18.06.2018
Tha Comataidh
Ionmhais agus Bun-reachd Thaigh an Ròid air tòiseachadh na h-ath ìre den sgrùdadh bhun-reachdail aca le
gairm-fianais air Frèaman-obrach Coitcheann na Rìoghachd Aonaichte.
Tha an gluasad a’ comharrachadh
toiseach obair ullachaidh mionaideach leis a’ chomataidh mus tèid
frèaman-obrach laghail agus poileasaidh ùra a stèidheachadh às dèidh Brexit air
feadh na RA agus raointean tiomnaichte.
Thuirt Neach-gairm na
Comataidh Ionmhais & Bun-reachd Brus Crawford
BPA:
“Tha an ath ìre seo nar
sgrùdadh bun-reachdail uabhasach cudromach, oir bidh frèaman-obrach cumanta a’
stèidheachadh ciamar a bhios grunn raointean poileasaidh ag obair air feadh na
RA agus dùthchannan tiomnaichte, co dhiù a tha e a’ buntainn ri gnìomhachas,
àiteachas no an àrainneachd.
“Rud eile a tha fìor chudromach
’s e gu bheil coltas ann gun inns am pròiseas leasachaidh fhrèaman-obrach
cumanta gu math tràth dè cho èifeachdach ’s a tha na dàimhean eadar Riaghaltas
na Rìoghachd Aonaichte agus instidiùdan tiomnaichte.”
Thuirt Mgr Crawford
cuideachd:
“Tha a’ chomataidh
againn mu thràth a’ coimiseanadh rannsachadh coimeasach eadar-nàiseanta air mar
a tha frèaman-obrach ag obair san Roinn Eòrpa, Canada agus Astràilia. Bidh sinn
cuideachd airson cluinntinn bho sgoilearan agus bho eòlaichean poileasaidh.
“Tha e duilich
mìneachadh cho cudromach ’s a tha sgrùdadh pàrlamaideach èifeachdach anns an
ath ìre den obair againn.”
Frèaman-obrach
Coitcheann na Rìoghachd Aonaichte – Gairm Fianais
Dh’aithnich a’ Chomataidh
san h-aithisg eadar-amail aca air Bile an AE (Tarraing a-mach) gu bheil “feum
air mòran obrach a dhèanamh a thaobh sgrùdadh air leasachadh agus aontachadh fhrèaman-obrach
coitcheann” agus “gu bheil seo na raon-obrach a tha air leth cudromach agus nithear
tuilleadh beachdachaidh air.”
Chomharraich a’ Chomataidh
grunn raointean a dh’fheumas tuilleadh sgrùdadh mionaideach:
·
Dè bu chòir dol an àite phròiseasan poileasaidh an
AE a th’ ann an-dràsta air feadh na RA;
·
Dèiligeadh ris a’ bheàrn riaghlaidh a thaobh
sgrùdadh, buileachadh agus cur an gnìomh fhrèaman-obrach;
·
An t-eadar-obrachadh eadar frèaman-obrach agus
rèiteachadh aontaidhean eadar-nàiseanta ùra, a’ gabhail a-steach co-chòrdaidhean
malairt shaor;
·
Maoineachadh dhleastanasan agus gheallaidhean a tha
ag èirigh bho fhrèaman-obrach.
Cuiridh a’ Chomataidh
fàilte air tagraidhean sgrìobhte a’ dèiligeadh ris na cùisean a chaidh
ainmeachadh gu h-àrd agus beachdan buntainneach sam bith eile a thaobh
leasachadh agus aontachadh fhrèaman-obrach coitcheann na Rìoghachd Aonaichte.
Is e an ceann-latha
airson fhreagairtean Dihaoine 31 Lùnastal 2018
Làn ghairm
fianais.
Cùl-fhiosrachadh
Earrann à
pàipear-fiosrachaidh SPICE
Is e prìomh
argamaid airson fhrèaman-obrach coitcheann san Rìoghachd Aonaichte gu bheil e
mòran nas coltaiche, mura bi iad ann, gu nochd sgaraidhean ann am poileasaidh
eadar diofar phàirtean den RA, nuair nach eil an RA fo smachd lagh an AE
tuilleadh. Chan eil eadar-dhealachadh ann
am poileasaidh eadar na ceithir dùthchannan san RA, na dhuilgheadas ann fhèin,
ged-thà. Gu dearbh, is e prìomh adhbhar tiomnadh cumhachd gu faod poileasaidh atharrachadh
a rèir shuidheachaidhean ionadail, agus mar sin faodar leasain ionnsachadh mu
dè na dòighean-obrach as fheàrr a th’ ann (mar phàirt de ‘obair-lann
poileasaidh’). Ach, mura h-eil inbhean cumanta ann dh’fhaodadh seo droch
bhuaidh a thoirt air cuid de raointean, mar eisimpleir le bhith a’ cur
uallaichean ùra air gnìomhachas no a’ cur bacadh air co-òrdanachadh chùisean poileasaidh
tar-chrìch. Is e an duilgheadas a bhith ag aithneachadh far am faodadh droch
bhuaidh eadar-dhealachaidhean poileasaidh a bhith dona gu leòr airson
cuingealachadh adhbharachadh air cruthachadh poileasaidh tiomnaichte.