Faighnichidh Comataidh Co-ionannachd Chothrom, a bheil athraichean singilte a’ faighinn cothrom na Fèinne?

Tha Comataidh Co-ionannachd Chothrom aig Pàrlamaid na h-Alba airson ’s gun tèid na beàrnan seo a lìonadh agus tha iad air iarrtas air fianais fhoillseachadh a dh’fhaighnicheas de dh’athraichean singilte agus de dh’athraichean aig a bheil cùram roinnte freagairt a thoirt seachad a thaobh mar a chaidh dhaibh fhèin. 

Tha a’ Chomataidh airson cluinntinn mu dheidhinn ceist àraidh làitheil sam bith cho math ri na dùbhlain a bhios ro athraichean anns an ionad-obrach, no ann an suidheachadh teaghlaich no sòisealta. A bheil dùbhlain sònraichte ceangailte ri airgead no suidheachaidhean a thaobh ruigsinneachd is cùram an cuid cloinne? Dè seòrsa taic is seirbheisean a tha ann do dh’athraichean singilte, ’s a bheil iad seo a’ coileanadh am feumalachdan? Am faigh athraichean singilte cothromachd-ruigsinneachd air raon nan goireasan poblach ’s iad a-muigh len cuid cloinne? 

Thuirt Neach-gairm na Comataidh, Mairead NicCullaich BPA: 

“Tha fhios againn gu bheil tuilleadh theaghlaichean le athraichean singilte mar cheann orra na riamh roimhe, ach chan eil dealbh cuimseach ann dhe na bhios an dàn do dh’athraichean singilte agus do dh’athraichean le cùram roinnte a thaobh an cuid cloinne ann an Alba. Is rud e sin a tha ar rannsachadh ag amas air atharrachadh. 

“Ged a tha sinn fortanach gu leòr Christian Allard BPA – fear a bha thall ’s a chunnaic, rud luachmhor a thaobh ar rannsachaidh – a bhith air ar Comataidh, tha sinn glè mhòr airson ’s gun cluinn sinn o na ciadan de dh’athraichean singilte eile thar Alba mu na dùbhlain pragtigeach, sòisealta is pearsanta fa leth a bhios romhpasan cuideachd.” 

Ruigear gairm airson fianais mu athraichean singilte tron cheangal shìos, agus tha seo fosgailte gu ruige 21 Gearran 2014: 

Comataidh Co-ionannachd Chothrom 

Cùl-fhiosrachadh 

Ann an 2012, b’ iad athraichean nan aonar cinn air 400,000 teaghlach, a’ riochdachadh 13.5% dhen a h-uile teaghlach le aon phàrant san RA a-rèir Oifig nan Staitistigean Nàiseanta (OSN). Le meud cuibheasach teaghlaich aig 2.32, tha am fiogar sin a’ riochdachadh 927,000 neach san RA. 

Tha 29,932 pàrant fireannach aonair aig a bheil clann a tha an eisimeil agus gun a bhith an eisimeil orra ann an Alba, a-rèir Suirbhidh an Luchd-obrach o Oifig nan Staitistigean Nàiseanta. 

Tòisichidh Comataidh Co-ionannachd Chothrom air fianais-bheòil a ghabhail mar phàirt dhen rannsachadh aca ann an Earrach 2014.