30.01.2014
Thèid an cruth air foghlam agus cultar ann an Alba an dèidh toradh an referendum a sgrùdadh le Comataidh Foghlaim agus Cultair aig Pàrlamaid na h-Alba ann an rannsachadh a chaidh a chur air bhog an-diugh (Diardaoin 30 Faoilleach).
Seallaidh an rannsachadh ri sreath de cheistean air leth, a tha mòran dhiubh san deasbad mu bhun-reachd na h-Alba san ùine air thoiseach mar-thà. Is iad na cuspairean a thèid a sgrùdadh ri linn an rannsachaidh foghlam àrd-ìre is foghlam adhartach; na tràth-bhliadhnaichean, cùram-cloinne is comas-cosnaidh; agus craoladh is cultar.
Thuirt Neach-gairm na Comataidh, Stiùbhart Maxwell BPA:
“Tha mòran deasbaireachd air a bhith ann mar-thà mu bhun-reachd na h-Alba san ùine air thoiseach agus an cumadh a bhios air Alba an dèidh bhòt seadh no chan eadh. Is e adhbhar an rannsachaidh seo beachdan nan eòlaichean a chluinntinn agus sealltainn air cuid de na ceistean ann am barrachd mionaideachd.
“Ge b' e dè a' bhòt a bhios ann san t-Sultain, cha bhi e ach cuideachail gun seall a’ Chomataidh againn air na ceistean ceangailte ri foghlam àrd-ìre is foghlam adhartach; na tràth-bhliadhnaichean, cùram-cloinne is comas-cosnaidh; agus craoladh is cultar a dh’fhaicinn dè an cumadh a dh’fhaodadh a bhith air an ùine romhainn.”
Cumaidh a’ Chomataidh sreath sheiseanan gus fianais ann an labhairt a thogail sa Mhàrt agus sa Ghiblean. Roimhe seo, tha a’ Chomataidh air gairm-fianais a sgaoileadh ag iarraidh bheachdan ann an sgrìobhadh air farsaingeachd chuspairean (bidh fiosrachadh slàn ri fhaotainn air làrach-lìn na Comataidh).
Foghlam àrd-ìre is foghlam adhartach
Gabhaidh a’ Chomataidh beachd air cuspairean leithid:
· a’ bhuaidh air a’ phoileasaidh mun imrich-a-steach air oilthighean is colaistean na h-Alba
· pàigheadh chìsean airson foghlaim adhartaich le oileanaich bhon chuid eile den Rìoghachd Aonaichte
· comas oilthighean na h-Alba cothrom fhaighinn air maoineachadh-rannsachaidh na Rìoghachd Aonaichte agus mar a dh’fhaodadh formula ùr mu mhaoineachadh airson na chuireas Alba ri Comhairlean-rannsachaidh obrachadh ann an gnìomh.
Na tràth-bhliadhnaichean, cùram-cloinne is comas-cosnaidh don òigridh
Gabhaidh a’ Chomataidh beachd air cuspairean leithid:
· na buannachdan do chlann, do theaghlaichean agus do dh’eaconamaidh na h-Alba san fharsaingeachd à tasgadh ann an cùram-cloinne
· an gabhadh na ceanglaichean eadar na tionnsgnaidhean mu chomas-cosnaidh don òigridh ann an Alba agus anns an Rìoghachd Aonaichte an-dràsta leasachadh.
Craoladh is cultar
Gabhaidh a’ Chomataidh beachd air cuspairean leithid:
- na h-ullachaidhean practaigeach, reachdail, teicnigeach agus ionmhasail a bhiodh a dhìth gus Seirbheis Craolaidh Albannach a stèidheachadh
- a’ bhuannachd a dh’fhaodadh tighinn do dh’Alba na rachadh an toradh cultarail is cruthachail aice a chur an cinn na b’fharsainge
- mar a dh’fhaodadh, nan robh bhòt seadh ann, cumhachdan ùra thairis air an eaconamaidh agus lìon dioplòmasach is malairt thall thairis roinnean cultarail is cruthachail na h-Alba a bhrosnachadh.
Cùl-fhiosrachadh
Gheibhear barrachd fiosrachaidh mun ghairm fianais air duilleag-lìn na Comataidh:
http://www.scottish.parliament.uk/parliamentarybusiness/CurrentCommittees/29800.aspx