Thathar air clàr dara Cruinneachadh Cultair Eadar-nàiseanta Dhùn Èideann ainmeachadh aig am bi Ministearan ri cultar agus eòlaichean ealain agus cultair às gach ceàrn den t-saoghal a’ cruinneachadh bho Dhidòmhnaich 10 gu Dimàirt 12 Lùnastal 2014 gus deasbad a chumail air na ceistean ag èirigh às a’ chuspair: ‘Cultar agus Earbsa’. Bheir Ladysmith Black Mambazo oirfideas goirid aig a’ chuirm mu dheireadh Dimàirt 12 Lùnastal.
Ri linn an tachartais a mhaireas trì latha, tha trì seiseanan air an cumail ann an Seòmar-deasbaid Pàrlamaid na h-Alba fosgailte don phoball. Faodaidh am poball tiogaidean iarraidh tro shiostam-bhòtaidh a’ phobaill gu meadhan-latha Dihaoine 25 Iuchar.
A’ bruidhinn ron tachartas, thuirt an t-Oifigear Riaghlaidh am Fìor Urr Tricia Marwick BPA:
“Cha leig thu leas ach coiseachd a-steach don talla mhòr againn agus sluagh air a chruinneachadh fhaicinn airson Grèis-bhrat Mòr na h-Alba gus an cumhachd a tha aig cultar gus ceangal ri daoine a thuigsinn.
“Tha e na thoileachas mòr dhuinn mar sin dara Cruinneachadh Cultair Eadar-nàiseanta Dhùn Èideann a chumail. Tha sinn cho toilichte an cothrom ainneamh a thoirt don phoball cluinntinn bho luchd-labhairt cliùiteach agus iad a-mach air a’ chumhachd a bheir cultar air dùthchannan. Tha e na thogail-inntinn gu sònraichte an cothrom a thairgse do dhaoine luchd-ciùil den chiad ìre a chluinntinn agus iad a’ cluich anns an t-Seòmar Dheasbaid air leth againn.”
Tha Cruinneachadh Cultair Eadar-nàiseanta Dhùn Èideann 2014 na cho-obrachadh eadar Comhairle Bhreatainn, Fèis Eadar-nàiseanta Dhùn Èideann, Riaghaltas na h-Alba, Pàrlamaid na h-Alba agus Riaghaltas na Rìoghachd Aonaichte.
Tha clàr iomlan a’ phobaill mar a leanas:
Didòmhnaich 10 Lùnastal
16:00-18:00
Aig an Fhosgladh bidh fàilte bho Oifigear Riaghlaidh Pàrlamaid na h-Alba am Fìor Urr Tricia Marwick BPA, Rùnaire na h-Alba airson Cultair Fiona Hyslop BPA, Rùnaire Stàite na Rìoghachd Aonaichte airson Cultair is Spòrs Sajid Javid BP agus Sir Jonathan Mills, Stiùiriche Fèis Eadar-nàiseanta Dhùn Èideann.
Cluichidh am fear-ciùil iomraiteach Jordi Savall taghadh de cheòl tràth còmhla ris an luchd-chiùil Hespèrion XXI. Tha Savall air urram fhaighinn mar Thosgaire Aonadh na h-Eòrpa airson deasbaireachd eadar-chultarail agus tha e a’ moladh a bhith a’ cleachdadh a’ chiùil mar mheadhan gus tighinn gu tuigse.
Tòisichidh Seisean Làn a h-Aon le taisbeanadh cumhachdach bho Irina Bokova, Àrd-stiùiriche UNESCO – a’ sealltainn san ùine fhada air tagradaireachd (advocacy) eadar-nàiseanta, agus Simon Anholt àrd-ollamh, fear-breithneachaidh agus fear-gnìomha air cultar agus buaidh air feadh na cruinne; agus an dèidh sin Saskia Sassen, sgrìobhadair agus sòisealach agus Michael Power eòlaiche air ionmhas.
Diluain 11 Lùnastal
09:30-10:30
Aig Seisean Làn a Dhà bidh Benjamin Barber a’ gabhail beachd air Cultar a’ Bhaile-mhòir; bidh Nandi Mandela a-mach air ìomhaigh chultarail mar ‘Inneal gus Atharrachadh Deimhinneach a thoirt air Àrainneachd na Cruinne’; nì Robyn Archer sgrùdadh air dè tha ‘cleachdadh agus luach nan ealain’ a’ ciallachadh. Thèid an seisean a thoirt gu crìch leis an stiùiriche-dannsa a ghabhas beachd air an t-saothair aice a-mach aoir cultar dùthchasach Vietnam agus nochdadh an duine aonair a-mach à beachdachadh coitcheann.
14:30-15:30
Aig Seisean Làn a Trì thèid sùil a thoirt air saothair Basma El Husseiny a tha air pròiseactan iomlaid chultarail a chur air adhart fad còrr is fichead bliadhna. Bidh Danilo Santos de Miranda, Stiùiriche Sao Paulo air Buidheann-ionmhais Ealain Bhrazil a’ gabhail beachd air modal sònraichte soirbheachail SESC. Bidh Paul Carter a-mach air diofar riochdan cultarail, cleachdadh-ealain agus dealbhadh gus ‘suidheachaidhean’ ùra poblach a chruthachadh agus bheir Kent Larson an seisean gu crìch le òraid air teicneòlas ùr gus fiosrachadh mu na bailtean-mòra a bheachdachadh.
Dimàirt 12 Lùnastal
10:00-11:30
Thig an Cruinneachadh gu crìch leis an t-Seisean Làn mu Dheireadh. Bheir luchd-aithisg giorrachadh air na taisbeanaidhean agus deasbadan eadar-dhealaichte a’ Chruinneachaidh le Sir Nicholas Kenyon air Luachan agus Tomhas agus Bridget McConnell air Tagradaireachd agus Ìomhaigh.
Bidh cothrom ann do na riochdairean freagairt a thoirt le beachdan bhon làr. Bheir Sir Jonathan Mills, Stiùiriche agus Ceannard Fèis Eadar-nàiseanta Dhùn Èideann buidheachas.
Bidh oirfideas deireannach ann bho bhuidheann-seinn urramach Ladysmith Black Mambazo, air an do ghabh Nelson Mandela tosgairean cultarail Africa a Deas. Bheir am Fìor Urr Tricia Marwick BPA, Oifigear Riaghlaidh Pàrlamaid na h-Alba an Cruinneachadh gu crìch.
Gailearaidh a’ Phobaill
Faodar tiogaidean iarraidh tro phost-dealain aig culturesummit2014@scottish.parliament.uk no le bhith a’ sgrìobhadh gu Baileat a’ Phobaill, Cruinneachadh Cultair Eadar-nàiseanta Dhùn Èideann, Pàrlamaid na h-Alba, Dùn Èideann, EH99 1SP.
Thathar ag iarraidh air a’ phoball fios a leigeil gu soilleir dè an fheadhainn de na seiseanan air am bu mhath leotha frithealadh ro Dhihaoine 25 Iuchar, meadhan-latha agus thèid fios a thoirt dhaibh mun chuibhreann aca fhèin ro Dhimàirt 29 Iuchar.
Faodaidh am poball cumail ris an fhios as ùire air adhartas a’ Chruinneachaidh tron t-sruth bheò air an làrach-lìn – www.culturesummit.com agus air Truitrich air @culturesummit
Cùl-fhiosrachadh
Tha www.culturesummit.com a’ toirt fios do riochdairean, luchd-tadhail agus a h-uile duine aig a bheil ùidh ann am poileasaidh mu na h-ealainean agus cultar. Tha e cuideachd a’ nochdadh bheachdan ann an sgrìobhadh bho luchd-cultair air feadh an t-saoghail, cho math ri sruthadh beò bhideothan bhon tachartas trì latha.
Tha Cruinneachadh a’ Chultair stèidhichte ann an cùisean cultarail na cruinne mar thachartas gach dà bhliadhna a-nis, an dèidh soirbheachadh Cruinneachadh 2012 aig an robh 33 dùthchannan. Tha e mar amas aig an dara Cruinneachadh cur ris an stèidh làidir gus barrachd sgaoileadh bheachdan, deasbaireachd agus co-obrachaidh san àm ri teachd a bhrosnachadh agus am beachd gu bheil cultar na dhrochaid a chuireas air chomas còmhradh eadar dùthchannan, ann am farsaingeachd shuidheachaidhean, a leudachadh.
Thèid a chumail uair a-rithist eile san Lùnastal aig togalach Pàrlamaid na h-Alba nuair a bhios Fèisean Dhùn Èideann nan leum. Bidh an cothrom aig Ministearan ri Cultar, luchd-ealain agus luchd-rianachd frithealadh air oirfideas agus tachartasan barraichte, a bhios a’ tàladh luchd-èisteachd bho bharrachd agus 70 dùthchannan.
A’ cur ris a’ Chruinneachadh agus ris a’ chuspair ‘Cultar agus Earbsa’ bidh na com-pàirtichean ùra Aga Khan Music Initiative (AKMI), a thòisicheadh ann an 2000 le A Shoillse Aga Khan; Asialink aig Oilthigh Melbourne; agus Comataidh nam Bailtean-mòra agus Riaghaltais Ionadail Aonaichte – Clàr-obrach 21. Cuiridh na com-pàirtichean ri leud agus farsaingeachd còmhraidhean cultarail cruinneil a’ Chruinneachaidh.