Seirbheis poileas ionadail ga chur air mullach clàr-obrach

03.10.2013

Tha Fo-chomataidh a’ Cheartais air Seirbheis a’ Phoileis air aontachadh an ath sheisean-fianais aca air 31 Dàmhair a chomharrachadh gus beachdachadh air seirbheis poileas ionadail.

Tha Fo-chomataidh a’ Cheartais air Seirbheis a’ Phoileis air aontachadh an ath sheisean-fianais aca air 31 Dàmhair a chomharrachadh gus beachdachadh air seirbheis poileas ionadail.

 

Nì e sgrùdadh air molaidhean Poileas Alba ag èirigh bhon lèirmheas aca air solarachadh an deasc poblach agus tha iad a’ toirt cuireadh do Àrd Chonnstabal Poileas Alba Stephen House, COSLA agus Seirbheis Sgrùdaidh na Ban-rìgh air Poileas na h-Alba pàirt a ghabhail anns a’ choinneimh.

Thuirt Cairistìona Ghreumach BPA an-diugh:

“Leis gu bheil barrachd is barrachd dragh ga nochdadh a thaobh seirbheis a’ phoileis sa choimhearsnachd againn, a bharrachd air na molaidhean a bhith a’ tarraing air falbh agus a’ lughdachadh solarachadh deasc poblach agus coltas gu bheileas gu bhith ag àbhaisteachadh chleachdaidhean seirbheis a’ phoileis air feadh na h-Alba, feumaidh sinn sgrùdadh nas mionaidich a dhèanamh air a’ chuspair seo.”

“Dh’aontaich ar Comataidh feasgar an-diugh gu bheil e deatamach cluinntinn bhon fheadhainn a tha aig a’ mhullach agus mu na seallaidhean a tha aca air a’ chuspair chudromach seo. Leigidh ar coinneamh air 31 Dàmhair leinn cluinntinn bhon fheadhainn a tha aig ìre ro-innleachdail mus fhaigh sinn fianais bho chuid eile leithid ùghdarrasan ionadail, buidhnean poileis agus buidhnean coimhearsnachd aig a’ ghrunnd”.

Cùl-fhiosrachaidh

Is e seo fo-chomataidh de Chomataidh a’ Cheartais a chaidh a stèidheachadh gus sùil a chumail air mar a tha Achd Ath-leasachaidh Seirbheis Poileis is Smàlaidh (Alba) 2012 ag obair, mar a bhuineas sin ri seirbheis a’ phoileis. Le bhith a’ cruthachadh fo-chomataidh tha sin a rèir riatanas stèidhichte fo Achd 2012 airson gun dèan Pàrlamaid na h-Alba ullachadh gus lèirmheas a dhèanamh agus aithris mu choileanadh na h-Achd. Tha an Achd a’ cur aon fheachd nàiseanta an àite na h-ochd feachdan poileis sgìreil a bha ann an Alba, ’s e sin Seirbheis Poileas na h-Alba, fo shùil Ùghdarras Poileas na h-Alba.