31.05.2017
Tha 10 millean lùb dhathte ann, thug e 25,000 uair a shìde de dhìcheall is obair chruaidh gus a dhèanamh agus tha e tha e a’ toirt dealbh dhuinn air an turas a ghabh aon de na daoine as ainmeil ann an eachdraidh na h-Alba.
Tha Taipeis (Tapestry) Phrestonpans, a bhios ri fhaicinn aig Pàrlamaid na h-Alba bho 21 Ògmhios 2017, a’ sealltainn an turais iongantaich a ghabh Prionnsa Teàrlach a dh’Alba.
Tha an taipeis air aon den fheadhainn as motha de a leithid air an t-saoghal agus tha e a’ sealltainn mar a thug na Seumasaich buaidh air saighdearan dearga bho Arm Bhreatainn aig Blàr Sliabh a’ Chlamhain (Gladsmuir) air 21 Sultain 1745.
Dh’obraich an neach-ealain Anndra Crummy, a chruthaich Taipeis Mhòr na h-Alba cuideachd, còmhla ri ceudan de luchd-fuaigheil ann an Alba, san Fhraing, ann an Astràilia agus sna Stàitean Aontaichte gus sgeulachd a’ Phrionnsa Teàrlach agus saoghal nan Seumasach a chur an cèill tro obair ealain.
Thuirt an t-Oifigear Riaghlaidh, am Fìor Urramach Coinneach Mac an Tòisich BPA:
“Às dèidh do mar a shoirbhich cho mòr ris an taisbeanadh de Thaipeis Mhòr na h-Alba, tha sinn an dòchas gun còrd Taipeis Phrestonpans a cheart cho mòr ris na daoine a bhios a’ tadhal oirnn.
“Tha an taisbeanadh seo an-asgaidh agus ’s e cothrom air leth a th’ ann do luchd-tadhail sgeulachd a’ Phrionnsa Teàrlach fhaicinn agus an taipeis a’ sealltainn mar a thàinig e a dh’Alba agus mar a thug na Seumasaich buaidh iongantach air na saighdearan dearga aig Blàr Sliabh a’ Chlamhain.
“Faodaidh teaghlaichean, agus luchd-tadhail às bith dè an aois, slighe a’ Phrionnsa a leantainn agus an turas a ghabh e thar Alba o chionn cha mhòr 300 bliadhna. Gu dearbha, tha Lùchairt Taigh an Roid fiù ’s a’ nochdadh san taipeis mar aon de na h-àiteachan far an do stad am Prionnsa às dèidh dha buaidh a thoirt leis aig Blàr Sliabh a’ Chlamhain.”
Thuirt Anndra Crummy, a chruthaich Taipeis Phrestonpans còmhla ri buidheann de luchd-fuaigheil:
"’S e fìor urram a th’ ann gu bheil Taipeis Phrestonpans gu bhith ga shealltainn aig Pàrlamaid na h-Alba. Mar phròiseact ealain coimhearsnachd, tha e a’ sealltainn dè dh’fhaodas tachairt nuair a thig daoine còmhla agus iad a’ dèanamh feum den ealantas is sgilean cruthachail aca gus obair ealain fìor mhòr a dhèanamh.
“Tha e gu sònraichte math a bhith dèanamh gàirdeachas ris na sgilean cruthachail aig uimhir de bhoireannaich a chuir ris an taipeis seo leis na comasan mìorbhaileach aca a thaobh obair-ghrèis.”
Cùl-fhiosrachadh
Thèid an taisbeanadh a chumail eadar 21 Ògmhios is 20 Iuchar 2017 agus tha e AN-ASGAIDH.
Gheibhear barrachd fiosrachaidh an seo.
Gheibhear barrachd fiosrachaidh air Taipeis Phrestonpans an seo.