20.10.2014
Bidh BPAan bho Chomataidh Eaconamaidh, Lùths agus Turasachd a’ fàgail Pàrlamaid na h-Alba airson an latha gus coinneachadh san Taigh-òsta Salutation ann am Peairt Diluain 3 Samhain.
Cumaidh a’ Chomataidh coinneamh Comataidh oifigeil sa bhaile, agus iad a’ gabhail fianais air a’ bhuidseat a tha Riaghaltas na h-Alba a’ moladh airson Iomairt na h-Alba agus Iomairt na Gàidhealtachd agus nan Eilean. Le buidseat iomlan luach £341 millean airson 2015-16 tha e an urra ris an dà bhuidhinn iomairt cuideachadh gus piseach a thoirt air eaconamaidh na h-Alba.
Tha a’ Chomataidh cuideachd airson sùil a thoirt air mar a dh’fhaodar feum a dhèanamh den bhuidseat airson cuideachadh leis an amas aig Riaghaltas na h-Alba gus às-mhalairt (export) a chur am meud.
Cumaidh a’ Chomataidh bùithtean-obrach le luchd-gnothaich ionadail gus bruidhinn air a’ bhuaidh a bhios aig a’ bhuidseat agus mar a thèid a chosg air an sgìre ionadail.
Cuideachd, bidh BPAan a’ gabhail pàirt ann an seiseanan le ceistean is freagairtean còmhla ri sgoilearan bho sgoiltean ionadail.
Thuirt Neach-gairm na Comataidh, Murchadh Friseal BPA:
“Bidh a’ Chomataidh againn a’ dèiligeadh ri cùisean a bheir buaidh air gnothachasan air feadh na dùthcha, mar sin tha e gu h-àraidh cudromach gum bi sinn a’ tadhal air àiteachan taobh a-muigh Dhùn Èideann feuch gun cluinn sinn beachdan dhaoine air cùisean ionadail.
“’S e aon de na h-amasan a th’ aig Riaghaltas na h-Alba sna planaichean cosg aca, dùthaich a stèidheachadh a tha soirbheachadh ri linn leudachadh seasmhach san eaconamaidh. Tha e mar uallach air a’ Chomataidh seo ceistean a chur air na buidhnean ris a bheil e an urra sin a thoirt gu buil, feuch a bheilear a’ cosg airgead luchd-pàighidh chìsean san dòigh as èifeachdaiche agus as buadhmhoire as urrainnear.”
Cùl-fhiosrachadh
Tha coinneamh oifigeil na Comataidh fosgailte don phoball. Thèid a cumail san Taigh-òsta Salutation, Peairt aig 1.45f Diluain 3 Samhain.
Chan fheum daoine pàigheadh airson a dhol chun na coinneimh. Faodar tiogaidean a ghleidheadh le bhith cur fios gu Seirbheisean Luchd-tadhail aig a’ Phàrlamaid aig sp.bookings@scottish.parliament.uk no 0131 348 5200 no air loidhne-fòn an-asgaidh 0800 092 7600).
Bidh a’ Chomataidh Eaconamaidh, Lùths is Turasachd a’ coinneachadh gach seachdain nuair a tha a’ Phàrlamaid na suidhe agus tha 9 BPAan nam buill oirre.