29.03.2018
Tha strì còig bliadhna airson aithne agus diagnosis nas fheàrr air euslaintich le galairean na fàireig sgiathaich (thyroid) air adhbharachadh iarrtas an-diugh airson aon phròtacal soilleir airson deuchainnean a thèid a chleachdadh thar na h-Alba gu lèir.
Chaidh an cuspair a thogail an toiseach ann an athchuinge ann an 2013, athchuinge PE1463,
agus tha an aithisg an-diugh le Comataidh nan
Athchuingean Poblach aig Pàrlamaid na h-Alba ag iarraidh air Riaghaltas
na h-Alba barrachd a dhèanamh gus eòlas euslainteach a chruinneachadh gus am
faigh luchd-fulaing an leigheas as freagarraiche.
Tro bheachdachadh na
Comataidh, chuala iad naidheachdan duilich mun bhuaidh a bh’ aig an strì airson
leigheas air beatha cuid de dhaoine, a’ gabhail a-steach bhon athchuingeach, Lorraine
Cleaver.
Thuirt Neach-gairm na
Comataidh, Johann NicLaomainn
BPA:
“Tha na h-eòlasan a tha
an athchuinge seo air nochdadh dìreach do-chreidsinneach. Tha an strì làitheil
an aghaidh pian leantainneach, tromad-inntinn, agus mì-chinnt gun abhsadh duilich
gu leòr, ach tha seo air a dhèanamh nas miosa buileach airson nach eil cuid de dhaoine
ann an ùghdarras a’ creidsinn an luchd-fulaing, agus cha dèan sin a’ chùis
idir, idir.
“Airson a’ mhòr-chuid,
’s ann air boireannaich a tha an galar seo a’ toirt buaidh. Agus tha mi duilich
a ràdh nach eil e a’ cur iongnadh orm gun deach cluas bhodhar a thoirt dha
gearan agus guidhe uiread de bhoireannaich. Tha e na phàirt de chùis nas fharsainge
nach eileas a’ dèiligeadh ri duilgheadasan slàinte a tha a’ cur air
boireannaich mar bu chòir.
“Feumaidh seo stad.
Feumaidh sinn èisteachd ri euslaintich agus feumaidh earbsa a bhith aig
euslaintich gun tèid an creidsinn. Sin an t-adhbhar gu bheil sinn air pròtacal dheuchainnean
nàiseanta iarraidh a thuilleadh air barrachd rannsachaidh gus dèanamh cinnteach
gu bheileas a’ dèiligeadh ri euslaintich mar dhaoine fa leth agus chan ann
dìreach mar comharraidhean-tinneis air duilleag.”
A thuilleadh air an
stiùireadh shoilleir, dh’iarr a’ Chomataidh cuideachd air buidhnean
proifeasanta obrachadh gu dlùth le buidhnean taic euslaintich agus le daoine fa
leth gus barrachd aire a thogail mun chùis. Thuirt an t-Iar Neach-gairm Aonghas
Dòmhnallach BPA:
“Tha an aithisg an-diugh
a’ comharrachadh clach-mhìle chudromach an dèidh 5 bliadhna de bheachdachadh,
agus tha sinn airson taing a thoirt dha na h-athchuingichean airson cùis cho cudromach
a thogail.
“Tha e follaiseach gu
bheil seo na chùis thoinnte agus bha a’ Chomataidh ceart a bhith a’ toirt ùine
a’ rannsachadh agus a’ sgrùdadh gach taobh agus argamaid a chuireadh air ar
beulaibh. Tha e follaiseach, ged nach eil aon fhuasgladh ann airson a h-uile trioblaid,
gu bheil cothrom ann èisteachd ri eòlas euslaintich, a bharrachd air a bhith a’
toirt a-steach pròtacal soilleir, singilte airson
Alba gu lèir.
Gheibhear lethbhreac de
dh’aithisg na Comataidh an seo.
Cùl-fhiosrachadh
Air a thoirt a-steach ann an 2013, dh’iarr
athchuinge PE1463 gun dèanadh cinnteach gum b’ urrainn do dhotairean-teaghlaich
agus eòlaichean-fàireig a bhith a’ dèanamh diagnosis pongail air duilgheadasan na
fàireig sgiathaich agus na fàireig adrenal
agus a’ toirt seachad an leigheas as freagarraiche.
Ged a chaidh a sgrìobhadh ann an dòigh fharsaing,
chuir an athchuinge cudrom air ìslead san fhàireag sgiathach agus na
h-euslaintich sin gu h-àraidh a tha fhathast a’ fulang às dèidh dhaibh an
leigheas àbhaisteach fhaighinn.
Gheibhear barrachd fiosrachaidh mu bheachdachadh na
Comataidh an seo.