31.01.2014
Cha mhòr nach eil bliadhna ann bho thug Achd Ath-leasachadh a’ Phoileis agus Smàlaidh (Alba) 2012 ochd Seirbheisean-smàlaidh agus Teasairginn còmhla mar aon seirbheis. Tha Comataidh a’ Cheartais aig Pàrlamaid na h-Alba ag iarraidh faighinn a-mach dè a’ bhuaidh a thug seo air coimhearsnachd ionadail le gairm airson fianaise a chaidh fhoillseachadh an-diugh.
Bhon ghluasad gu seirbheis shingilte, tha Seirbheis-smàlaidh agus Teasairginn na h-Alba air 32 de phlanaichean ionadail fhoillseachadh is iad a’ toirt nan amasan aca gus leasachadh a thoirt air sàbhailteachd do choimhearsnachdan agus do luchd-obrach; a’ dèanamh cinnteach gum bi an aon chothrom air seirbheisean-smàlaidh is teasairginn; a’ leasachadh thoraidhean tro chom-pàirteachas agus a’ cur mar chleachdadh ri leasachadh leanmhainneach.
Tha Comataidh a’ Cheartais ag iarraidh beachdan a chluinntinn a bheil coimhearsnachdan ionadail a’ faireachdainn gun deach comhairle gu leòr a chur riutha air na planaichean a thathar a’ moladh agus mar a tha iad den bheachd mar a bheir atharrachaidhean sam bith mu dhùnadh nan seòmraichean-riaghlaidh buaidh air an ùghdarras, am baile-mòr no am baile-beag.
Thuirt Neach-gairm Chomataidh a’ Cheartais Cairistìona Ghreumach BPA:
“Is ann air seirbheis a’ phoileis as motha a chaidh sùil a thoirt mar phàirt de dh’Achd Ath-leasachadh a’ Phoileis agus Smàlaidh (Alba) 2012 agus tha sinn ag iarraidh faighginn a-mach a-nis mar a chaidh buaidh a thoirt air seirbheis-smàlaidh leis na h-atharrachaidhean a thugadh a-steach sa Ghiblean a chaidh.
“Mar phàirt den phlana ro-innleachdail aige, tha rùn aig Seirbheis-smàlaidh agus Teasairginn na h-Alba nach bi ach aon ionad-trèanaidh nàiseanta aige agus àireamh nan seòmraichean-riaghlaidh a lùghdachadh gu trì. Ged a tha na h-atharrachaidhean seo mar fhreagairt air dùbhlanan a thaobh ionmhais, chan eil teagamh ach gun toir e buaidh air coimhearsnachdan ionadail air feadh na h-Alba. A bheil coimhearsnachdan den bheachd gu bheil seirbheis an smàlaidh aca air fàs nas fheàrr agus a bheil iad den bheachd gum faigh iad an aon chothrom air seirbheisean-smàlaidh is teasairginn agus a gheibh ceàrnaidh eile san dùthaich? Leigibh fios thugainn.”
Gheibhear cothrom air a’ ghairm airson fianaise air ath-leasachadh air seirbheis an smàlaidh tron cheangal gu h-ìseal agus bu chòir do na beachdan uile a bhith a-staigh air 4 Màrt 2014 air a’ char as fhaide:
Gairm fianais
Cùl-fhiosrachadh
Fo Achd Ath-leasachadh a’ Phoileis agus Smàlaidh (Alba) 2012, air 1 Giblean 2013, chaidh ochd Seirbheisean-smàlaidh agus Teasairginn na h-Alba a thoirt còmhla gus Seirbheis shingilte Smàlaidh agus Teasairginn a chruthachadh.
Shònraich Riaghaltas na h-Alba trì buannachdan an lùib an ath-leasachaidh air smàladh. Sa chiad dol-a-mach, gus seirbheisean ionadail a dhìon is a leasachadh. Sa dara h-àite, barrachd den aon chothrom air seirbheisean sònraichte smàlaidh is teasairginn a chruthachadh air feadh na dùthcha agus, anns an dealachadh, an ceangal eadar seirbheis-smàlaidh is teasairginn agus coimhearsnachdan ionadail a neartachadh.
Fios conaltraidh
Fios do na meadhanan
Fios comataidh
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: