03.09.2013
Chaidh fear de na pròiseactan ealain coimhearsnachd as motha riamh ann an Alba, a dh’innseas sgeul mheasgaichte na h-Alba bho na linntean ro-eachdraidh gu ruige ar linn fhèin, a thoirt am follais airson a’ chiad uair aig Pàrlamaid na h-Alba leis an Oifigear Riaghlaidh, Am Ball Fìor Urramach Tricia Marwick BPA.
Agus i 143 meatair a dh’fhaid, ’s i Sàr-obair-ghrèis na h-Alba tè dhe na tapastraidhean as fhaide air an t-saoghal. Glacaidh na 160 pannalan mion-àlainn amannan àraid ri linn eachdraidh 420 millean bliadhna na h-Alba. Chaidh am pìos sònraichte ealain seo a chur ri chèile an toiseach leis an ùghdar Albannach Alexander McCall Smith, cuide ris an eachdraiche Alasdair Moffat is an neach-ealain Anndra Crummy.
Thug mìle neach-fuaigheil bho aois 4 gu 94 eachdraidh na h-Alba beò tro obair-ghrèis. Thug an obair còrr is 50,000 uairean a thìde gus a crìochnachadh agus thèid a taisbeanadh ann am Prìomh Thalla Pàrlamaid na h-Alba bho 03 – 21 Sultain 2013.
Thuirt an t-Oifigear Riaghlaidh:
“Tha a bhith a’ faicinn na Tapastraidh air a toirt am follais gu h-iomlan dìreach mìorbhaileach. Tha e iomchaidh gun rachadh an Tapastraidh seo, air a dèanamh le muinntir na h-Alba air sgàth muinntir na h-Alba, a thoirt am follais ann am Pàrlamaid ar nàisein.
“Tha meud a’ phròiseict fìor mhòr ach tha gach rud beag mion as a h-uile pannal gu soilleir nochdte a’ sealltainn eachdraidh shaidhbhir ioma-fhillte na h-Alba. Tha buaidh mhòr iomlan Sàr-obair-ghrèis na h-Alba mar theisteanas air na h-uairean de shaothair is de chruthachaileachd a chaidh a chur innte le mìle neach-fuaigheil bho air feadh na h-Alba.”
Lean a’ Bh.ph. Marwick:
“Bhrosnaichinn daoine bho thar na h-Alba tighinn a dh’fhaicinn na sàr-obair ealain seo. Chan eil leithid de dh’ealain eile ann a dh’innseas an uiread mu sgeulachd na h-Alba.”
Thuirt Alexander McCall Smith:
’S e seo latha mìorbhaileach don neach-ealain is do na ciadan de luchd-fuaigheil a bha air chùl a’ phròiseict seo. An-diugh thathar a’ comharrachadh deireadh ciad phàirt de shaoghal na tapastraidh seo – ìre a tòiseachaidh agus a cruthachaidh. Nis tòisichidh sinn air an dàrna ìre, nuair a thòisicheas obair mhaireannach na tapastraidh. Agus ’s e tha sin a’ ciallachadh ach gun toirear tlachd do na mìltean de dhaoine a chì i gach bliadhna.
“Tha eachdraidh na h-Alba fìor tharraingeach. Bheir an tapastraidh seo an eachdraidh is an sgeul sin beò air dòigh nach gabh a leithid a dhèanamh le h-aon obair-ealain sam bith eile. ’S e a tha sinn a’ faicinn ri linn a toirt am follais aig Pàrlamaid na h-Alba ach fosgladh-sùl don t-saoghal dhe ulaidh a tha làn àilleachd iongantach is ùidh tharraingeach.”
Cùl-sgeul
Chuir an t-Oifigear Riaghlaidh a’ chiad fhuaigheal agus am fuaigheal mu dheireadh ri Sàr-Obair-Ghrèis na h-Alba.
Thèid an tapastraidh a thaisbeanadh ann am Prìomh Thalla Pàrlamaid na h-Alba eadar 3-21 Sultain (thoiribh fa-near gu bheil a’ Phàrlamaid fosgailte Diluain-Disathairne). Tha e saor ’s an-asgaidh faotainn a-steach a dh’fhaicinn na Tapastraidh.
Cuideachd, bidh grunn thachartasan air an cumail sa Phàrlamaid gus cruthachd na Tapastraidh a chomharrachadh, nam measg òraid le Alexander McCall Smith ’s e a’ cur ainm ri leabhar mu dheidhinn mar a rinneadh an Tapastraidh.
Ann a bhith a’ toirt dealbh àlainn air eachdraidh na h-Alba, on àm san robh i mar thìr a bha glaiste fon eigh ’s air a cruthachadh leis an èigheanach-shiubhail, gu ath-ghairm Pàrlamaid na h-Alba ann an 1999, tha na pannalan a’ sealltainn cho tarraingeach is a bha eachdraidh, saidheans, cultar is dùthchas, tionnsgalachd is poilitigs na h-Alba thar nan linntean.
Contact information
Media information
- Kirsty Rimmer: 0131 348 6085
- Text Relay calls welcome
- kirsty.rimmer
@scottish.parliament.uk
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: