29.03.2018
Chaidh eachdraidh
iongantach agus gaisgich Feachd Rìoghail an Adhair a chomharrachadh aig
Pàrlamaid na h-Alba a-raoir nuair a chumadh cuirm cuimhneachaidh 100 bliadhna an
RAF.
Bha an t-Oifigear Riaghlaidh aig Pàrlamaid na h-Alba, Coinneach Mac an
Tòisich BPA, a’ cumail an tachartais agus chuir e fàilte air Ceannard Ceann-feachd
an Adhair, buill den RAF agus caideatan-adhair bho air feadh na h-Alba gus ceud
bliadhna an RAF a chomharrachadh.
Tha a’ chuirm na phàirt de bhliadhna de chomharrachaidhean air feadh na
Rìoghachd Aonaichte ris an canar ‘RAF100’, a tha ag aithneachadh euchdan an
fheachd-adhair a’ dol bho Bhlàr Bhreatainn gu gnìomhan an latha an-diugh ann an
Afghanistan, Iorac agus Sioria. Bidh e cuideachd a’ brosnachadh dhaoine òga gus
na sgilean STEM aca a neartachadh agus beachdachadh air dreuchdan adhartach ann
an itealanachd, adhair-fhànas agus cyberspace san àm ri teachd.
Thuirt Oifigear
Riaghlaidh Pàrlamaid na h-Alba, am Fìor Urr. Coinneach
Mac an Tòisich BPA:
“Bha e mìorbhaileach a
bhith a’ comharrachadh na clach-mhìle shònraichte seo ann an eachdraidh an RAF
le buill de dh’Fheachd Rìoghail an Adhair agus caideatan-adhair bho air feadh
na h-Alba an t-seachdain seo.
“Ged a tha na
comharraidhean ceud bliadhna seo a’ toirt cothrom cudromach seachad gus
eachdraidh bheairteach an RAF aithneachadh, tha mi an dòchas cuideachd gum
brosnaich iad an ath ghinealach gu bhith am-measg nan innleadairean,
luchd-saidheans agus matamataigich as fheàrr san àm ri teachd.”
Thuirt Marshal Sir Steaphain
Hillier KCB CBE DFC, Ceannard Ceann-feachd an Adhair:
“Tha am-bliadhna a’ comharrachadh
an 100mh Ceann-bliadhna de chruthachadh Feachd Rìoghail an Adhair. Tha Alba
riamh air a bhith na phàirt chudromach de sgeulachd an RAF, agus tha sin a’
leantainn an-diugh, gu h-àraidh tro na ceanglaichean fìor mhath a th’ aige le
Pàrlamaid na h-Alba.
“Is e ar n-amas le
RAF100 a bhith a’ comharrachadh, a’ dèanamh gàirdeachas agus a’ brosnachadh.
Chan urrainn dhomh smaoineachadh air àite nas fheàrr airson na cuspairean seo a
chur air adhart ann an Alba na ann an seo, gu h-àraidh ar fòcas air daoine òga a
bhrosnachadh gus an tàlantan a leasachadh agus na miannan aca a thoirt gu buil.
“Mar a tha tachartasan
duilich na seachdain seo chaidh a’ dèanamh soilleir, chan urrainn dhuinn idir dìochuimhneachadh
na cunnartan ris a bheil na fir agus boireannaich againn a’ seasamh ann an
seirbheis na dùthcha. Tha Feachd Rìoghail an Adhair a’ coimhead air ais le moit
air euchdan agus gaisgeachd a mhuinntir tron 100 bliadhna a chaidh seachad;
agus tha sinn a’ coimhead air adhart ri dàrna linn de shoirbheachadh coltach
ris, air a lìbhrigeadh le daoine barraichte a tha air an tarraing bho gach
pàirt den chomann eadar-mheasgte againn.”
Cùl-fhiosrachadh
Faigh a-mach barrachd mu thachartasan RAF100
air feadh na RA.
Faigh a-mach barrachd mu Phàrlamaid na
h-Alba.