26.03.2013
Chaidh treòr Mhinistearan agus iomairt a thogas aire a’ mhòr-shluaigh gun lethbhreith a dhèanamh air Luchd-Ròmanaidh/Luchd-Siubhail iarraidh le Comataidh Co-ionannachd Chothroman san aithisg aca a chaidh fhoillseachadh an-diugh.
Cuiridh an rannsachadh Far am bi Luchd-Ròmanaidh/Luchd-Siubhail nan Còmhnaidh cuideam air an fhìor fhearg a dh’fhairicheas an dà chuid a’ choimhearsnachd agus a’ Chomataidh gu bheil na ceistean ’s na molaidhean ceudna a thog a’ Chomataidh a bh’ ann roimhe ann an 2001 fhathast gun fhuasgladh.
Thuirt Neach-gairm Chomataidh Co-ionannachd Chothroman, Màiri Nic a’ Phì BPA:
“Agus sinn fhèin air na droch àiteachan a thathar an dùil far am bu chòir Luchd-Ròmanaidh/Luchd-Siubhail fuireach fhaicinn, a dh’aindeoin iad a bhith a’ pàigheadh an cuid màil is cìs-chomhairle, tha e gu tur soilleir dhuinne gur mithich do Riaghaltas na h-Alba, do COSLA ’s do dh’ùghdarrasan ionadaile a’ chùis a ghabhail os làimh.
“Feumaidh ro-innleachd nàiseanta a bheir thaic do dh’ùghdarrasan ionadail a thaobh ro-innleachdan taigheadais do Luchd-Ròmanaidh/Luchd-Siubhail, cho math ri iomairt nàiseanta a thogas aire a chor is gun dèanar cinnteach nach tèid gabhail ri aon lethbhreith an aghaidh Luchd-Ròmanaidh/Luchd-Siubhail, a bhith air an tòiseachadh agus air an treòrachadh le Riaghaltas na h-Alba.
“Dhà bhliadhna dheug an dèidh don chiad aithris air Luchd-Ròmanaidh/Luchd-Siubhail a bhith air fhoillseachadh, tha sinne airson dèanamh cinnteach gun tèid rudeigin a dhèanamh an turas seo le Riaghaltas na h-Alba, COSLA agus na h-ùghdarrasan ionadail.”
’S e beachd Chomataidh Co-ionannachd Chothroman gur e a bhith a’ cur aghaidh ri lethbhreith aig ìre nàiseanta is coimhearsnachd an aon dòigh ’s gun tèid bacaidhean leantainneach air leasachadh laraichean-campachaidh a bhriseadh sìos, rud a chuidicheas Luchd-Ròmanaidh/Luchd-Siubhail ann a bhith a’ faighinn làn-chothrom air cùram-slàinte, foghlam is fastachd, rudan a tha a dhìth gu mòr mòr orra.
Nì a’ Chomataidh ath-sgrùdadh air freagairtean o Riaghaltas na h-Alba ’s o COSLA a thaobh an dà chuid an aithisg seo agus an aithisg air Luchd-Ròmanaidh/Luchd-Siubhail agus Cùram ro Iuchar 2013.
Cùl-sgeul
Ann an 2012, chuir Comataidh Co-ionannachd Chothroman romhpa leantainn air adhart le obair nan comataidhean a chaidh roimhe a thaobh beatha Luchd-Ròmanaidh/Luchd-Siubhail na h-Alba a chur am feabhas. Chaidh a’ chiad aithisg-rannsachaidh, Luchd-Ròmanaidh/Luchd-Siubhail agus Cùram, fhoillseachadh ann an Sultainn 2012 agus leig seo am follais gun robh duilgheadasan droch-shlàinte a-mach à cuimse am measg na coimhearsnachd. Chaidh an aithisg a tha ann an-dràsta, Far am bi Luchd-Ròmanaidh/Luchd-Siubhail nan Còmhnaidh, a chur air bhog ann am Màrt 2012 agus thadhail a’ Chomataidh air làraichean ann an Dùn Èideann, Dail Chè, Peairt, Baile Chloichridh, an t-Òban agus Ceann Loch Gilp gus droch stait nan làraichean fhaicinn dhaibh fhèin. Cuideachd, chum a’ Chomataidh coinneamh taobh-a-muigh aig Làrach Luchd-Siubhail Chluain Teartaidh, faisg air Obar Dheathain, ann an Gearran 2013.