30.09.2013
Tha comataidh aig Taigh an Ròid ri rannsachadh a chumail air coiteachadh (lobbying) gus faighinn a-mach a bheil duilgheadas ann an Alba, an dara cuid "ann am fìrinn no ann am beachd".
Tha Comataidh Inbhean, Dòighean-obrach agus Cur-an-dreuchd Poblach ri beachd a ghabhail cuideachd air na ceuman a bhiodh a dhìth gus leasachadh a thoirt air follaiseachd agus an cuidicheadh toirt a-steach clàr reachdail luchd-choiteachaidh gus aghaidh a thoirt air a leithid de dhuilgheadas.
Tha an gluasad leis a’ Chomataidh a’ tighinn an dèidh do Riaghaltas na h-Alba cur an cèill (13 Ògmhios 2013) gu bheil san amharc aige reachdas anns an raon seo a thoirt a-steach anns an t-seisean seo den Phàrlamaid (2011 gu 2016).
Agus i a’ cur a-mach gairm fianais bho phàrtaidhean le ùidh sa chùis, thuirt Eilidh Eadie BPA, Leas-neach-gairm na Comataidh:
“Ri linn an rannsachaidh seo, nì a’ Chomataidh againn sgrùdadh air ceist a’ choiteachaidh agus cothrom air na Buill.
“Is e an t-amas as motha a bhios againn feuchainn a bheil duilgheadas ann, an dara cuid ann am fìrinn no ann am beachd, le coiteachadh ann an Alba, agus dè na ceuman a bu chòir a ghabhail gus aghaidh a chur air gin sam bith de na ceistean a shònraichear.
“Bu mhaith leis a’ Chomataidh beachdan fhaighinn air na ceistean seo mar sin. Gu sònraichte, tha a’ Chomataidh ag iarraidh bheachdan air a’ mholadh mu chlàr reachdail de luchd-coiteachaidh, cò a bu chòir a bhith air a leithid de chlàr, ciamar a bhiodh e ag obrachadh agus dè na ceuman eile a dh’fhaodadh a bhith a dhìth gus ionracas agus misneachd aig a’ phoball anns an dòigh san tèid co-dhùnaidhean a dhèanamh a dhearbhadh.”
Is e raon-ùghdarrais rannsachadh na Comataidh:
- Sgrùdadh a dhèanamh a bheil duilgheadas ann, an dara cuid ann am fìrinn no ann am beachd, le coiteachadh agus, mas e gu bheil, an dòigh as èifeachdaiche sam faodar aghaidh a chur air seo;
- Gu dè an ìre dham biodh clàr de luchd-coiteachaidh na chuideachadh leis a’ mhodh-obrachaidh seo, cò a bu chòir a bhith air a leithid de chlàr agus mar a ghabhadh obrachadh; agus
- Am feumte ceuman eile a ghabhail gus leasachadh a thoirt air còiread (probity) is follaiseachd anns an raon seo.
Is e an ceann-latha deireannach airson fhreagairtean don rannsachadh 10 Faoilleach 2014
Cùl-fhiosrachadh
Air 13 Ògmhios 2013, chuir Riaghaltas na h-Alba an cèill gun dèan e reachdas anns an t-seisean seo den Phàrlamaid gus na molaidhean a thogadh an toiseach le Niall MacFhionnlaigh BPA a chur an gnìomh.
Air 17 Cèitean 2013, chuir Niall MacFhionnlaigh BPA moladh deireadh an làthair airson bile bhall, a bheireadh air daoine is air buidhnean a bhios a’ coiteachadh Bhall, Ministearan na h-Alba, no oifigearan poblach buntainneach, an dara cuid às an leth fhèin no às leth treas pàrtaidhean, fiosrachadh buntainneach mun ghnìomhachd aca a chlàradh ann an clàr air fhoillseachadh.
Ann an Seisean 1 de Phàrlamaid na h-Alba, ghabh Comataidh nan Inbhean rannsachadh os làimh às an tàinig mar thoradh bhuaipe ‘1st Report 2002, Report on Lobbying’. Mhol an aithisg gun rachadh clàr reachdail de luchd-coiteachaidh a thoirt a-steach agus còd-giùlain saor-thoileach don luchd-choiteachaidh uile, ach cha deach a thoirt gu buil leis a’ Phàrlamaid.
Mhol an Aithisg air Coiteachadh cuideachd, ge-tà, ath-sgrìobhadh air Còd-giùlain nam Ball mu thagrachd air a pàigheadh a chaidh a thoirt a-steach dhan Chòd.
Tha Bile Follaiseachd Coiteachaidh, Iomairt Neo-Phàrtaidh agus Rianachd nan Aonaidhean-ciùird ga sgrùdadh le Pàrlamaid na h-Alba an-dràsta. Fo na laghan a thathar a’ moladh, dh’fheumadh daoine is companaidhean a’ coiteachadh mhinistearan is sheirbheiseach catharra cur an cèill cò na bha iad a’ riochdachadh.
Contact information
Media information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: