12.10.2017
Chaidh a ghairm an-diugh gu bheil luchd-gairm nan 15 comataidh Pàrlamaid na h-Alba dol a cheasnachadh a’ Phrìomh Mhinisteir air a’ Phrògram Riaghaltais aice.
Le Comataidhean uile a’ sgrùdadh portfolio an Riaghaltais, gheibh am Prìomh Mhinistear ceistean air raon farsaing de chuspairean, a’ gabhail a-steach foghlam, slàinte, Brexit agus eile.
Chaidh a ghairm cuideachd gun tachair seisean den leithid dà uair sa bhliadhna, le dùil ri seisean eile sa Mhàrt 2018.
A’ bruidhinn ron choinneamh, thuirt Neach-cathrach Buidheann an Luchd-gairm, Leas-oifigear Riaghlaidh Cairistìona Ghreumach BPA:
“’S e sgrùdadh leantaileach, mionaideach obair an t-seisein seo agus sin an obair air a bheil ar comataidhean air leth math. Cuiridh an luchd-gairm ceistean air a’ Phrìomh Mhinistear air a h-uile cuspair eadar slàinte is foghlam gu an àrainneachd, tèarainteachd shòisealta, agus, gun teagamh, Brexit.
“Cha bhi càil a dhìth cheistean oirnn agus, le uiread chùisean cudromach ag èirigh, tha mi cinnteach gum bi deasbad inntinneach againn.”
Anns a’ chathair airson an t-seisein, a bhios air Diciadain 25 Dàmhair, bidh an Leas-oifigear Riaghlaidh agus Neach-cathrach Buidheann an Luchd-gairm, Cairistìona Ghreumach BPA. Tachraidh e eadar 12:30 agus 2f, air Diciadain 25 Dàmhair.
Tha fàilte ron phoball agus luchd-naidheachd a bhith an làthair. Faodar tiogaidean poblach a chlàradh tro Sheirbheisean Luchd-tadhail na Pàrlamaid. Thèid an seisean a shruthadh air Facebook Live agus T.Bh. na Pàrlamaid.
Cùl-fhiosrachadh
Bidh coinneamh Buidheann an Luchd-gairm aig 12.30f air Diciadain 25 Dàmhair ann an Seòmar Comataidh 2. Gus fhaicinn beò, tagh Seòmar Comataidh 2 air Parliament TV.
Is e seo an còigeamh turas a tha Prìomh Mhinistear air tighinn air beulaibh Luchd-gairm nan Comataidhean.
Bidh ìomhaighean ann den t-seisean, cuir fios air Greg Black airson an sgaoileadh.