13.01.2014
Tha atharrachaidhean a thathar a’ moladh a chuireadh às do Chomataidhean Cuairtean Phrìosanan air an stiùireadh le luchd saor-thoileach agus a chuireadh nan àite dà ìre de luchd-sgrùdaidh le pàigheadh is gun phàigheadh, air a bhith air an ceasnachadh le Comataidh a’ Cheartais ann an aithisg a chaidh fhoillseachadh an-diugh.
Tha na Comataidhean Cuairtean Phrìosanan a tha ann an-dràsta nam buidhnean reachdail a chumas sùil air cor nam prìosanan agus a bhios a’ sgrùdadh iarrtasan is gearanan le prìosanaich. Chruthaicheadh an reachdas a thathar a’ moladh dà dhreuchd ùr de luchd-sgrùdaidh phrìosanan le pàigheadh is gun phàigheadh, a thigeadh le chèile fo rianachd Àrd-neach-sgrùdaidh A Mòrachd air Prìosanan na h-Alba.
Anns an aithisg aice air dreachd Òrdan Ath-leasachadh Sheirbheisean Poblach (Comataidhean Cuairtean Phrìosanan (Alba) 2014 a thathar a’ moladh, tha Comataidh a’ Cheartais air dragh a chur an cèill a thaobh mar a ghleidheas an dà sheòrsa de sgrùdadh neo-eisimeileachd ann an obrachadh mas e gun tig iad fo Ard-neach-sgrùdaidh nam Prìosanan.
Tha a’ Chomataidh cuideachd ag iarraidh dèanamh cinnteach gum bi prìosanaich mothachail air an diofar eadar an dà sheòrsa de luchd-sgrùdaidh agus na dleastanasan a tha aca.
Thuirt Neach-gairm Chomataidh a’ Cheartais Cairistìona Ghreumach BPA:
“Ged a tha a’ Chomataidh againn a’ cur fàilte air a’ cheum gus a dhèanamh cinnteach gum bi sgrùdadh air prìosanan ann an Alba a rèir *protocol nan Dùthchannan Aonaichte an aghaidh creòtachd (torture), tha ceist oirnn cuideachd mu na h-ullachaidhean a thathar a’ moladh.
“Chan eil sinn cinnteach gu bheil feum air dà ìre de sgrùdadh agus mas e gum bi dreuchdan diofraichte aig luchd-sgrùdaidh le pàigheadh is gun phàigheadh, leithid ann a bhith a’ gabhail gnothaich ri ceistean aig prìosanaich, dh’fhaodadh e breisleach dha-rìribh a chruthachadh am measg nam prìosanach.
“Feumaidh dealachadh soilleir a ghabhas tuigsinn a bhith ann eadar dreuchdan an luchd-sgrùdaidh. Ma thathar, mar eisimpleir, ri burraidheachd air prìosanach, is dòcha nach biodh e a’ faireachdainn gum faodadh e earbsa a chur ann an oifigear pàighte, ach gum faodadh e bruidhinn ri neach-sgrùdaidh saor-thoileach a bhios a’ tadhal air a’ phrìosan gu cunbhalach.”
Cùl-fhiosrachadh
Chaidh an dreachd a thathar a’ moladh air Òrdan Ath-leasachadh Sheirbheisean Poblach (Comataidhean Cuairtean Phrìosanan) (Alba) 2014 (“dreachd an Òrdain”) a leagail Dihaoine 4 Dàmhair 2013.
Tha dreachd an Òrdain a’ dèanamh atharrachaidhean air Achd nam Prìosanan (Alba) 1989 gus cur às do Chomataidhean Cuairtean Phrìosanan agus dreuchdan luchd-sgrùdaidh phrìosanan le pàigheadh is gun phàigheadh a chruthachadh, a thèid an dithis aca a chur ann an dreuchd le Àrd-neach-sgrùdaidh A Mòrachd air Prìosanan na h-Alba.
Tha a’ Chomataidh a’ toirt freagairt air co-chomhairleachadh reachdail air dreachd an Òrdain. Feumaidh Riaghaltas na h-Alba an aithisg seo a chur anns an àireamh mus nochd e an t-Òrdan deireannach air an gabh a’ Phàrlamaid beachd.
*Protocol Roghainneil gu Còmhdhail nan Dùthchannan Aonaichte an Aghaidh Creòtachd (OPCAT)
Contact information
Media information
Committee information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on:
