12.09.2013
Tha Comataidh an Ionmhais a’ cumail taic ri prionnsabail coitchinn Bile Cìsean Làraichean Sgudail (Alba) san aithisg ìre 1 aca, foillsichte an-diugh.
’S e am Bile seo an dàrna bile a chaidh a thoirt a-steach le Riaghaltas na h-Alba mar thoradh air Achd na h-Alba 2012. Tron Achd, chaidh cumhachdan a thiomnadh do Phàrlamaid na h-Alba cìsean a leigeil air gnothaichean a thaobh fearainn is togalaichean agus air na thèid a chur gu làraichean sgudail (bhon Ghiblean 2015).
Agus iad air fianais a chluinntinn mu dheidhinn na dh’fhaodadh a bhith mar “thurasachd sgudail”, cùis a bhuineas ri sgudail a thèid a thogail thar nan crìochan eadar Alba is Sasainn, tha a’ Chomataidh air iarraidh air an Riaghaltas mion-sgrùdadh a thoirt seachad a thaobh buaidh sam bith a dh’fhaodadh a bhith ann ri linn atharrachaidh sam bith air structair is reataichean-cìse làraichean sgudail na h-Alba.
Cuiridh a’ Chomataidh fàilte air molaidhean gus cìs làraichean sgudail a leigeil orrasan a dh’fhàgas sgudail gun ùghdarras gun chead air dhaibh làraichean neo-laghail ainmeachadh. Cuideachd, thathar ag iarraidh soilleireachaidh on Riaghaltas a thaobh an tèid tuilleadh maoineachaidh a chur air dòigh do bhuidhnean riaghlaidh a bhios ag obair gus dèiligeadh ri leithid seo de làraichean agus iad ainmeachadh.
Thuirt Neach-gairm Comataidh an Ionmhais, Coinneach Gibson BPA:
“Ged a tha sinn a’ cur fàilte air a’ Bhile seo, tha sinn ag iarraidh gun toir Riaghaltas na h-Alba seachad tuilleadh soilleireachaidh agus mion-fhiosrachaidh air ceistean àraid, nam measg cuin a thèid reataichean-cìse a shuidheachadh sna làithean ri teachd agus dè dh’fhaodadh tachairt mar thoradh air atharrachaidhean ann an reataichean-cìse air làraichean a thaobh gluasad sgudail eadar Alba is Sasainn.
“Tha sinn cuideachd a’ creidsinn gur e deagh mholadh a th’ ann gun tèid a’ chrìoch chreideis a chur am meud a thaobh na bheirear seachad de thabhartasan gu Maoin Choimhearsnachd nan Làraichean sgudail, a sholaraicheas maoin do phròiseactan coimhearsnachd no àrainneachd ann an àiteachan far am bi buaidh aig làraichean sgudail orra. Cuiridh sinn taic ris a’ phrionnsabal gur h-iad na coimhearsnachdan sin air am bi a’ bhuaidh as motha aig làraichean sgudail a bu chòir a’ bhuannachd as motha fhaotainn on mhaoin.”
Cùl-sgeul
’S e am Bile seo an dàrna fear a-mach à trì dhiubh a thèid a thoirt a-steach le Riaghaltas na h-Alba mar thoradh air Achd na h-Alba 2012. Fhuair Bile Cìse Gnothaichean Fearainn is Togalaichean (Alba) Aonta Rìoghail air 31 Iuchar agus tha Riaghaltas na h-Alba air ainmeachadh gun tèid Bile Cumhachdan Cìse is Teachd-a-steach na h-Alba a thoirt a-steach nas fhaide air adhart as t-fhoghar
Fios conaltraidh
Fios conaltraidh
Fios comataidh
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on:
