19.09.2016
Tha a’ Chomataidh Riaghaltas Ionadail is Coimhearsnachdan
a’ dol a thoirt sùil air a’ bhuaidh a th’ aig buidseatan nas lugha air
seirbheisean chomhairlean agus a’ Chomataidh a’ tòiseachadh air an sgrùdadh
bhliadhnail aca air a’ bhuidseat.
Tha lùghdachadh de mu 10% (às aonais buaidh na h-atmhorachd) air a bhith ann am maoineachadh airson riaghaltas ionadail ann an Alba bho ràinig am maoineachadh sin an ìre a b’ àirde ann an 2009-10. Tha BPAan airson cluinntinn mu mar a tha ùghdarrasan ionadail a’ dèiligeadh ris na dùbhlain a bhios ann ri linn an lùghdachaidh agus tha iad airson faighneachd am bu chòir coimhead air maoineachadh a gheibhear bho Riaghaltas na h-Alba nach eil na phàirt den aonta mhaoineachaidh airson Riaghaltas Ionadail - ach a tha cuideachadh le bhith maoineachadh seirbheisean ionadail - mar phàirt den bhuidseat airson Riaghaltais Ionadail.
Bidh a’ Chomataidh cuideachd a’ beachdachadh air an targaid a th’ aig Riaghaltas na h-Alba gus 50,000 dachaighean ùra a bhios rim faotainn aig prìs reusanta a thogail thairis air an ath chòig bliadhna. Tha an Riaghaltas air a chur roimhe gum bi 35,000 dhiubh sin rim faotainn air mhàl sòisealta.
Bheir a’ Chomataidh sùil air na prògraman maoineachaidh airson a’ phrògraim gus dachaighean a thogail, nam measg tha am Prògram airson Taigheadais aig Prìs Reusanta agus Taic le bhith Ceannach, agus bidh iad a’ faighneachd a bheilear a’ faighinn luach an airgid às na prògraman sin.
Thuirt Bob Doris BPA, Neach-gairm na Comataidh Riaghaltas Ionadail is Coimhearsnachdan:
“Chan eil dùil ann gum bi an dreachd de bhuidseat Riaghaltas na h-Alba air a foillseachadh gu nas fhaide air a’ bhliadhna, agus mar sin tha a’ Chomataidh againn a’ toirt sùil air ais air na chaidh a chosg air riaghaltas ionadail is taigheadas san dà bhliadhna mu dheireadh.
“Tha maoineachadh airson riaghaltais ionadail air tuiteam anns na còig bliadhna mu dheireadh. Tha sinn airson faighinn a-mach mu mar a tha ùghdarrasan ionadail air dèiligeadh ris an lùghdachadh sin agus mu mar a thug e buaidh air seirbheisean do dhaoine. Cuideachd, bidh sinn a’ faighneachd am bu chòir coimhead air airgead eile a thèid a chosg air nithean co-cheangailte ri dleastanasan nan ùghdarrasan ionadail, leithid mhaoinean gus seirbheisean slàinte is cùram sòisealta aonachadh, mar phàirt den bhuidseat airson riaghaltais ionadail.
“Tha sinn a’ sireadh beachdan air mar a tha no nach eil na prògraman maoineachaidh, a tha air an stiùireadh le àrd-riaghaltas, a’ cuideachadh le targaidean Riaghaltas na h-Alba gus dachaighean ùra a thogail.”
Cùl-fhiosrachadh
Thathar an dùil gun tèid an dreachd de bhuidseat Riaghaltas na h-Alba airson 2017-18 fhoillseachadh nas fhaide air a’ bhliadhna seo. Mar sin, tha a’ Chomataidh air aontachadh sgrùdaidhean a dhèanamh ron bhuidseat, agus iad a’ coimhead air ais air na chaidh a chosg ann an 2015-16 agus (chun na h-ìre ’s as urrainn dhaibh) air na chaidh a chosg den bhuidseat a th’ ann an-dràsta airson 2016-17.
Gheibhear fios air gairm na Comataidh airson fianais an seo.