16.03.2018
Mus tòisich
iad air beachdachadh air Bile Riaghladh Eucoraich (Alba), a chaidh a thoirt a-steach le Riaghaltas
na h-Alba, tha Comataidh a’ Cheartais a’ cur air bhog gairm airson bheachdan.
A bharrachd air dèanamh comasach tuilleadh cleachdadh de thagadh (tagging) eileagtronaigeach, bidh am Bile a’ lùghdachadh na h-ùine a dh’fheumas dol seachad mus bi dìteadh ‘air a chaitheamh’ air los rùn-phàirteachadh (disclosure) agus bidh e ag atharrachadh mar a tha bùird paròil air an dèanamh suas.
Mar thoradh air na h-atharrachaidhean a thathar a’ moladh, dh’fhaodadh eucoraich a bhith a’ giùlan tagaichean le teicneòlas adhartach geò-lorgadh GPS. Tha Ministearan cuideachd a’ coimhead air adhart gu àm nuair a dh’fhaodadh tagaichean a bhith air an cleachdadh gus alcol no drugaichean aithneachadh ann an aorabh an eucoraich. Bidh am Bile a’ dèanamh nam moladh seo comasach, a bharrachd air ceuman eile san àm ri teachd.
A bharrachd air sin, bidh am Bile ag ath-leasachadh an lagha air cuin a bhithear a’ rùn-phàirteachadh fiosrachaidh gu daoine eile, leithid luchd-fastaidh, air eucoirean a rinneadh roimhe. Gu h-iomlan, tha am Bile a’ gluasad a dh’ionnsaigh lùghdachadh an riatanais airson rùn-phàirteachaidh le bhith a’ lùghdachadh nan ceann-ama mus bi dìtidhean ‘air an caitheamh’. Mar eisimpleir, airson binn prìosain a mhair eadar 1 is 2 bhliadhna, bidh an t-àm airson rùn-phàirteachadh a’ tuiteam bho 10 gu 3 bliadhnaichean. Cha bhi am Bile a’ toirt buaidh air an rùn-phàirteachadh aig ‘ìre nas àirde’, mar a chanar ris, airson raointean fastaidh a tha nas tioma.
Tha Riaghaltas na h-Alba ag aithris gu bheil iad ag amas air barrachd cuideim a chur air casg eucoirean, air ath-ghnàthachadh, agus air taic airson luchd-fulaing.
A’ bruidhinn nuair a chaidh an gairm airson fianais a chur air bhog, thuirt Neach-gairm na Comataidh Mairead Mitchell BPA:
“Tha e soilleir gum feumar beachdachadh gu cùramach air atharrachaidhean sam bith don dòigh sa bheil sinn a’ làimhseachadh luchd-eucoir. Bidh Buill ag iarraidh a bhith riaraichte gu bheil na h-ullachaidhean seo a’ co-chothromachadh gu h-iomchaidh eadar eucoir a chasg, taic a thoirt do luchd-fulaing agus eucoraich ath-ghnàthachadh.
“Bithear ag iarraidh air raon farsaing de chom-pàirtichean fianais a thoirt dhuinn, nam measg a’ cheàird laghail, luchd-fulaing na h-eucorach agus seann eucoraich.
“Bidh mòran daoine ann le beachdan luachmhor air na ceistean seo, agus bidh na barailean seo a’ cuideachadh cumadh a thoirt do dh’aithisg na comataidh aig ìre aon, a bharrachd air aig ìrean nas anmoiche den Bhile rè a’ chùrsa phàrlamaidich aige.”
Tha an gairm airson bheachdan fosgailte gus Dihaoine 20 Giblean.
Cùl-fhiosrachadh
Tha tuilleadh fiosrachaidh air a’ Bhile, a’ gabhail a-steach clàr-ama airson sgaoileadh fiosrachaidh air dìtidhean ann an clàr A, ri fhaotainn an seo.
Gheibhear an gairm airson fianais bhon Chomataidh an seo.