Beachdan soilleir a dhìth mu challaidean àrda

05.10.2012

Tha callaidean àrda air coimhearsnachdan a dhealachadh thar nam bliadhnaichean. Tha comataidh aig Pàrlamaid na h-Alba ag iarraidh ar daoine a-nis fios a chur thuice leis na beachdan aca mun Bhile a chaidh a chur air adhart a tha a’ feuchainn ris an duilgheadas fhuasgladh.

Chaidh Bile nan Callaidean Àrda (Alba) a thoirt a-steach ann am Pàrlamaid na h-Alba le Marcas Dòmhnallach BPA air 2 Dàmhair 2012. Tha Comataidh Riaghaltas Ionadail is Ath-nuadhachadh ag iarraidh air daoine a-nis na beachdan aca a nochdadh air mar a tha san amharc anns a' Bhile aghaidh a chur air ceist nan callaidean àrda a bhios a' briseadh a-steach air tlachd reusanta à seilbh-dhachaigh.

 

Thuirt Neach-gairm na Comataidh Caoimhin Stiùbhart BPA:

 

“Chan eil teagamh nach eil de chomas aig callaidean àrda sradagan is fearg a thogail. Tha am Bile seo a’ feuchainn ri ullachaidhean a chur ri chèile a chuidicheadh gus barganachadh a dhèanamh, agus taic a thoirt do dh'ùghdarrasan ionadail gus connsachadh nach gabh rèiteach leis an fheadhainn a tha an sàs a shocrachadh.

 

"Is e na tha a' Chomataidh againn ag iarraidh faighinn a-mach a bheil e coltach gum bi na molaidhean sa Bhile ag obrachadh ann an da-rìribh. Tha sinn ag iarraidh cluinntinn bhon fheadhainn aig a bheil fiosrachadh anns an raon seo gus an tèid againn air beachd dha-rìribh a nochdadh ris a' Phàrlamaid ann am farsaingeachd am bu chòir gun tèid am Bile seo air adhart gus nach tèid.

 

Bu chòir do dhaoine agus do bhuidhnean aig a bheil ùidh sa chùis sgrìobhadh chun na Comataidh len cuid bheachdan air a' Bhile. Gheibhear barrachd fiosrachaidh air duilleagan na Comataidh air làrach-lìn na Pàrlamaid.

 

Bu chòir beachdan a chur, na h-uidhir ’s a ghabhas e dèanamh, ann an cruth dealanach agus ann an riochd MS Word gu:

highhedgesbill.lgrc@scottish.parliament.uk

Is e an ceann-latha mu dheireadh air an gabhar ri beachdan 6f Diardaoin 29 Samhain 2012.

Cùl-fhiosrachadh

Is e prìomh amas a’ Bhile “rèiteach a thoirt air ceist nan callaidean àrda a bhriseas a-steach air tlachd reusanta à seilbh-dhachaigh.”

 

Tha am Bile a’ cur an cèill gun tèid seo a thoirt gu buil le bhith a’ cur innleachd an sàs gus connsachadh ceangailte ri callaidean àrda a rèiteach a bheir cumhachdan às ùr do na h-ùghdarrasan ionadail gus aghaidh a thoirt air na ceistean seo. Cuiridh am Bile air chomas do na h-ùghdarrasan ionadail cosgaisean gus gnìomh a ghabhail gus aghaidh a thoirt air ceist mu challaid àrd iarraidh air ais. Chuir am Meòrachan-poileasaidh an cèill gum b’ e amas a’ Bhile dèanamh cinnteach gun tèid a’ chosgais do dh'ionmhas poblach gus connsachadh prìobhaideach mu challaidean àrda a rèiteach a chumail aig an ìre as ìsle a tha ann.

 

Aonan de mhìrean bunaiteach a’ Bhile, is e mìneachadh reachdail mu challaid àrd a stèidheachadh. Is e am mìneachadh a bheir am Bile air callaid àrd, callaid:

·         a tha air a cruthachadh uile-gu-lèir no air a' chuid as motha le sreath de dhà chraoibh no de dhà phreas a tha sìor-uaine no letheach sìor-uaine,

·         a dh’èireas gu àirde de chòrr is dà mheatair os cionn ìre na talmhainn, agus

·         a tha na bacadh air an t-solas.

 

Air los a’ mhìneachaidh seo “cha bhithear den bheachd gu bheil callaid na bacadh air an t-solas mas e gu bheil beàrnan innte a lùghdaicheas gu mòr a' bhuaidh shlàn a bheir i mar chomharradh-crìche aig àirde de bharrachd is 2 mheatair.”

 

Cha deach am Bile a chur chun na Comataidh gus beachd a ghabhail air fhathast. Bha a’ Chomataidh an urra, ge-tà, ri beachd a ghabhail air aithris a' Bhuill an ceannas mu na h-adhbharan gun comhairleachadh a chur mun mholadh mun Bhile agus is coltach mar sin gun tèid am Bile a chur chun na Comataidh.