06.07.2012
Thèid mar a bhios Alba na 'nàisean uisge' a rèir Bile Goireasan Uisge (Alba) a sgrùdadh le Comataidh Bun-structair is Cur an Seilbh Calpa Pàrlamaid na h-Alba.
'S e amas Riaghaltas na h-Alba gun cruthaich am Bile frèama a chor is gun toirear a' bhuannachd as fheàrr às goireasan uisge na h-Alba, oidhearp gus mar a stiùirear sin a leasachadh mar phrìomh phàirt dhe bhith a' coileanadh amasan farsainge an Riaghaltais a thaobh Nàisean Uisge. Uime sin, 's e moladh a' Bhile gum bi reachdas air chois thar raon farsaing chuspairean a bhuineas ri seirbheisean uisge is otrachais ann an Alba.
A' labhairt agus a' Chomataidh a' cur a dh'iarraidh fianaise, thuirt Neach-gairm Maureen Watt BPA:
"Leis a' bhile seo, bidh sinn a' coimhead ach an coilean na molaidhean a tha ann deagh gheallaidhean Nàisean Uisge. Tha e gu buannachd a h-uile neach gum bi ar goireasan luachmhor an dà chuid air an dìon agus air an cur gu feum gu h-iomchaidh.
"'S e prìomh ròl ar Comataidh ach sgrùdadh a dhèanamh air na poileasaidhean a chuireas Riaghaltas na h-Alba air adhart aig am bi buaidh air goireasan na h-Alba, eadar 's gu bheil iad nàdarra neo togte. Tha sinn ag iarraidh air daoine sgrìobhadh thugainn thar an t-samhraidh ach an leugh sinn is gun dèan sinn cnuasachadh air an fhianais sin mus dèan sinn co-dhùnadh a thaobh cò a tha sinn ag iarraidh tighinn a bhruidhinn rinn as t-fhoghar."
Tha a' Chomataidh air iarrtas mionaideach a chur a-mach airson fianaise a bhios mar chuideachadh ann a bhith a' meas beachdan neachan air leth agus bhuidhnean air na tha sa bhile, gu sònraichte:
1. Leasachadh goireasan uisge
2. Smachd air tarraing uisge
3. Obair Uisge na h-Alba
4. Ìre-feabhais uisge amh
5. Seirbheisean gnothachais
6. Ìre-feabhais obair otrachais
7. Òrdaighean a thaobh gainnead uisge
Gus cur ris an rannsachadh seo, faodar liosta de cheistean sònraichte a lìonadh.
Taobh a-staigh a' bhile tha molaidhean sònraichte gus na leanas a chur air dòigh:
· Dleastanas ùr air Ministearean na h-Alba gus dèanamh cinnteach gun tèid luach goireasan uisge na h-Alba a leasachadh tron chlàr Nàisean Uisge agus a chuireas mar fhiachaibh orra aithris a dhèanamh do Phàrlamaid na h-Alba gach trì bliadhna air mar a thathar a' coileanadh an dleastanais sin.
· Dleastanas ùr air Uisge na h-Alba a chuireas air adhart gun cleachd iad gach so-mhaoin gus lùths ath-nuadhaichte a chruthachadh, 's aig an aon àm a' dion coileanadh gach prìomh obair uisge is otrachais aca.
· Cumhachdan a bharrachd a thaobh 's gum bi Uisge na h-Alba a' tighinn a-steach gus sgrùdadh a dhèanamh air ìre-feabhais "uisge amh" (uisge a ghabhas òl) agus gus rannsachadh a dhèanamh air rud sam bith a dh'fhaodadh bualadh air ìre-feabhais leithid a dh'uisge.
· Eucoir ùr a thaobh geir, ola is saill a thig o ionadan gnothachais 's a thèid a-steach gu drèinichean poblach. Bhiodh eucoir a thaobh seo a' tarraing teirm suas ri 12 bhliadhna sa phrìosan aig a' char as motha, agus càin suas ri £40,000
Cùl-sgeul
Thathar an dùil gur h-i Comataidh Bun-structair is Cur an Seilbh Calpa a thèid a shònrachadh le Pàrlamaid na h-Alba mar a' phrìomh chomataidh a nì beachdachadh air Ìre 1 den Bhile.
Bidh dùil aig Comataidh Bun-structair is Cur an Seilbh Calpa beachdachadh air fianais sgrìobhte a chuirear a-steach cho math ri fianais-bheòil a thogail on t-Sultainn gu toiseach an t-Samhain, mus dèan iad aithris air prionnsabalan farsainge a' Bhile mu dheireadh Samhain 2012.
Tha ìomhaighean a' sealltainn an Neach-gairm air turas gu Ionad Giullachd Uisge Turaid airson cluinntinn mar a tha Uisge na h-Alba air an làrach a chleachdadh gus lùths a chruthachadh airson an ionaid 's airson 450 dachaigh. Am measg rudan eile, tha am Bile a' moladh gum bi dleastanas air Uisge na h-Alba luach an so-mhaoin agus an cuid eòlais a leasachadh agus cur air adhart cleachdadh an so-mhaoin airson lùths ath-nuadhaichte a chruthachadh, agus bha an Neach-gairm titheach air seo fhaicinn air a' chiad shealladh.
Call for evidence
- Contribute to the inquiry on the Water Resources (Scotland) Bill
Contact information
Media
Committees
Public information
- Telephone: 0800 092 7500
- Textphone users can contact us on 0800 092 7100
- We also welcome calls using the Text Relay service
- Text message: 07786 209888
- sp.info@scottish.parliament.uk
You can follow us on twitter @scotparl