23.03.2018
Tha suirbhidh le Comataidh Foghlaim is Sgilean Pàrlamaid na h-Alba a’ faighneachd dè an taic a tha ri fhaotainn do dhaoine òga nuair a tha iad a’ feuchainn ri co-dhùnadh dè a tha iad ag iarraidh a dhèanamh nas fhaide air adhart nam beatha.
Ag amas air daoine
òga eadar 15 agus 24, tha an t-suirbhidh airson barrachd ionnsachadh mu carson
a bhios daoine òga a’ leantainn shlighean sònraichte, dè tha gan cuideachadh
agus dè tha a’ cur bacadh orra, agus a bheil iad a’ faighinn far a bheil iad ag
iarraidh a bhith.
Tha seo a’ gabhail
a-steach an taic agus am fiosrachadh a tha ri fhaotainn gus an cuideachadh le faighinn
a-mach, san sgoil agus às a dhèidh, dè na roghainnean a tha rim faotainn. Bidh
e cuideachd a’ rannsachadh ciamar a bhios daoine òga a’ dèanamh cho-dhùnaidhean
mun àm ri teachd.
Rè Bliadhna na
h-Òigridh, tha a’ Chomataidh air a ràdh gum bi guthan òigridh bho thoraidhean na
suirbhidh gan stiùireadh mus dèan iad co-dhùnadh air dè na cùisean air an dèan
iad ceasnachadh sònraichte ann an seiseanan fianais san Ògmhios.
A’ cur na suirbhidh air bhog an-diugh thuirt
Neach-gairm na Comataidh, Seumas Dornan
BPA:
“Faodaidh an
co-dhùnadh mu na tha thu ag iarraidh a dhèanamh san àm ri teachd tighinn aig
aon de na h-amannan as dùbhlanaiche nad bheatha. Eadar 15 agus 24 tha thu a’ feuchainn
ri co-dhùnadh càit a bheil thu airson a dhol no dè tha thu ag iarraidh a
dhèanamh agus faodaidh seo a bhith doirbh gun taic cheart.
“Gu tric bidh sinn a’
cluinntinn mu cho cudromach ’s a tha cinn-uidhe tharbhach dha na daoine òga
againn, ach tha fios againn nach eil na cinn-uidhe sin furasta a ruisginn dha
cuid de dhaoine. Tha e doirbh co-dhùnadh dè a nì thu nuair a dh’fhàgas tu an
sgoil agus tha e doirbh an taic riatanach fhaighinn.
“Tha uiread
roghainnean ann, ged a bhiodh tu a’ dol gu obair, gu preantasachd no gu
colaiste no oilthigh. Mura h-eil fios aig daoine òga gu bheil na roghainnean
sin ann agus, nas cudromaiche, mura h-eil iad a’ faighinn taic gus an dreuchd
cheart fhaighinn dhaibh fhèin, chan urrainn dhaibh an làn chomas a
choileanadh.”
Tha an t-suirbhidh
a chaidh a-mach an-diugh cuideachd a’ faighneachd mu thaic taobh a-muigh na
sgoile a dh’fhaodas a bhith na chuideachadh a cheart cho math nuair a tha co-dhùnaidhean
gan dèanamh mun àm ri teachd.
Faodar lethbhreac den t-suirbhidh a lorg an seo.
Cùl-fhiosrachadh
Gheibhear tuilleadh
fiosrachaidh mu obair na Comataidh air duilleag-lìn na Comataidh an seo.