24.02.2017
Tha gairm airson fianais a’ sireadh bheachdan
bhon h-uile duine fa leth no buidhnean aig a bheil ùidh ann
am Bile Cùmhnant (Còraichean Treas Pàrtaidh) (Alba).
An-dràsta, tha còraichean an treas pàrtaidh ri fhaotainn fon lagh choitcheann. Tha lagh na h-Alba a-cheana a’ toirt cead do phàrtaidhean do chùmhnant a bhith a’ cruthachadh còir a bhios ion-èigneachail (enforceable) fon lagh, agus theirear jus quaesitum tertio no JQT ris a’ chòir seo.
Tha am Bile ag amas air suidheachadh an lagha choitchinn seo a chur air bunait reachdail. Bheirear còir reachdail do treas pàrtaidhean do chùmhnant air chor ’s gum bi còir ion-èigneachail fon lagh aca.
Thuirt Iain Scott BPA, Neach-gairm airson Comataidh Cumhachdan Tiomnaichte is Ath-leasachadh an Lagha:
“Tha am Bile seo a’ sireadh dòigh-obrach ùr-nodha a thoirt do chòraichean an treas pàrtaidh, air chor ’s gum bi Alba an co-rèir ri uachdranais (jurisdictions) eile.
“Mar phàirt den fhianais a bhios sinn a’ sireadh gus ar cuideachadh a bhith a’ dèanamh co-dhùnadh air prionnsabalan coitcheann a’ Bhile, tha sinn ag iarraidh a chluinntinn bho dhaoine fa leth agus bho bhuidhnean aig am bi ùidh ann, no air an toirear buaidh bho, atharrachadh an lagha seo a thathar a’ moladh.
“A bharrachd air sireadh bheachdan bho chompanaidhean lagha, gnothachais agus sgoiltean lagha oilthigh, tha sinn airson cluinntinn bho bhuidhnean a tha a’ dìon chòraichean nan saoranach agus bho dhuine sam bith eile a tha eòlach air an taobh seo den lagh.”
Thathar ag iarraidh air luchd-freagairt a bhith a’ dèiligeadh ris na ceistean a leanas:
1. Dè na sochairean a thig bho bhith a’ gluasad bhon lagh choitcheann gu bunait reachdail?
2. Dè a’ bhuaidh a bhios aig a’ Bhile air còraichean an treas pàrtaidh?
3. A bheil thu den bheachd gun cleachdar lagh na h-Alba barrachd mar thoradh air a’ Bhile?
4. A bheil dragh sam bith agad air a’ mhodh-obrach a thathar a’ gabhail anns a’ Bhile?
5. Dè na toraidhean ionmhasail a thig bhon Bhile?
Is e 24 Màrt 2017 an ceann-latha airson tagraidhean sgrìobhte.
Cùl-fhiosrachadh
Gheibhear lethbhreac den Bhile, agus na pàipearan an cois
ris, air làrach-lìn Pàrlamaid na h-Alba aig:
http://www.scottish.parliament.uk/parliamentarybusiness/Bills/103313.aspx
Chaidh am Bile a thoirt a-steach do Phàrlamaid na h-Alba
le Riaghaltas na h-Alba air Dimàirt 31 Faoilleach 2017.
Is e Bile Coimisean Lagh na h-Alba a tha ann.
Tha am Bile a’ cur an gnìomh nam molaidhean reachdail a
bha ann an aithisg Coimisean Lagh na h-Alba Review
of Contract: Report on Third Party Rights (SLC No 245; Iuchar 2016). Chaidh
an aithisg fhoillseachadh mar phàirt de dh’ath-sgrùdadh nas fharsainge air lagh
cùmhnant a rinneadh leis an SLC.