05.03.2013
’S i Buaidh nam Ban fòcas Latha Eadar-nàiseanta nam Ban a thèid a chomharrachadh aig Pàrlamaid na h-Alba Disathairne seo tighinn.
Gabhaidh ceudan de bhoireannaich pàirt san tachartas bhliadhnail seo aig a bheil an t-amas na thug boireannaich a-mach a chomharrachadh agus dol-an-sàs bhoireannaich a thaobh buaidh a thoirt air poileasaidhean a mheudachadh.
Thuirt Leas-Oifigear-Riaghlaidh Elaine Nic a’ Ghobhainn BPA, a bhios mar chathraiche air an tachartas:
“Tha Pàrlamaid na h-Alba aon uair eile glè thoilichte a bhith an-sàs ann an Latha Eadar-nàiseanta nam Ban. Tha mi a’ cur meal-a-naidheachd air Còmhdhail nam Ban-Albannach agus iad a’ comharrachadh 10 Bliadhna. Tha am fòram seo cudromach ann a bhith a’ toirt a h-uile seòrsa de bhoireannach a-steach don Phàrlamaid aca gus cùisean a bheir buaidh orra nam beatha làitheil a dheasbad.
“Bidh deasbad na bliadhna seo a’ comharrachadh bhoireannaich a fhuair seachad air bacaidhean ann am foghlam, fastachd ’s ann am beatha shòisealta is phoilitigeach gus buaidh a thoirt air an t-saoghal sa bheil iad beò. Bidh an sgioba spreagach de luchd-labhairt ag amas air a h-uile boireannach a bhrosnachadh gus taic a chumail ri chèile, neo-ionannachd a chur fo dhùbhlan agus tuigsinn cuideachd gum faod iadsan fìor dhiofar a dhèanamh aig ìre ionadail, nàiseanta agus eadar-nàiseanta.”
Mar phàirt de thachartas na bliadhna seo thèid gluasad a thaobh Boireannaich is Obair a dheasbad agus cuiridh seo ri rannsachadh Boireannaich ann an Obair aig a’ Chomataidh Co-ionannachd Chothroman. Tha seo a’ dèiligeadh ri cùisean mar obair phàirt-ùine; sgaradh a thaobh dreuchd; cùram-cloinne; boireannaich ann an gnìomhachas; stiùir a thaobh tuarastal neo-ionann ann an ùghdarrasan ionadaile; agus mar a bhios seasamhan is ath-leasachaidhean ann an sochairean sòisealta a’ toirt buaidh air boireannaich ’s air teaghlaichean.
Thuirt Neach-gairm na Comataidh Mary Fee BPA, a bhios cuideachd a’ labhairt aig an tachartas:
“Tha ar Comataidh glè thoilichte a bhith mar phàirt de Latha Eadar-nàiseanta nam Ban agus nì sinn cinnteach gum bithear a’ dèiligeadh ri beachdan phearsanta bhoireannaich a thaobh mar a chaidh dhaibh ann a bhith a’ faighinn air adhart san ionad-obrach anns an rannsachadh againn, Boireannaich ann an Obair.”
Tha Pàrlamaid na h-Alba air tachartas a chumail a chomharraicheas Latha Eadar-nàiseanta nam Ban a h-uile bliadhna o 2007. Bidh Còmhdhail nam Ban-Albannach, a chomharraicheas 10 bliadhna, a’ cur an tachartas air dòigh, agus is iad luchd-labhairt na bliadhna-sa ach:
· Agnes Tolmie - Cathraiche Chòmhdhail nam Ban-Albannach agus neach-iomairt gnìomhach ann an gnothaichean bhan fad còrr is trithead bliadhna.
· Nicola Sturgeon BPA – Leas-Prìomh-Mhinistear agus Rùnaire a’ Chaibineit airson Bun-structair, Cur-an-Seilbh is Cathair-bhailtean.
· Margaret Curran BP – a bha na BPA agus i nis mar Rùnaire Stàite Dùbhlain na h-Alba.
· Maria Fyfe – a bha na BP Làbarach airson Cnoc Mhuire/Maryhill agus Cathraiche còmhlan-obrach Chòmhdhail Co-chruinneachadh Bun-reachdail na h-Alba airson riochdachadh co-ionann do bhoireannaich sa Phàrlamaid Albannach a bhathar san amharc.
· Mette Kindberg – Ceann-suidhe Chomataidh nam Ban de Dhùthchannan Aonaichte na Roinn Eòrpa-an t-Saoghail.
· Mary Fee BPA – Neach-gairm Chomataidh Co-ionannachd Chothroman aig Pàrlamaid na h-Alba a tha an ceart-uair ri rannsachadh air Boireannaich ann an Obair.
· Le bàrdachd ga h-aithris aig Liz Lochhead – Bàrd Albannach, dràmaiche, sgrìobhadair.
Cùl-sgeul
Tha Latha Eadar-nàiseanta nam Ban, a thèid a chumail gach bliadhna air 8 Màrt, na latha air feadh an t-saoghail a nì comharrachadh air na thug boireannaich a-mach ri linntean a dh’fhalbh, ri ar linn fhèin agus ri linntean ri thighinn, a thaobh chùisean phoilitigeach is shòisealta.
Thèid tachartas Latha Eadar-nàiseanta nam Ban a chumail aig Pàrlamaid na h-Alba air Disathairne 9 Màrt.
Dealbhan
Bidh dealbhan den tachartas ri fhaotainn o neach-camara Phàrlamaid na h-Alba Anndra Cowan ach fòn a chur gu 0131 348 5878 agus gabhaidh iad a luchdachadh a-nuas aig www.scottishparliamentphoto.com.
Fios conaltraidh
Fiosrachadh conaltraidh
Public information
Twitter @scotparl , @ParlAlba