16.08.2012
Don ochdamh bliadhna às dèidh a chèile, tha Pàrlamaid na h-Alba a’ cumail Fèis Phoilitigs aice. Ainmeil airson nan tachartas ann a tha nan dùbhlan is nam togail-inntinn, chan eil e diofraichte am-bliadhna nas motha. Nan lùib tha lèirsinn air na bhrosnaich George Wyllie, dealbh-cluiche mu dhithis neach-leantainn ball-coise an aghaidh a chèile air an glasadh suas ann an cealla-prìosain fad oidhche agus deasbad air daoine òga tàlantach.
Tha cliù air an Fhèis airson aghaidh a thoirt air cuspairean connspaideach agus a-màireach (17 Lùnastal), thèid sùil a thoirt air buidhneachas (sectarianism). Sa mhadainn gabhaidh luchd-foghlaim, stiùirichean-coimhearsnachd agus luchd-poileasaidh pàirt ann an ‘Còmhraidhean Albannach-Èireannach air Buidhneachas’. Nas fhaide air adhart air an fheasgar, thèid dealbh-cluiche àbhachdach soirbheachail Des Dillon ‘Singing I’m no a Billy he’s a Tim’ a thaisbeanadh.
Ann an ‘Tàlant nan daoine òga againn’, thèid deasbad a chumail air mar a bhrosnaicheas sinn daoine òga gus a dhol an sàs ann an cruthachalachd na dùthcha. Còmhla ris an Leas-oifigear Riaghlaidh Elaine Nic a’ Ghobhainn BPA bidh pannal de dh'aoighean cliùiteach, nam measg Ricky Ross à Deacon Blue agus Vicky Featherstone à Taigh-cluich Nàiseanta na h-Alba.
Am measg nan tachartas eile ann tha deasbad mun bhuaidh a thug George Wyllie air an fheadhainn òig leis an nighean aige Louise Wyllie agus luchd-deasbaid, nam measg an sgrìobhadair is neach-gleidhidh Murray Grigor agus am fear-ealain Roddy Buchanan.
Sa mhadainn, thèid a’ cheist a chur ann an ‘Alba – A bheil ANSIN anseo?’ a bheil ìomhaigh na h-Alba air a cur an cèill is an cruth leis na togalaichean is na h-àiteachan againn. Tha ‘Fuaimean, guthan agus a’ Phàrlamaid’ na sheisean eadar-ghnìomhach a nì sgrùdadh air cainntearachd phoilitigeach, guthan agus fuaim. Cuiridh an luchd-deasbaid ri saothair-ealain ùr a chaidh a bhrosnachadh le saoghal na Pàrlamaid bho latha gu latha.
San fheasgar, gabhaidh ‘Leabharlannan san t-saoghal dhidseatach’ beachd air mar a bheir teicneòlas ùr cothroman ùra do leabharlannan poblach ìomhaigh às ùr a chruthachadh agus bidh earrannan ann bho Microsoft, Leabharlann Nàiseanta na h-Alba, Touch Press agus Leabharlannan Cathair Dhùn Èideann.
Cuiridh ‘Uisge-beatha Albannach – Gaisgeach Ionadail no Tosgaire Eadar-nàiseanta’ a’ cheist am faod uisge-beatha Albannach bathar Albannach eile a stiùireadh agus thèid deasbad a chumail air an àite aig a’ ghnìomhachas ann an dualchas is na làithean air thoiseach ann an Alba.
Com-pàirtichean na Fèise
’S iad com-pàirtichean na fèise againn Urras Charnegie na Rìoghachd Aonaichte, Urras Charnegie Dhùn Phàrlain agus an com-pàirtiche againn sna meadhanan Iris Thaigh an Ròid.
Cothrom air clàr agus tiogaidean