Bidh Tosgaire na h-Eadailt a’ bruidhinn ri BPAan air prìomh amasan san Roinn Eòrpa

Bruidhnidh an Tosgaire ri Comataidh nan Cuisean Eòrpach is Taobh-a-Muigh am beul an t-sluaigh aig 10.20m. Agus i a’ bruidhinn ron choinneamh, mhìnich Neach-gairm na Comataidh, Cairistìona NicShealbhaich BPA:

"’S cinnteach gum bi an t-seisean seo inntinneach. Tha prìomh amasan uachdaranachd na h-Eadailte co-ionnan ri tòrr dhe na h-amasan na th’ aig muinntir na h-Alba. Tha fàs eaconamach mar raon cudromach ris an dèilig an dà dhùthaich agus sinn uile a’ feuchainn ri faotainn seachad air a’ chrìonadh eaconamach a bh’ ann o chionn ghoirid.

"Bha tòrr a bharrachd luchd-bhòtaidh na riamh roimhe an sàs ann an reifreann neo-eisimeileachd na h-Alba san t-Sultainn agus tha mi an dùil gum bi ar Comataidh a’ gabhail ùidh nach beag ann an obair na h-Eadailte ‘s iad a’ cur romhpa còraichean an t-sluaigh, cho math ri cothrom a bhith an sàs ann an obair Comhairle an Aonaidh Eòrpaich, a chur air adhart.

Air 1 Iuchair 2014, ghabh an Eadailt thairis Uachdaranachd Comhairle an Aonaidh Eòrpaich. ‘S iad fàs is fastachd, daingeanachadh còraichean an t-sluaigh agus ròl nas làidire san Roinn Eòrpa prìomh amasan na h-Eadailte ri linn a h-uachdaranachd. Bidh seo air chois aig an aon àm ‘s a bhios ciad shia mìosan Pàrlamaid Eòrpaich ùir ann, a chaidh a thaghadh sa Chèitean. Cuideachd, ‘s ann ri linn Uachdaranachd na h-Eadailte a bhios Coimisean Eòrpach ùr a’ dol an dreuchd.

Roimh tabhairt fiosrachaidh is fianaise don Tosgaire, èistidh a’ Chomataidh ri Fiona Hyslop BPA, Rùnaire Caibineit Riaghaltas na h-Alba airson Cultair is Cùisean Taobh a-Muigh, mu na ceistean a dh’ainmich Riaghaltas na h-Alba mar chùisean cudromach rè na h-uachdaranachd Eadailtich. Gu sònraichte, nì a’ Chomataidh sgrùdadh air dol-an-sàs Riaghaltas na h-Alba sna ceithir raointean poileasaidh sa bheilear ag iarraidh ròl air leth a bhith aca: Lùths is Atharrachadh Clìomaid, Àrainneachd na Mara; Rannsachadh is Cruthachd; agus Saorsa, Sàbhailteachd is Ceartas.

Cùl-sgeul

Tòisichidh Coinneamh Comataidh Eòrpach is Cùisean Taobh a-Muigh air Diardaoin 09 an Dàmhair 2014, ann an Seòmar Raibeart Bhurns, Seòmar Comataidh 1, aig 9.00m.

Thèid coinneamh na Comataidh a chraobh-sgaoileadh air an eadar-lìon aig http://www.scottish.parliament.uk/tv air neo gabhaidh ticeadan a chur air leth tron phost-dealain aig sp.bookings@scottish.parliament.uk / 0131 348 5200 no air saor-fhòn 0800 092 7600 (luchd-cleachdaidh fònaichean-teacsa: 0800 092 7100).

Bidh dealbhan-camara dhen tachartas ri fhaotainn saor ‘s an asgaidh. Rachaibh an conaltradh ri Oifis Caidreamh nam Meadhanan aig a’ Phàrlamaid gus iad seo fhaighinn.