum biodh a’ Phàrlamaid air fad a’ taghadh Luchd-gairm nan Comataidhean.
Tha an t-Oifigear Riaghlaidh den bheachd nam biodh Luchd-gairm air an taghadh gun neartaicheadh sin an obair a tha a’ Phàrlamaid a’ dèanamh agus gun cuireadh e ris mar a tha cumhachd air an roinn eadar a’ Phàrlamaid, Riaghaltas na h-Alba agus muinntir na h-Alba. An-dràsta bidh a’ Phàrlamaid a’ co-dhùnadh cò am pàrtaidh poilitigeach bhon tig neach-gairm gach Comataidh; agus thèid Luchd-gairm nan Comataidhean a roghnachadh leis na Comataidhean a rèir sin an uair sin.
Thuirt Neach-gairm na Comataidh Inbhean, Dòighean-obrach agus Cur-an-dreuchd Poblach, Stiùbhart Stevenson BPA:
“Tha e follaiseach gu bheil na molaidhean seo air tighinn aig àm nuair a tha daoine air ùidh às ùr a nochdadh ann am poilitigs agus anns na dòighean sam bith Pàrlamaid na h-Alba ag obair.
“Chunnacas grunn atharraichean ann am pròiseasan na pàrlamaid sna beagan bhliadhnaichean a dh’fhalbh, leithid ceistean cuspaireil a chaidh a thoirt a-steach agus mar a chaidh pàtran nan amannan suidhe atharrachadh. Tha a’ Chomataidh againn a-nis a’ dol a dh’fhaicinn an e luchd-gairm air an taghadh an ath cheum a bu chòir a bhith ann.
“Tha a’ Chomataidh againn airson cluinntinn bho dhaoine aig a bheil ùidh sa chùis, feuch a bheil iad a’ smaoineachadh gun obraicheadh na molaidhean seo agus gu dearbh ciamar a dh’obraicheadh iad.”
Bidh a’ Chomataidh a’ faighneachd grunn cheistean nuair a tha iad a’ sireadh bheachdan. Nam measg bidh:
* A bheil dad ann a chuireadh bacadh air a’ Phàrlamaid air fad bho bhith taghadh luchd-gairm?
* Dè na buannachdan is na h-anacothroman a bhiodh ann le luchd-gairm air an taghadh?
* Dè an dòigh sam bu chòir daoine a bhith air am moladh airson dreuchd agus dè an ìre de thaic a bu chòir a bhith aig Ball mus urrainn don ainm aca a bhith air a chur air adhart?
* Ciamar a bu chòir a’ bhòt a bhith air a chumail? Am bu chòir a chumail gu dìomhair no ann an dòigh eile?
* Am bu chòir fhathast a bhith a’ roinn dreuchdan an luchd-gairm eadar nam pàrtaidhean a rèir an àireamh shuidheachain a th’ aca sa Phàrlamaid?
Cùl-fhiosrachadh
Sgrìobh an t-Oifigear Riaghlaidh chun na Comataidh san Dàmhair 2014 ag iarraidh orra coimhead air a’ mholadh le dùil, nan rachadh aontachadh leis, gum biodh am pròiseas air a chur an gnìomh airson toiseach an ath sheisein den phàrlamaid ann an 2016.
Chithear lethbhreac den litir aig an Oifigear Riaghlaidh an cois a’ cheangail gu h-ìosal:
http://www.scottish.parliament.uk/S4_StandardsProceduresandPublicAppointmentsCommittee/Inquiries/2014.10.31_Elected_Committee_Conveners.pdf
Tha a’ Chomataidh gu bhith ag iarraidh fianais gu 7 Gearran 2015 agus gheibhear barachd fiosrachaidh air duilleag-lìn na Comataidh:
http://www.scottish.parliament.uk/parliamentarybusiness/CurrentCommittees/83477.aspx