02.06.2014
Is e am bu chòir fiachan eachdraidheach eadar dùthchannan sa Cho-fhlaitheas a sgrìobhadh dheth a bhios mar chuspair an deasbaid aig Taigh an Ròid Diardaoin nuair a thig roghainn luchd-deasbaid òg na h-Alba còmhla sa chuairt mu dheireadh de dh’Fharpais-deasbaid Dhòmhnaill Mhic an Deòir aig Comann-lagha na h-Alba.
Is e seo an ceann mu dheireadh de dh’fharpais anns an robh 128 sgiobaidhean an sàs bho air feadh Alba. Am-bliadhna, chùm na sgoilearan deasbad air cuspairean cho fada bho chèile ri cur às don tuarastal as lugha agus àireamhan airson ìre nam boireannach anns a’ Phàrlamaid.
Agus an Leas-Oifigear Riaghlaidh Iain Scott BPA anns a’ chathair, bidh ceithir sgiobaidhean am farpais airson a’ chiad duais. is iad na sgiobaidhean a tha an sàs:
- Acadamaidh Dhùghlais (Muileann Dhàibhidh) - Amitai Gottleib agus Rosie Duthie
- Àrd-sgoil Craigmount (Dùn Èideann) – Liam Stewart agus Michael Davidson
- Àrd-sgoil na Trianaid (Siorrachd Rinn Friù) – Sean Cosgrove agus David Campbell
- Colaiste Ghleann Amain (Siorrachd Pheairt) – Robert Wilson agus Issy Arnaud
Agus e a’ bruidhinn ron chuairt mu dheireadh, thuirt an Leas-Oifigear Riaghlaidh Iain Scott BPA:
“Tha e iomchaidh gun tèid a’ chuairt mu dheireadh de dh’Fharpais Mhic an Deòir a chumail ann an Seòmar-deasbaid Pàrlamaid na dùthcha, àite airson deasbad mu cheistean a bhios a’ bualadh oirnn uile.
“Le còrr is 250 de chlann-sgoile an sàs ann am farpais na bliadhna seo, tha an fheadhainn sa chuairt mu dheireadh airidh air a bhith air am moladh airson an ìre seo a ruigsinn agus tha fiughair agam ri bhith a’ cur fàilte orra don Phàrlamaid. Bidh roghainn de dheasbad anns a’ chuairt mu dheireadh agus tha mi cinnteach gun còrd e rinn a bhith ag èisteachd ri deasbad bheothail.”
Thèid cùisean a chraoladh beò air an Lìon air làrach-lìn na Pàrlamaid 18.00 gu 21.45 (http://www.pàrlamaid.na.h-alba.ra/tbh) Diardaoin 5 Ògmhios.
Agus i air a stèidheachadh ann an 1999, tha an fharpais-deasbaid bhliadhnail as motha do sgoiltean na h-Alba fosgailte do sgoilearan anns gach àrd-sgoil ann an Alba. Tha e mar amas aig an fharpais tuigse a chur air adhart mu cho cudromach agus a tha deasbad, tagradh agus conaltradh do luchd-lagha, do dheamocrasaidh agus do chomunn-sòisealta anns an fharsaingeachd. Agus i air a cur air dòigh agus a cumail le Comann-lagha na h-Alba, tha an fharpais mar chuimhneachan air a’ Phrìomh Mhinistear Dòmhnall Mac an Deòir BPA nach maireann.
Thuirt Heather NicEanraig, manaidsear dreuchdan is ceanglaichean a-muigh aig a’ Chomann-lagha:
“Rinn na sgiobaidhean uabhasach fhèin math a’ chuairt mu dheireadh a ruigsinn agus tha dùil gum bi e mar chrìoch bheothail air an fharpais nuair a choinnicheas iad ann an Seòmar-deasbaid Pàrlamaid na h-Alba.
“Am-bliadhna, thug sinn a-steach gluasadan ceangailte ris a’ cho-fhlaitheas agus mar a thig na Geamaichean faisg oirnn as t-samhradh, tha e iomchaidh dhuinn uile beachdachadh air dè tha a’ ciallachadh a bhith mar phàirt de na dùthchannan seo. Tha na sgiobaidhean-deasbaid iad fhèin air a bhith gu mòr air an togail leis a’ chuspair seo agus bha argamaidean nan togail-inntinn aca sna cuairtean roimhe seo nuair a rinn iad deasbad am bu chòir don Rìoghachd Aonaichte a bhith air cùl a chur ri coinneamh ceannardan riaghaltasan a’ Cho-fhlaitheis an-uiridh no am bu chòir gun rachadh dùthchannan sa Cho-fhlaitheas a mheasas fearas-feise na eucoir a phutadh a-mach às a’ bhuidhinn.
“Tha togail agam ris na tha ri ràdh aig na sgiobaidhean a chluinntinn nuair a thèid iad an sàs gus an gluasad mu dheireadh a dheasbad ann an suidheachadh uasal Seòmar-deasbaid na Pàrlamaid.”
Gheibh an sgoil a bhuannaicheas geall-dùbhlain agus duais £1,000, air a thoirt mar thiodhlac le Comann-lagha na h-Alba agus gheibh an fheadhainn san dara h-àite £250, air a thoirt mar thiodhlac le Comann Luchd-tagraidh Ghlaschu. Gheibh na h-uile sa chuairt mu dheireadh cuach an urra agus teisteanas gus an soirbheachadh a chomharrachadh agus bheir an luchd-urrais am-bliadhna Luchd-foillseachaidh Hodder Gibson leabhraichean-foghlaim gu luach £500, ri bhith air an roinn eadar an sgoil a bhuannaicheas agus an dara sgoil.
Is iad na britheamhan airson an tachartais:
- Jon Dye, a bha na Chathraiche air Aonadh na Beurla (Ceann-suidhe nam Britheamhan).
- Irene McGrath, cathraiche Comhairle-deasbaid Eadar-nàiseanta Sgoiltean na h-Alba.
- Rob Marrs, Àrd-chomhairle Poileasaidh, Comann-lagha na h-Alba, a bha na oifigear ri òraidean agus deasbadan aig Aonadh na Beurla.
- Steven Doherty, Ceannard Rèiteach-strì, Luchd-lagha Wright, Johnston & Mackenzie LLP.
- Marc Dòmhnallach BPA.
Dealbhan
Bidh dealbhan den tachartas rim faotainn an-asgaidh. Cuiribh fios gu dealbhadair Pàrlamaid na h-Alba Anndra Cowan air 0131 348 5878.
Contact information
Media information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: