Comataidh a’ cur fàilte air prionnsapalan airson leasachadh foghlam às dèidh aois 16

20.03.2013

Chuir Comataidh Foghlam is Cultar Phàrlamaid na h-Alba taic, le mòr-chuid, ri prionnsapalan coitcheann Bile Foghlam Às Dèidh aois 16 (Alba) ach tha draghan aca mun reachdas a tha san amharc.

’S e amas a’ Bhile ach riaghladh earrannan foghlam àrd-ìre a leasachadh, agus cothrom faotainn a-steach do dh’oilthighean na h-Alba a leudachadh. San aithisg aca, chuir a’ Chomataidh taic ri slighe a’ phoileasaidh ach chuir iad cuideam air caochladh raon far am bu chòir do Riaghaltas na h-Alba agus feadhainn eile tuilleadh fiosrachaidh no soillearachaidh a thoirt seachad.

 

Thuirt Neach-gairm na Comataidh, Stewart Maxwell BPA:

 

“Chaidh aontachadh san fharsaingeachd gum feum earrannan foghlam àrd-ìre na h-Alba a bhith air an ath-leasachadh gus dèanamh cinnteach gun cuir iad cothroman beatha dhaoine òga am feabhas. Gidheadh, an dèidh dhuinn èisteached ri fios is fianais tha sinn deimhinne gum feum Riaghaltas na h-Alba soillearachadh a thoirt dhuinn air pàirtean àraid den Bhile, gu sònraichte far am buin seo ri roinneachadh nan colaistean.

 

“Cuideachd, dh’iarr sinn air Riaghaltas na h-Alba tuilleadh fiosrachaidh a thoirt dhuinn mu ciamar a dh’obraicheas stuctairean ùra nan colaistean agus mìneachadh a thoirt air na fo-phrionnsapalan a thaobh na tha san amharc aca de dh’ath-leasachadh bùird nan colaistean.

 

“Thathar cuideachd a’ dèiligeadh ri ceuman sa Bhile gus cothrom faotainn a-steach do dh’oilthighean na h-Alba a leudachadh. Cuiridh sinn fàilte air a’ phrionnsapal gun tèid cothrom a leudachadh agus tha sinn air faighneachd dè thachradh do dh’oilthigh sam bith a dh’fhàilnigeadh ann a bhith a’ coileanadh aonta a thaobh cothrom a leudachadh. Cuideachd, tha sinn air iarraidh gun tèid innse dhuinn gu h-às ùr is gu cunbhalach mu oidhirpean nan oithighean air cothrom a leudachadh, oir is e seo raon far a bheil Riaghaltas na h-Alba a’ sireadh leasachadh nach beag.”

 

Molaidhean eile san aithisg:

 

Riaghladh Foghlam Àrd-Ìre

Dh’iarr a’ Chomataidh—

·         soillearachadh air ciamar a sheachnas an reachd agus còd-riaghlaidh ùr nan oilthighean a bhith a’ dol air iomrall ann an raointean neo-iomchaidh de stiùireadh nan oilthighean 

·         beachd Riaghaltas na h-Alba a thaobh am bu chòir no nach bu chòir don Bhile a bhith air atharrachadh a rèir draghan nan oilthighean gun rachadh an neo-eisimeileachd a mhilleadh mar bhuil air a’ Bhile.

 

Cothrom

·         Tha a’ Chomataidh air faighneachd de Riaghaltas na h-Alba ciamar a sheachnar an cunnart a dh’fhaodadh a bhith ann gun gabh oilthighean ri targaidean laga a thaobh leudachaidh.  

Co-roinn dàta 

·         Dh’iarr a’ Chomataidh mìneachadh mionaichte air Leasachadh Sgilean na h-Alba mu ciamar a chumas iad taic fhor-ghnìomhach ri daoine òga a tha fo chunnart sgur a dh’ionnsachadh no a thrèanadh.  

Cùl-sgeul

Tha Bile Foghlam Iar-16 (Alba) a’ toirt dearbhadh reachdail do dh’iomadh atharrachadh ann am foghlam iar-16 na h-Alba.

 

’S e ath-eagrachadh nan colaistean am pàirt as motha den Bhile agus ’s e a thachras mar bhuil ach roinnean singilte agus roinnean ioma-cholaisteach. Thèid buidhnean ro-innleachdail roinneil a chruthachadh airson nan roinnean ioma-cholaisteach, agus sgaoilidh iadsan maoineachadh is nì iad planadh a thaobh ullachaidh thar na roinne.

 

Tha sia prìomh ullachaidhean ann, a dhèiligeas ris na raointean a leanas—

 

·         Riaghladh nan oilthighean

·         Leudachadh cothroim 

·         Cuibhreachadh air prìsean teagaisg

·         Roinneachadh nan colaistean

·         Ath-sgrùdadh air foghlam àrd-ìre so-mhaoineachadh 

·         Co-roinn dàta 

 

Gheibhear lethbhreac de dh’aithisg na Comataidh an seo;