03.02.2017
Thèid
cothrom air cùram-slàinte sna prìosanan agus cho èifeachdach agus a tha e a
sgrùdadh le Buill air Comataidh Slàinte is Spòrs.
Gabhaidh
a’ Chomataidh rannsachadh goirid os làimh mun cheist far an toirear sùil air
mar a tha cùram-slàinte ga lìbhrigeadh anns na prìosanan agus cosgais na
seirbheise. Gabhaidh e beachd cuideachd air brùthaidhean (pressures) an-dràsta ’s san àm ri teachd air lìbhrigeadh
cùram-slàinte sna prìosanan.
Tha
Buill air gairm airson fianais mun cheist seo a sgaoileadh.
Thuirt Neach-gairm Chomataidh Slàinte is
Spòrs, Niall MacFhionnlaigh BPA:
“B’ e adhbhar a bhith a’ gluasad
cùram-slàinte bho sheirbheis nam prìosanan gu Seirbheis Nàiseanta na Slàinte
ana-cothrom ann an slàinte a lùghdachadh, cothrom nas fheàrr air làimhseachadh
a bhrosnachadh agus leasachadh a thoirt air leantainneachd a’ chùraim. Còig
bliadhna an dèidh làimhe, tha a’ Chomataidh seo a’ faireachdainn gu bheil e
iomchaidh sgrùdadh a dhèanamh air cho soirbheachail agus a tha seo air a bhith.
“Tha na prìosanan nan cothrom fa leth
ana-cothrom ann an slàinte a lùghdachadh le bhith a’ ceangal ri daoine nach eil
air siostam cùram-slàinte ri linn cho riaslach agus a tha an dòigh-beatha aca
gu tric. Mar a tha le cùram anns a’ phoball anns an fharsaingeachd, tha sluagh
sna prìosanan air a bheil an aois a’ tighinn a bhios feumach air cùram airson
iomadach cor san ùine fhada.”
Ann an 2011 chaidh uallach airson ullachadh
cùram-slàinte sna prìosanan a ghluasad gu Seirbheis Nàiseanta na Slàinte. Is e
uallach an Ùghdarrais Amalachaidh ionadail a tha ann a-nis. Bidh a’ Chomataidh
cuideachd a’ sgrìobhadh gu gach Ùghdarras Amalachaidh gus fios fhaighinn air
buidseatan is cosgaisean na seirbheise, luchd-obrach is goireasan, iarrtas,
dèanadas agus leasachadh sheirbheisean.
Tha a’ Chomataidh cuideachd ag iarraidh
beachdan daoine air na ceistean a leanas:
- Dè nur barail na brùthaidhean air
ullachadh slàinte agus cùraim shòisealta sna prìosanan?
- Dè cho math nur barail agus a thathar air
freagairt a thoirt air na brùthaidhean seo?
- Dè an ìre dham bheil sibh den bheachd gu
bheilear / gum faodte aghaidh a chur air ana-cothrom ann an siostam
cùram-slàinte nam prìosanan?
- Dè na bacaidhean a tha ann an-dràsta air
cleachdadh siostam cùram-slàinte nam prìosanan gus toraidhean sluagh nam
prìosanan a thaobh slàinte a leasachadh?
- An comharraich sibh leasachaidhean a
dh’fhaodte toirt air seirbheisean an-dràsta?
- Dè na brùthaidhean as motha bhios ann sna
15 bliadhna ri teachd nur barail?
Cùl-fhiosrachadh
Tha a’ ghairm
airson bheachdan fosgailte gu 28 Gearran 2017.