04.04.2018
Tha Riaghaltas na h-Alba
an-diugh a’ beachdachadh air àrd-amasan leasaichte airson na h-Alba agus na tha e an
dòchas a choileanadh thar nan deich bliadhna a tha romhainn – ach dè an ìre gu
bheil na h-atharrachaidhean sin feumail agus freagarrach, agus dè an ìre gu
bheil sinn gan iarraidh?
Is iad seo an seòrsa cheistean air am bi Comataidh Riaghaltas Ionadail is Choimhearsnachdan Pàrlamaid na h-Alba a’ beachdachadh nuair a tha iad a’ sgrùdadh nan Cinn-uidhe Nàiseanta a leanas:
· Tha sinn a’ fuireach ann an coimhearsnachdan a tha in-ghabhalach, cumhachdach, seasmhach agus sàbhailte
· Bidh sinn a’ dèiligeadh ri bochdainn le bhith a’ co-roinn chothroman, beairteas agus cumhachd ann an dòigh nas cothromaiche
· Bidh sinn a’ fàs suas ann an àrainneachd ghràdhach, shàbhailte far a bheil spèis ga thoirt dhuinn, gus an ruig sinn àirde ar comas an
Tha na trì Cinn-uidhe Nàiseanta sin a’ toirt seachad tomhas farsaing de mhathas nàiseanta agus sòisealta, a’ gabhail a-steach raon de thargaidean eaconamach, sòisealta agus àrainneachdail. Tha gach toradh a’ mìneachadh dè tha Riaghaltas na h-Alba ag iarraidh a choileanadh, a’ gabhail a-steach a h-uile càil bho bhith a’ lìbhrigeadh sàr sheirbheisean poblach gu coimhearsnachdan làidir agus taiceil a thogail.
Thuirt Neach-gairm na Comataidh Riaghaltas Ionadail is Choimhearsnachdan, Bob Doris BPA:
“Is e prìomh adhbhar nan Cinn-uidhe Nàiseanta leasaichte seo sealladh soilleir a mhìneachadh airson an ama ri teachd, a’ toirt a-steach mar a lìbhrigeas sinn seirbheisean poblach deatamach agus mar a thogas sinn coimhearsnachdan làidir.
“Tha a’ Chomataidh againn a-nis ag iarraidh beachdan daoine fhaighinn air na h-atharrachaidhean a thathar a’ moladh a thaobh lèirsinn na h-Alba airson choimhearsnachdan agus seirbheisean poblach. A bheil na h-atharrachaidhean sin feumail agus freagarrach agus a bheileas gan iarraidh?
“Bidh sinn a’ bruidhinn air beachdan a gheibh sinn leis a’ Mhinistear agus Riaghaltas na h-Alba agus co-dhiù an lìbhrig na Cinn-uidhe Nàiseanta sin an seòrsa Alba a tha sinn uile ag iarraidh.”
Cùl-fhiosrachadh
Tha 40 latha aig Pàrlamaid na h-Alba gus a bheachdan a thoirt do Riaghaltas na h-Alba mu na h-atharrachaidhean a thathar a’ moladh, a’ tòiseachadh leis a’ Chomataidh Riaghaltas Ionadail agus Choimhearsnachdan a’ toirt cuireadh do Chomataidhean beachdachadh air na Cinn-uidhe leasaichte anns an raon-ùghdarrais aca.
Faigh a-mach tuilleadh mu obair na Comataidh Riaghaltas Ionadail agus Choimhearsnachdan air Cinn-uidhe Nàiseanta